Read Fulfulde Balndi 8 Bible Online

Balndi 8 - Fulfulde bible

Balndi 8

¹Nane! Hikma ɗon ewno, faamu ɗon towna sawtu mum.

²Dow towndiije baŋnge laawol, haa kawtirɗe laabi, ton ka dari.

³Baŋnge dammuɗe, haa nastirde berniwol, haa jolɗe fuu ka ɗon wooyna:

⁴“Mi ɗon ewno on, onon yimɓe, sawtu am ɗon yaha haa ɓiɓɓe Aadama.

⁵Njaɓe anndal, onon humaki'en, onon faataaɓe boo, keɓe hakkiilo.

⁶Nane haa mi yecca on ɓurduɗum wooɗugo, mi wi'a on ko fotti.

⁷Ɗemŋgal am ɗon wolwa gooŋga, mi ɗon wanya fewre fuu.”

⁸Bolle am fuu ɗe adiliije, walaa leliiɗum malla faasikaare nder maaje.

⁹Ɗe fuu ɗe darnuɗe haa paamoowo, ɗe gooŋɗuɗe haa marɓe anndal.

¹⁰Cuɓe anndinol am mbattudi[3] cardi, ɓurne anndal dow kaŋŋeeri laaɓndi.

¹¹Min hikma, mi ɓuri luuluuje saman, ko goɗɗo ɗaɓɓata fuu, ɗum he'aay nanndugo bee am.

¹²Mi ɗon jooɗodi bee kirseeku, mi mari anndal e sawari.

¹³Hulugo Jawmiraawo ɗum wanyugo halleende. Mi ɗon wanya mawnitaare e elewre, kuuɗe kalluɗe e bolle faasikiije fuu.

¹⁴Min mari sawari e baawal, hakkiilo e semmbe ɗon ngondi bee am.

¹⁵Bee am laamiiɓe laamorto, mawɓe boo ɗon hiitoro adilaaku.

¹⁶Bee am ardiiɓe umrirta, mawɓe boo kiitorto lesdi.

¹⁷Mi yiɗi yiɗɓe yam, ɗaɓɓitanɓe yam tawatam.

¹⁸Risku e tedduŋgal ɗon ngondi bee am, non boo maral tabitŋgal e ngeenaari pottundi.

¹⁹Nafuuda am ɓuri kaŋŋeeri laaɓndi e cardi cuɓaandi saman.

²⁰Mi ɗon yaha dow laawol adilaaku, haa caka laawol kiita ndarnuka,

²¹haa mi riskina yiɗɓe yam, mi hebbina cigorɗi maɓɓe.

²²Jawmiraawo tagi yam, mi fuɗɗam tagle maako, mi aranum kuuɗe maako, diga ɓooyma.

²³Mi tagaama diga ɓooyma, haa fuɗɗam, hiddeko duniyaaru laato.

²⁴Mi waɗaama diga beeli lugguɗi ciwaa, diga walaa ceeɓooje marɗe ndiyam tawon.

²⁵Hiddeko kooseeje njo'ine, ko aarti towndiije fuu mbaɗaami,

²⁶diga o tagaay lesdi e gese tawon, koo fuɗɗam mbulwuldi lesdi boo.

²⁷Nde o waɗa asamanji, mi ɗonno, nde o diida taarde dow ndiyamji luggeeŋga,

²⁸nde o jo'ina duule haa dow, nde ɓulduɗe luggeeŋga ɓula bee semmbe,

²⁹nde o ta'ana mbeela keerol, ngam taa ndiyamji ƴaɓɓo pomoole, nde o wallina caɓɓaaje lesdi,

³⁰saa'i maajum mi ɓiŋngel giɗaaŋgel haa maako, nyalɗe fuu mi welwelo maako, tum mi ɗon fija yeeso maako,

³¹mi ɗon fija nder taarde duniyaaru maako, mi ɗon heɓa welwelo caka ɓiɓɓe Aadama.

³²“Jonta kam, onon suka'en, naneeɗam. Barka laatanto tokkotooɓe laabi am.

³³Nane anndinki am, taa cale ki, laate hikma'en.

³⁴Barka laatanto neɗɗo mo nanantammi, jooɗiiɗo haa dammugal am nyalɗe fuu ngam haa o ayna parewal am.

³⁵Ngam keɓɗo yam heɓi ngeendam, o heɓi boo yerduye Jawmiraawo.

³⁶Ammaa luutɗo yam wonni yoŋki mum, wanyɓe yam fuu ngiɗi maayde.”