Read Fulfulde Esaaya 3 Bible Online

Esaaya 3 - Fulfulde bible

Esaaya 3

¹Ndaa, Allah Jawmiraawo honooɓe asama ittan ballal koo ngale nder Urusaliima e Yahuuda, o ittan nyaamdu e ndiyam fuu.

²Non boo cemmbiɗɗo e konoowo, kiitoowo e annabiijo, baɗoowo hatti e ndottiijo,

³hooreejo dow yimɓe cappanɗe njowo e tedduɗo, carwoowo, hiilaajo goniijo e buudeejo mawɗo.

⁴Mi jo'inan derke'en ardiiɓe maɓɓe, ɓikkoy laamanto ɓe.

⁵Caka ummaatoore, yimɓe ɓillotiran, koo moy fuu ɓillan keeddiɗɗum. Suka ummanto ndottiijo, leesɗo boo ummanto tedduɗo.

⁶Goɗɗo naŋngan deerɗum nder saare baaba mum, wi'an ɗum: “A mari alkibbaare, laata ardiiɗo amin, a mara bille ɗe'e!”

⁷Nyalaade man kaŋko o jaaboto: “Naa mi kurgoowo. Nder saare am walaa nyaamdu, walaa alkibbaare. Taa ndokkeeɗam laamu dow ummaatoore.”

⁸Fakat Urusaliima yani, Yahuuda do'ake. Ɓe ɗon ndartano Jawmiraawo bee bolle e kuuɗe maɓɓe, ɓe tuurtani tedduŋgal maako.

⁹Ƴaggaare maɓɓe ɗon aybina ɓe. Ɓe ɗon mbaŋgina hakke maɓɓe bana yimɓe Sodoma, ɓe nyukkataa ɗum. Kayto! Ɓe ɗon taaskitina sarru ko'e maɓɓe.

¹⁰Mbi'e adili'en keɓan hayru, ngam ɓe naftoran nafuuda kuuɗe maɓɓe.

¹¹Bone laatanto kalluɗo! O yaran bone, ngam kuugal juuɗe maako loroto dow hoore maako.

¹²Toonyotooɓe ummaatoore am ɗum ɓikkoy, rewɓe ɗon laamano nde. Yimɓe ummaatoore am, ɗowooɓe mooɗon ɗon majjina on, ɓe mbonni laawol ngol tokkiiɗon.

¹³Jawmiraawo ummi ngam wullaago, o ɗon dari ngam hiitaago ummaatooje.

¹⁴Jawmiraawo hiitoto ndotti'en e ardiiɓe ummaatoore muuɗum, o wulloto ɓe bee wi'ugo: “On nyaami ngesa inabooje[3]. Ci'e mooɗon ɗon keewi ko njaɓtuɗon haa laafuɓe.

¹⁵Koni njaaɓoton ummaatoore am? Koni namoton geese talaka'en?” Nii Jawmiraawo Allah, honooɓe asama wi'i.

¹⁶Jawmiraawo wi'i: “Rewɓe Urusaliima mawniti, nder yahdu maɓɓe ɓe ɗon naɗɗina daande, ɓe ɗon cakkina gite, ɓe ɗon ndajja bee waɗugo hoolo bee jawe kosɗe maɓɓe.

¹⁷Ngam maajum mi felliɗinan ɓe, mi ittan gaasa dow tiiɗe maɓɓe.”

¹⁸Nyalaade man, Jawmiraawo ittan pawne fuu: Jawe kosɗe e sallabiije e suuraahoy lewru,

¹⁹palamje e seemdeeje e cuddaaje,

²⁰mojaaje e pegge e taadorli e paali uurdi e layaaji,

²¹kalagaaje kooli e kalagaaje kine,

²²jaage e gude e marabbaaje e boorooji,

²³daarorɗe e limce ɗigguɗe e meetali e cuumli.

²⁴Haa pellel uurdi kacceeŋga laatoto, haa pellel taadorgol, ɗum ɓoggol, haa pellel moorgol, ɗum fellere, haa pellel limce ɗigguɗe, ɗum limce buhuuje, haa pellel ŋarol boo, ɗum ɓattarre njeyaaŋgu.

²⁵Urusaliima, worɓe ma maayran bee kaafahi, koo semmbiɗɓe maaɗa boo ndo'oto nder haɓre.

²⁶Berniwol Siyona uuman, sunoto. Ngol soonyoto koo ɗume, ngol deppoto haa lesdi.