Read Fulfulde Gaazoowo 3 Bible Online

Gaazoowo 3 - Fulfulde bible

Gaazoowo 3

¹Woodi wakkatiire ngam koo ɗume fuu, woodi saa'iire ngam ko ɗon saalo les asama fuu:

²Saa'iire ngam danyeego e saa'iire ngam maayugo, saa'iire ngam jubaago e saa'iire ngam ɗoofugo ko juba,

³saa'iire ngam mbarugo e saa'iire ngam hurgugo, saa'iire ngam yibbingo e saa'iire ngam nyiɓtaago,

⁴saa'iire ngam woyugo e saa'iire ngam jalugo, saa'iire ngam uumugo e saa'iire ngam wamugo,

⁵saa'iire ngam sakkingo kaa'e e saa'iire ngam mooɓtugo ɗe, saa'iire ngam harlaago e saa'iire ngam daayaago harlaago,

⁶saa'iire ngam ɗaɓɓugo e saa'iire ngam majjingo, saa'iire ngam jogaago e saa'iire ngam wudingo,

⁷saa'iire ngam seekugo e saa'iire ngam nyootugo, saa'iire ngam jeeɗaago e saa'iire ngam wolwugo,

⁸saa'iire ngam yiɗugo e saa'iire ngam wanyugo, saa'iire ngam konu e saa'iire ngam sulhu.

⁹Nafuuda kaye neɗɗo heɓata haa torra kuugal ngal o huuwata haa duniyaaru fuu?

¹⁰Mi yi'i suklere nde Allah sukli ɓiɓɓe Aadama.

¹¹Ko Allah waɗi fuu wooɗi nder saa'iire mum. Non boo, o jo'ini duumaare nder ɓernde neɗɗo, koo to neɗɗo waawataa faamugo kuugal ngal Allah huuwi diga fuɗɗam haa timmoode boo.

¹²Mi faami: Walaa hayru ngam neɗɗo, sonaa seyaago e maatugo belɗum nder ngeendam mum.

¹³Non boo to goɗɗo nyaami, yari, to o yi'i hayru nder torra maako fuu boo, ɗum dokkal Allah.

¹⁴Mi faami: Ko Allah waɗata fuu, ɗum tabitan haa foroy, walaa ko ɓesdete malla ko ustete haa maajum. Allah waɗi ɗum bana nii ngam haa yimɓe kula mo.

¹⁵Ko laati jonta, laatino ɓooyma. Ko tammi laataago boo, laati diga naane. Allah ɗon wartira ko saali.

¹⁶Mi yi'i boo: Nder duniyaaru, halleende ɗon haa pellel kiita ngooŋɗuka e adilaaku.

¹⁷Mi numi: Allah hiitoto adiliijo e kalluɗo, ngam huunde koo ndeye e kuugal koo ngale fuu ɗon bee saa'iire mum.

¹⁸Mi numi: Allah ɗon foonda ɓiɓɓe Aadama haa ɓe paama ɓe ɗon bana dabbaaji.

¹⁹Ngam hoddiroore nde tawata ɓiɓɓe Aadama foti bee nde dabbaaji. Bana ɗi'i mbaatirta, non ɓeya maayrata boo. Yimɓe e dabbaaji mari poofɗe goote. Walaa ko neɗɗo ɓurdata dabbaaji, ngam koo ɗume fuu, ɗum meere.

²⁰Koo ɗume fuu ɗon yaha nokkuure woore. Koo ɗume fuu iwi haa mbulwuldi, koo ɗume fuu ɗon loro haa mbulwuldi boo.

²¹Moy anndi to yoŋki ɓiɓɓe Aadama eeŋgan dow malla yoŋki dabbaaji nastan haa lesdi?

²²Mi faami: Walaa hayru ngam neɗɗo, sonaa o seyoro kuugal maako, ngam kanjum woni geɗal maako. Moy wartirta mo ngam laarugo ko laatoto ɓaawo maako?