Read Fulfulde Esaaya 27 Bible Online

Esaaya 27 - Fulfulde bible

Esaaya 27

¹Nyalaade man Jawmiraawo losan kaafahi muuɗum caatuki, makki cemmbiɗki. O hiitoto Lewiyatan, mboodi ndoggoori[25] e Lewiyatan, mboodi leliindi[26]. O mbaran kuuŋga ngonŋga nder mbeela[27].

²Nyalaade man, on ngimanan ngesa inabooje booɗɗe:

³“Min Jawmiraawo mi ɗon ayna ka, mi ɗon yarna ka wakkati fuu. Mi ɗon ayna ka jemma e naaŋge, ngam taa goɗɗo wonna ka.

⁴Mi acci tikkango ka. To mi tawi gi'e e giŋngille, mi honan ɗe, mi wulan ɗe fuu.

⁵Ammaa to goɗɗo yiɗi mi ayna ɗum, sey o sulhotira bee am. Nonnon sey o sulhotira bee am.”

⁶Saa'i waran nde yimɓe Isra'iila, danygol Yaakubu, mbaɗan ɗaɗi, puɗan, mbilitan, pinnan bana lekki, kebbinan duniyaaru bee ɓiɓɓe.

⁷Allah fiyaay ɓe naawɗum bana o fiyiri fiyooɓe ɓe. O mbaraay ɓe bana o mbardiri mbarooɓe ɓe.

⁸Jawmiraawo riiwi ɓe, dahi ɓe, non o hiitori ɓe. O riiwi ɓe bee henndu fuunaaŋge saatundu[28].

⁹Ndaa nii yaafuye hakkeeji danygol Yaakubu heɓrete e ndaa nafuuda maare boo: Ɓe naman kaa'e kirsirɗe fuu bana ɓe namirta kaa'e daneeje, ɓe ittan daŋraŋge Asera e gulduɗe uurle fuu, ɗe meetataa darneego.

¹⁰Walaa koo gooto haa berniwol cemmbiɗŋgol. Ngol laati jooɗorde accaande, ferewnde bana ladde hamaadaare. Ga'i ɗon ndura ton, ɗi ɗon mbaalo ton, ɗi ɗon nyaama huɗo wonko ton.

¹¹To lice leɗɗe njoori, ngewi, rewɓe ngaran, njamnan ɗe. Ngam ummaatoore nde'e nde walaa faamu. Ngam maajum tagɗo nde yurmintaa nde, baɗɗo nde hinnataako nde.

¹²Nyalaade man Jawmiraawo sorɓan yimɓe muuɗum bana alkamaari, diga fomoonde Efratis haa yotto maayel Misra. Onon Isra'iila'en, on mooɓteteeɓe gooto gooto bana cammeeje.

¹³Nyalaade man goɗɗo fuufan luwal maŋngal. Majjuɓe haa lesdi Assuura e riiwaaɓe haa lesdi Misra, ɓe fuu ɓe ngaran sujidango Jawmiraawo dow hooseere seniinde haa Urusaliima.