Read Fulfulde Esaaya 18 Bible Online

Esaaya 18 - Fulfulde bible

Esaaya 18

¹Kayto! Lesdi hoolo bileeji[16], lesdi gaɗa maaje Etiyopiya,

²nelanndi nelaaɓe dow mbeela nder koommbooje kuuwraaɗe kewe. Onon nelaaɓe yaawɗotooɓe, koote haa ummaatoore yimɓe juutɓe, ɓorowɓe, yimɓe huleteeɓe koo toy, marɓe semmbe, jaalotooɓe woɗɓe, ɓe maaje ceeki lesdi muuɗum'en.

³Onon yimɓe duniyaaru fuu, onon wonɓe dow lesdi, to ɓe ndarni tuutawal dow kooseeje, on ndaaran. To ɓe puufi luwal konu, on nanan.

⁴Ngam ndaa nii Jawmiraawo wi'i yam: “Mi ɗon jooɗi haa nokkuure am, mi ɗon laara mi de'itɗo bana nguli mbelndi haa jayŋgol naaŋge, bana saawawre nder nguleeŋga ƴaamnde.”

⁵Ngam hiddeko ɓe itta inabooje, to pinndi saami, rimi ɓiɓɓe ɓenndanɗe, Jawmiraawo halkan ɓe bana goɗɗo ta'irta lice kese e lice bilitanɗe.

⁶O accan ɓalli maɓɓe ngam jigaaje kooseeje e dabbaaji ladde. Ton jigaaje e dabbaaji ladde boo keɓoyta nyaamdu wakkati fuu.

⁷Wakkati man, yimɓe juutɓe ɓorowɓe, huleteeɓe koo toy, marɓe semmbe, jaalotooɓe woɗɓe, jooɗiiɓe lesdi ceekaandi bee maaje, yimɓe ɓe'e ngaddanan Jawmiraawo honooɓe asama dokke haa hooseere Siyona, nokkuure innde maako.