Read Fulfulde Esaaya 29 Bible Online

Esaaya 29 - Fulfulde bible

Esaaya 29

¹Kayto Ariyel! berniwol Urusaliima, haa Daawuda saŋngini. Ɓesde hitaande haa hitaande, bee tokkindirki juulde maare!

²Nden kam min Allah mi wilan Ariyel. Uumaali e gookaali mbaɗan, berniwol man laatanto yam bana Ariyel, waato caɓɓawal hirsirde.

³Mi taarnete bee saŋngeere, mi hippoto ma diga suudu aynirdu am, mi darnan kuuje kipporɗe dow ma.

⁴A leestan, a wolwan nder mbulwuldi haa les, bolle ma ngurtoto nder lesdi bana sawtu ginnawol, ɗe ngurtoto bana cofndaaki nder mbulwuldi.

⁵Ammaa mooɓre konne'en ma laatoto bana kuroori ɗiggundi, mooɓre toonyooɓe laatoto bana nyaande saŋkitaande. Bee juhuki ɗum laatorto, nder ma'annde yiitere.

⁶Jawmiraawo honooɓe asama jinjete bee riggaaŋgo e dimmbaaki lesdi e hoolo maŋngo, bee duluuru e henndu saatundu e ɗemŋgal yiite wulanŋge.

⁷Mooɓre jama'aaje ummaatooje hippiiɓe ma, darnuɓe kuuje kipporɗe muuɗum'en fuu e honanɓe ma majjan bana koyɗol, bana wahayu jemma.

⁸Bana to dolɗo hoyɗi o ɗon nyaama, nde o fini boo, o tawa walaa ko o nyaami. Malla bana to ɗomɗuɗo hoyɗi o ɗon yara, nde o fini boo, o tampuɗo, o ɗomɗuɗo. Bana non mooɓre ummaatooje konanɗe hooseere Siyona laatorto.

⁹Kayɗine! Maɓɓe gite mon haa on mbuma fakat! Ɓe nguyki, ammaa naa bee inaboojam. Ɓe ɗon liillilta ammaa naa bee nguykinoojam.

¹⁰Ngam Jawmiraawo waanji ruuhu ɗoyŋgol tedduŋgol dow mooɗon. O maɓɓi gite mon, waato annabi'en, o suddi ko'e mon, waato yi'ooɓe.

¹¹Wahayu fuu suuɗani on bana bolle deftere maɓɓaande kab nde ɓe ndokki goɗɗo annduɗo jaŋngugo bee wi'ugo mo: “Jaŋngu ɗu'um ɗo, useni”, kaŋko o wi'a: “Mi waawataa, ngam nde maɓɓaama kap.”

¹²Malla ɓe ndokki nde goɗɗo mo anndaa jaŋngugo bee wi'ugo mo: “Jaŋngu ɗu'um ɗo”, kaŋko o wi'a: “Mi anndaa jaŋngugo.”

¹³Jawmiraawo wi'i: “Yimɓe ummaatoore nde'e ɗon ɓadito yam bee hunnduko tan, ɓe ɗon teddinammi bee bolle meere, ammaa ɓerɗe maɓɓe ndaaytake yam. Ɓe ɗon kulammi fodde umrooje ɗe yimɓe ekkitini ɓe.

¹⁴Ngam man mi tokkoto hayɗingo yimɓe ummaatoore nde'e bee waɗango ɓe kuuje kayɗiniiɗe ɗuuɗɗe. Nden kam hikma hikma'en maɓɓe halkan, faamu marɓe faamu maɓɓe boo majjan.”

¹⁵Bone laatanto nyukkotooɓe yeeso Jawmiraawo ngam suuɗugo nufayeeje muuɗum'en, huuwooɓe kuuɗe muuɗum'en haa nyiɓre, wi'ooɓe: “Moy yi'ata min, moy anndi min?”

¹⁶Kayya, on wonniiɓe! Mahoowo payanɗe e loope ɗum gootum na? Huunde tafaande wi'an tafɗo ɗum: “A tafaay yam?” Malla tagdi wi'an tagɗo ɗum: “A walaa hakkiilo na?”

¹⁷Lutti seɗɗa, hooseere Libanon sookre wartan ciraka, ciraka boo laatoto bana laynde.

¹⁸Nyalaade maajum, fahɓe nanan bolle deftere, wumɓe ngurtoto nyiɓre e jemma, ɓe mbumtan.

¹⁹Yaŋkiniiɓe ceyorto Jawmiraawo bee seyo fantuŋgo, talaka'en caka yimɓe mbelmbeltan daliila Allah Ceniiɗo Isra'iila.

²⁰Ngam toonyooɓe e jancooɓe majjan, taaskinooɓe waɗugo halleende fuu nattan,

²¹non boo aybinanɓe woɗɓe yeeso kiita e tuufnananɓe kiitoowo tuuforli e sottinanɓe gooŋga gooŋga'en.

²²Ngam maajum, ndaa nii Jawmiraawo kisnuɗo Ibrahiima wi'i danygol Yaakubu: “Yeeso ɗo, yimɓe saare Yaakubu cemtintaake, geese maɓɓe purɗataa fahin.

²³To ɓikkoy maɓɓe ngi'i kuugal juuɗe am caka maɓɓe, nden kam ɓe annditan min woni Allah Ceniiɗo mo Yaakubu, ɓe kulan Allah Isra'iila.

²⁴Ellitiiɓe keɓan hakkiilo, ngurŋgurtooɓe njaɓan ekkitinol.”