Read Fulfulde Gaazoowo 8 Bible Online

Gaazoowo 8 - Fulfulde bible

Gaazoowo 8

¹Moy nanndi hikmaajo? Moy anndi faamtingo kuuje? Hikma neɗɗo ɗon yayna yeeso mum, ɗon sottina caatal yeeso mum.

²Ɗowtana umroore laamiiɗo, ngam daliila hunayeere yeeso Allah.

³Taa yaawu daayotirgo bee maako, taa saatin hoore ma nder kuugal ngal laamiiɗo yerdaaki, ngam o waɗan ko o yiɗi fuu.

⁴Ngam wolde maako mari baawɗe. Moy ƴamata mo: “Ko mbaɗata?”

⁵Mo ɗon ɗowtano laamiiɗo nastataa nder sarru. Ɓernde hikmaajo anndan wakkati e kiita.

⁶Ngam koo ɗume fuu woodi wakkati e kiita, ammaa sarru neɗɗo ɗon teddana mo.

⁷O anndaa ko tammi wargo. Ngam moy anndinta mo no ɗum laatorto?

⁸Walaa neɗɗo mari baawɗe jogitaago poofɗe, walaa marɗo baawɗe dow nyalaade maayde mum, walaa mo waawata salaago yahugo haɓre, halleende boo daɗnataa baɗanɗo nde.

⁹Mi yi'i ɗum fuu, yaake mi ɗon linya ko yimɓe mbaɗata haa duniyaaru. Wakkati feere neɗɗo ɗon mara baawɗe dow yimɓe, nden ɗum ɗon waddana ɓe sarru.

¹⁰Mi yi'i ɓe uwi halluɓe. Nde yimɓe nasti, ngurti hirsirde, ɓe ngejjiti nder berniwol ko halluɓe ɓe'e mbaɗno. Kanjum boo ɗum meere.

¹¹Ngam ɗume yimɓe keewi suuno waɗugo kalluɗum? Ngam kuuɗe maɓɓe kalluɗe kiitataake law.

¹²Hakkeejo waɗan kalluɗum nde teemerre, o juttinan balɗe maako boo. Ammaa mi anndi, kulɗo Allah heɓan hayru ngam o mari kulol yeeso muuɗum,

¹³ammaa kalluɗo heɓataa hayru. Balɗe maako caaloto law bana ɗowdi, ngam o hulataa Allah.

¹⁴Ndaa ko ɗon saalo haa duniyaaru: Adili'en woɗɓe ɗon keɓa ngeenaari halluɓe e halluɓe woɗɓe ɗon keɓa ngeenaari adili'en. Ngam man mbi'mi kanjum boo ɗum meere.

¹⁵Min, mi manan seyo. Ngam neɗɗo walaa hayru haa duniyaaru sam, sey nyaamugo, yarugo e seyaago. Kanjum yahdata bee maako nder torra maako, nder balɗe ɗe Allah hokki mo haa duniyaaru fuu.

¹⁶Nde mi waɗi anniya ɗaɓɓugo hikma e faamugo suklere haa duniyaaru — ngam goɗɗo foti haɗugo hoore mum ɗaanaago jemma e naaŋge fuu,

¹⁷mi laari ko Allah waɗi fuu: Neɗɗo waawataa heɓtugo ko huuwa haa duniyaaru. No o tiinori ɗaɓɓugo ɗum fuu, o heɓtataa ɗum. Hikma'en ɗon mbi'a ɓe ngoodi anndal, ammaa kamɓe boo ɓe keɓtataa.