Read Fulfulde Esaaya 28 Bible Online

Esaaya 28 - Fulfulde bible

Esaaya 28

¹[29] Kayto laamorde Efrayim! A laatake meetaleewol pawnaaŋgol gonŋgol dow waadiwol cemmbiɗŋgol. Wuykooɓe lesdi ma ɗon mantoro ma. Ammaa a nanndi bee pinndi ɗaylundi ngonndi dow ko'e wuykuɓe ɓe njaram do'i.

²Jawmiraawo woodi goɗɗo cemmbiɗɗo, baawɗo, taaskaniiɗo haɓre. O waran bee semmbe bana mallimallooje, bana naargewol bonnoowol, bana ndiyamji mawɗi teeliiɗi[30], haa o nyaama lesdi bee caatal.

³Ɓe njaaɓan berniwol nannduŋgol bee meetaleewol, ngol wuykooɓe mantori.

⁴Ɓe njaaɓan boo pinndi ɗaylundi pawnandi berniwol Samariya gonŋgol dow waadiwol cemmbiɗŋgol. Samariya laatoto bana ibbe aartuɗe ɓenndugo: To goɗɗo yi'i ɗe, jonta nii o teɓan ɗe, o nyaaman ɗe.

⁵Nyalaade man Jawmiraawo honooɓe asama laatanto yimɓe ummaatoore mum luttuɓe bana meetaleewol pawnaaŋgol,

⁶o hokkan jooɗiiɗo dow leeso kiita ruuhu gooŋga, o semmbiɗinan riiwanɓe konne'en haa dammuɗe berniwol.

⁷Ammaa koo liman'en e annabi'en boo ɗon cakli daliila inaboojam, ɓe ɗon liillilta daliila nguykinoojam. Inaboojam jaali ɓe, ɓe ɗon liillilta, ɓe paamataa wahayuuji ɗi Allah yi'nata ɓe, ɓe mbaawataa ta'ugo kiita ngam daliila wuykere.

⁸Taabe haa ɓe njari fuu keewi tuure e tuundi haa babal luttaay.

⁹Ɓe ɗon mbolwa dow Jawmiraawo: “Moy o yiɗi ekkitingo faamu? Moy o yiɗi faamtingo habaru? Haa ɓikkoy entaakoy jonta na?

¹⁰Woodi dooka dow dooka, dooka dow dooka, haala dow haala, haala dow haala, ɗo seɗɗa to seɗɗa.”[31]

¹¹Nonnon nii! Bee kunnduɗe ɗe ɓe paamataa, bee ɗemŋgal janannal, Jawmiraawo wolwanan yimɓe ummaatoore nde'e,

¹²kaŋko wi'no ɓe: “Ndaa siwtaare, acce comɗo siwto, ndaa fooftere.” Ammaa ɓe cali nanugo.

¹³Wolde Jawmiraawo laatanto ɓe dooka dow dooka, dooka dow dooka, haala dow haala, haala dow haala, ɗo seɗɗa to seɗɗa, haa ɓe njaha, ɓe ndo'oro ɓaawo ɓaawo, ɓe name, ɓe nasta tuuforgol, ngol naŋnga ɓe.

¹⁴Ngam maajum, onon jancooɓe, laamaniiɓe yimɓe Urusaliima, nane wolde Jawmiraawo.

¹⁵On mbi'i: “Min kaɓɓi alkawal bee waade, min alkotiri bee joonde maayɓe. To masiibo nattinoowo ɗon saalo, o heɓataa min, ngam min mbaɗi fewre hisrude amin, min mbiirnake nder fewjere.”

¹⁶Ngam maajum Allah Jawmiraawo wi'i: “Ndaa, mi ɗon wallina caɓɓawal dow Siyona. Nder maagal mi ɗon jo'ina hayre tabitinaande, hayre talkumoore, marnde saman, jo'inaande booɗɗum: Kooliiɗo nde fuu tabitan!

¹⁷Kiita ngooŋɗuka laatanto yam bana ɓoggol mahoowo e gooŋgaaku boo bana njamndi mahoowo poondirndi. Mallimallooje kalkan hisrude fewre, ndiyamji boo ilnan biirnol fewjere.

¹⁸Alkawal mooɗon bee waade fiistete! Kaɓɓotiral mooɗon bee joonde maayɓe tabitittaa. To masiibo nattinoowo ɗon saalo, o naman on.

¹⁹Nde o saaloto fuu, o naŋngan on ngam o saaloto nde weeti fuu, jemma bee naaŋge. Nanugo habaru maako nastinan yimɓe nder kultoreeŋgol.

²⁰Ɗum laatanto on bana nder balndol: Leeso rammi ngam naaɗaago, suddaare famɗi ngam suddoraago.”

²¹Jawmiraawo ummoto bana haa hooseere Perasiima, o tikkan bana nder waadiwol Gibiyon, haa o huuwa kuugal maako, kuugal maako laatiiŋgal kayɗiniiŋgal!

²²Ngam maajum taa njale dow bolle am, ngam taa kaɓɓorli mon ɓesda saatugo. Ngam Allah, Jawmiraawo honooɓe asama anndini yam, o annini nattingo duniyaaru fuu.

²³Nane ko mbi'anmi, keɗite bolle am!

²⁴Naa demoowo giɗɗo aawugo ɗon rema tum tum na? O ɗon rema, o ɗon waɗa diŋiiji, naa o ɗon mo'ina ngesa maako tum na?

²⁵Na to o wo'ini pellel man, o aawan haako anisa e haako algaru[32], o saakan alkamaari e sa'iiruuri dow tayre ngesa maaji e irin alkamaari ngoɗndi haa sera maaka.

²⁶Bana nii Allah maako ekkitini mo laawol man, faamtini mo kuugal man.

²⁷O sorɓataa haako anisa bee corɓirɗum tedduɗum, o tallataa kosŋgal moota ga'i dow haako algaru. Ammaa o sorɓan anisa bee sawru e algaru bee cawel.

²⁸Haa goɗɗo tamsa tamseere, sey o nama alkamaari. O fiyataa ndi tum tum. To o saalini kosŋgal moota maako malla pucci maako dow maari, o namataa ndi.

²⁹Kanjum boo ɗum iwi haa Jawmiraawo honooɓe asama, sawariiji maako ɗi kaayeefiiji, anndal maako ɗuuɗŋgal.