Read Fulfulde Esaaya 32 Bible Online

Esaaya 32 - Fulfulde bible

Esaaya 32

¹Ndaa, laamiiɗo waŋgan, o laamoto fodde adilaaku, ardiiɓe boo laamoto fodde kiita ngooŋɗuka.

²Koo moy laatoto bana biirnol yeeso henndu, bana suuɗirde yeeso naargewol, bana maaje ndiyam nder nokkuure yoornde, bana ɗowdi tapaare mawnde dow harde.

³Nden kam gite waawɓe yi'ugo maɓɓataako fahin, noppi waawɓe nanugo boo keɗititto.

⁴Ɓerɗe sooya-hakkiilo'en keɓan faamu, ɗemɗe me'ooɓe mbolwan law bee laaɓɗum.

⁵Ɓe ewnataako paataaɗo tedduɗo, ɓe mbi'ataa faasikiijo caahiiɗo.

⁶Ngam paataaɗo ɗon wolwa faataare, ɓernde maako ɗon nufo halleende, haa o huuwa geddal, o wolwa kalluka dow Jawmiraawo, haa o acca dolɗo bee dolo mum, o haɗa ɗomɗuɗo yarugo.

⁷Balmi faasikiijo, ɗi kalluɗi: O ɗon nufo dabareeji ngam halkugo yurumɓe bee pewe, koo to laafuɗo mari gooŋga.

⁸Ammaa tedduɗo ɗon nufo ko mari saman, o daroto dow nufayeeje maako booɗɗe.

⁹[35] Umme, onon rewɓe riskuɓe, nane ko mbi'anmi! Onon ɓiɓɓe rewɓe ɓe ngalaa saklere, keɗite bolle am!

¹⁰Lutti nduuɓu bee balɗe seɗɗa, on ndiwnan, onon rewɓe ɓe ngalaa saklere, ngam ittuki inabooje timmi, teɓol ɓiɓɓe leɗɗe warataa fahin.

¹¹Kultore, onon riskuɓe! Ndiwne, onon sooyɓe saklere! Ɓorte limce mooɗon, temmbiɗe, kadde limce buhuuje!

¹²Mboye, piye biɓɓe mon, ngam daliila gese booɗɗe e inabooje dimooje!

¹³Gi'e e giŋngille njaɓti lesdi yimɓe am. Mboye ngam daliila cuuɗi welwelo nder berniwol ceyiiŋgol.

¹⁴Yimɓe accan laamorde, berniwol keewŋgol hoolo ferwan, towndiire laamorde e suudu aynirdu laatoto lowi haa foroy. Bamɗe ladde ceyoto, tokke nduran ton,

¹⁵haa to Allah waanji Ruuhu mum dow amin, haa to ladde laatake ciraka, ciraka boo laatake bana laynde.

¹⁶Nden kiita ngooŋɗuka tabitan nder ladde, adilaaku boo jooɗoto haa ciraka.

¹⁷Adilaaku waddan salaaman e de'ere e hoolaare ngam foroy.

¹⁸Ummaatoore am jooɗoto haa nokkuure salaaman, nder ci'e[36] tabitɗe, haa pelle de'uɗe ngam siwtaare.

¹⁹Daliila mallimallooje, laynde nattan, berniwol boo yibban.

²⁰Barka laatanto on! On mbaawan aawugo haa ndiyam woni fuu, walaa haaje on toŋga na'i e bamɗe.