Read Fulfulde Gaazoowo 12 Bible Online

Gaazoowo 12 - Fulfulde bible

Gaazoowo 12

¹Siftor tagɗo ma nder saa'i sukaaku ma, hiddeko balɗe kalluɗe ngara, hiddeko duuɓi ɓadito haa mbi'ata: Ɗum fottantaa yam fahin,

²hiddeko naaŋge e jayŋgol e lewru e koode nyiɓɓa, duule boo lorto ɓaawo iyeende.

³Nyannde maajum aynooɓe ndiwnan, semmbiɗɓe turoto. Namooɓe accan namugo ngam ɓe ɗuuɗaay, laaranɓe gal wurdere suudu ngi'ataa laaɓɗum.

⁴Pareeje yolnde maɓɓoto, sonyo namrude ustoto, koo siikaaŋgo sonndu boo findinan yimɓe, gimi yimooɓe njinnan.

⁵Yimɓe miijoto nokkuuje towɗe, ɓe kulan waancugo boo. Lawjahi ɗon finna, mbaɓɓattu boo fiiran bee bone, ko welnata nyaamdu boo welnataa. Koo moy yahan haa saare mum duumiinde, woyanɓe mo taaroto dow laawol.

⁶Ɓoggi cardi piistoto, taasawo kaŋŋeeri fusan, mbulku boo fusan haa seeɓoore ndiyam, cafirɗum sampititto nder ɓulndu.

⁷Mbulwuldi loroto haa lesdi haa ndi wonno, poofɗe ngeendam loroto haa Allah mo hokki ɗe.

⁸Meereejum meere, koo ɗume fuu woni meere. Nii Gaazoowo wi'i.

⁹Gaazoowo laataaki hikmaajo tan, ammaa o ekkitini boo yimɓe ko o anndi. O foondi, o linyi e o mo'ini balndi ɗuuɗɗi.

¹⁰O ɗaɓɓiti winndugo bolle belɗe, bolle ɗe o winndi fuu, ɗe darnuɗe e gooŋɗuɗe.

¹¹Bolle hikma'en nanndi bee sawru seeɓndu ndu gaynaako, hawtanɓe ɗe boo nanndi bee suufuuje ɗisaaɗe, ɗum fuu gaynaako gooto hokki ɗum.

¹²Hakkil boo ɓiŋngel am: Winndugo defte ɗuuɗɗe timmataa, jaŋgde ɗuuɗnde boo somnan ɓanndu.

¹³Ndaa timmoode ko wi'a fuu: Hul Allah, ɗowtana umrooje mum. Ɗum waajibi dow yimɓe fuu,

¹⁴ngam Allah hiitoto kuuɗe men fuu, koo booɗɗe koo kalluɗe, koo sirriije fuu boo.