Read Fulfulde Esaaya 23 Bible Online

Esaaya 23 - Fulfulde bible

Esaaya 23

¹Ndaa koŋngol dow Tirus: “Mboye, koommbooje Tarsis, ngam jipporde mon Tirus wili bee cuuɗi e nastirɗe maare fuu!” Ɓe nani habaru man yaake ɓe ngarti duunde Kitti'en.

²Njeeɗe daliila kulol, onon jooɗiiɓe haa fomoonde mbeela, filooɓe Sidon! On neli nelaaɓe, ɓe ta'i mbeela,

³ɓe ngaddi ƴaamle gese diga maayo Sihor e maayo Niil, kanjum riskini Sidon!

⁴Semtu, an Sidon! Ngam mbeela wi'i: “Mi luuwaaka, mi ɓesnaay, mi mawninaay koo suka'en malla faanyɓe rewɓe.”

⁵To habaru do'ere Tirus yottake Misra, ɓe ndiwnan.

⁶Njehe haa Tarsis. Mboye, onon jooɗiiɓe haa fomoonde mbeela!

⁷Na ɗum berniwol mon ceyiiŋgol? Ngol fuɗɗi diga zamanuuji ɓooymaaji! Ngol neli yimɓe jooɗoyaago haa lesɗe daayiiɗe!

⁸Moy nufani ɗum Tirus, berniwol cenndanŋgol meetaleeji? Filooɓe maagol ɓe laamiiɓe, soorrooɓe maagol ɓe tedduɓe haa duniyaaru fuu.

⁹Jawmiraawo honooɓe asama nufi ɗum haa o wila ngol daliila mawnitaare marɓe daraja fuu, o yawna tedduɓe duniyaaru fuu.

¹⁰Ndeme lesdi mon, bana lesdi kommbi maayo Niil, onon yimɓe Tarsis, ngam nokkuure darnugo koommbooje woodaa fahin.

¹¹Jawmiraawo forti juŋngo muuɗum dow mbeela. O dimmbini laamuuji. O umri gibbinki berniiji Kanaana cemmbiɗɗi.

¹²O wi'i: “A meetataa welweltugo, an berniwol Sidon toskaaŋgol. Umma, yah haa Kitti'en, ton boo a heɓataa siwtaare!”

¹³Ndaare Kaldiya'en! Lenyol maɓɓe woodaa. Assuura'en acci lesdi man haa dabbaaji ladde. Ɓe ndarni cuuɗi towɗi ngam hippugo, ɓe ngibbini laamorɗe Tirus, ɓe ngartiri ɗe bille.

¹⁴Mboye, koommbooje Tarsis, ngam jipporde mon semmbiɗnde nattinaama!

¹⁵Saa'i man yimɓe ngejjitan Tirus duuɓi cappanɗe joweeɗiɗi, bana duuɓi ngeendam laamiiɗo. To duuɓi cappanɗe joweeɗiɗi timmi, ɗum laatanto Tirus bana debbo daakaareejo nder gimol ngo'ol:

¹⁶“Hoo'u moolooru, waancu nder wuro, an daakaareejo gejjitaaɗo! Fiy ɓoggi booɗɗum, ɗuɗɗin gimi ma, haa ɓe ciftore!”

¹⁷To duuɓi cappanɗe joweeɗiɗi timmi, Jawmiraawo lortanto Tirus. Ngol heɓtan ngeenaari daakaareeku maagol, ngol waɗan daakaareeku bee laamuuji gonɗi nder duniyaaru fuu.

¹⁸Ammaa bote e ngeenaari daakaareeku maagol laatanto Jawmiraawo. Ɗum mooɓtataake, ɗum sigataake, ammaa ɗum laatanto jooɗiiɓe yeeso Jawmiraawo, haa ɓe nyaama, ɓe kaara, ɓe ɓorno limce jaage.