Read Fulfulde Esaaya 2 Bible Online

Esaaya 2 - Fulfulde bible

Esaaya 2

¹Ndaa wolde nde Esaaya ɓii Amoosa heɓi nder wahayu dow Yahuuda e Urusaliima:

²Haa nyalɗe ragareeje, Jawmiraawo tabitinan hooseere haykaliiru mum, nde towtan dow geereeje kooseeje, nde ɓaŋgoto dow towndiije. Nden jama'aaje fuu tokkoto wargo haa maare.

³Ummaatooje ɗuuɗɗe njahan ton, mbi'an: “Ngare, mba'ooɗen dow hooseere Jawmiraawo, haa haykaliiru Allah Yaakubu ngam o ekkitina en laabi maako, enen boo en tokko ɗi.” Ngam haa Siyona tawreeta iwi, wolde Jawmiraawo boo haa Urusaliima.

⁴O laatoto kiitoowo hakkunde ummaatooje, non boo caka le'i ɗuuɗɗi. Bee kaafaaje maɓɓe ɓe tappiran baaneeje, bee labbe maɓɓe boo bafɗi. Walaa ummaatoore meetata ɓaŋgtugo kaafahi dow ummaatoore woɗnde, ɓe meetataa ekkitaago haɓre.

⁵Yimɓe Yaakubu, ngare, njahdenma nder annoora Jawmiraawo!

⁶Yaa Allah, a wudini yimɓe ummaatoore ma, danygol Yaakubu, ngam ɓe keewi al'aadaaji lesdi fuunaaŋge, ɓe waɗooɓe hiila bana Filisti'en, ɓe alkotiri bee yimɓe jananɓe.

⁷Lesdi maɓɓe heewi cardi e kaŋŋeeri, ndesaaje maɓɓe ngalaa keerol. Lesdi maɓɓe heewi pucci, mootaaji maɓɓe ngalaa limgal.

⁸Lesdi maɓɓe heewi labbi, ɓe ɗon cujidana kuugal juuɗe maɓɓe, ko kooli maɓɓe mbaɗi.

⁹Neɗɗo turake, koo moy leesni hoore mum, ammaa taa yaafana ɓe.

¹⁰Naste nder tapaaje, nyukke nder mbulwuldi ngam daaytaago kultoreeŋgol Jawmiraawo e ɗelko maŋngu maako!

¹¹Nyalaade man mawnitiiɗo leestan, jurotooɗo turoto. Ammaa Jawmiraawo ɓaŋgoto, kaŋko feere maako.

¹²Ɗum nyalaade Jawmiraawo honooɓe asama, o leestinan mawnitiiɗum e towɗum e ɓaŋgiiɗum fuu.

¹³O halkan leɗɗe Libanon fuu, cemmbiɗɗe e towɗe masin non boo leɗɗe Baasan mawɗe fuu.

¹⁴O leestinan kooseeje e towndiije towɗe fuu.

¹⁵O yibbinan cuuɗi towɗi fuu e mahi cemmbiɗɗi fuu.

¹⁶Non boo koommbooje Tarsis fuu e koommbooje ɓurɗe wooɗugo fuu.

¹⁷Mawnitiiɗo leestinteeɗo, jurotooɗo turoto. Ammaa nder nyalaade man, Jawmiraawo ɓaŋgoto, kaŋko feere maako.

¹⁸Labbi kalkidan fuu.

¹⁹Yimɓe nastan nder lowi tapaaje e gasɗe nder mbulwuldi ngam daaytaago bee kultoreeŋgol Jawmiraawo e ɗelko maŋngu maako, to o ummake ngam hulnugo duniyaaru.

²⁰Nyalaade man yimɓe koo'an labbi muuɗum'en ɗi cardi e kaŋŋeeri, ɗi ɓe mbaɗino ngam sujidango ɗi, ɓe cakkina ɗi caka doombi e bilwili.

²¹Nden ɓe nastan nder gaaruuji tapaaje e ceekli kooseeje ngam daaytaago kultoreeŋgol Jawmiraawo e ɗelko maŋngu maako, to o ummake ngam hulnugo duniyaaru.

²²Acce hoolaago neɗɗo mo woodi foofaaŋgo tan. Ɗume o nafata?