Read Fulfulde Yimre Suleymaanu 1 Bible Online

Yimre Suleymaanu 1 - Fulfulde bible

Yimre Suleymaanu 1

¹Ndaa yimre Suleymaanu ɓurnde wooɗugo nder gime fuu.

²Hebbam kebbaaɗe bee hunnduko! Yiide ma ɓuri inaboojam welugo.

³Uureeŋgol uurle maaɗa weli masin, innde maaɗa woni uurdi ilanndi, ngam daliila man faanyɓe fuu ngiɗi ma.

⁴Fooɗam ɓaawo ma, njaawen bee pargal! Laamiiɗo nastini yam nder cuuɗi mum. En ngonan nder welwelo e seyo ngam barka maaɗa, en maŋgtan yiide ma ko ɓuri inaboojam. Bee daliila laaɓka rewɓe fuu ngiɗi ma.

⁵Ndaa, mi ɓalwi, ammaa mi ŋarniiɗo boo, onon faanyɓe rewɓe nder Urusaliima fuu. Bana laymaaji haa Keedar mi ɓalwiri, bana wiirndallooji Suleymaanu mi wooɗiri.

⁶Taa ɓalwal ɓanndu am sukla on, ɗum naaŋge ɓalwini yam! Deerɗiraaɓe am tikkani yam, ɓe ndooli yam aynugo gese inabooje, ngesa inabooje am kam, mi aynaay ka.

⁷An mo ɓernde am yiɗi ɗum, anndinam: Toy a durata tokkere baali ma? Toy a siwtinta ɗi caka naaŋge boo? Ngam taa mi laato bana debbo nootoowo haa kommbi tokke ngorgiraaɓe ma.

⁸To a anndaa nokkuure man sam, an boo, an mo ɓuri rewɓe fuu wooɗugo, nden kam tokka batte dammooji non, mbe'oy maaɗa ndehoy, a yahra koy durugo ton, haa nokkuure waynaaɓe fuu njooɗoto.

⁹Bee puccu ndewu haa moota Firawna, bana nii nanndinmaami, giɗaaɗo am.

¹⁰Gole maaɗa ɗe mbooɗi bee yeri ma, non boo daande ma caka koɗoy ma.

¹¹Sey min mbaɗane koɗel kaŋŋeeri boo, bee jaagnorɗe cardiije ngel jaagnoro.

¹²Yaake laamiiɗo am ɗon nyaama, nardi[1] am waɗan uureeŋgol boo.

¹³Bana hafre baɗaadi, non giɗaaɗo am, hafre maajum ɗon waali caka enɗi am.

¹⁴Kaŋko laati bana wukkuru pinndi nalleehi nder gese inabooje haa En-Gedi.

¹⁵An a ŋarniiɗo masin, an giɗaaɗo am, a ŋarniiɗo masin! gite maaɗa ɗon mbooɗi bana pooli.

¹⁶An a ŋarniiɗo, a belɗo, an giɗaaɗo am, haako hecco tan laato be'itte men.

¹⁷Leɗɗe cemmbiɗɗe ngoni kaataakooje cuuɗi men, leɗɗe booɗɗe cuddi mahi men.