Read Fulfulde Esaaya 34 Bible Online

Esaaya 34 - Fulfulde bible

Esaaya 34

¹Ɓadite, onon jama'aaje, haa on nana. Onon ummaatooje, keɗite. Sey duniyaaru e ko woni nder maaru fuu nana, non boo lesdi e ko fuɗata dow maari fuu.

²Ngam Jawmiraawo ɗon tikkana yimɓe ummaatooje e mooɓe konu maaje fuu. O do'ani ɓe kiita nattineego, o hokki ɓe ngam mbareego.

³Ɓe ngudinan mbaraaɓe maɓɓe, nyawmanɗe maɓɓe kaccan, kooseeje ɓolwan ngam ƴiiƴam maɓɓe.

⁴Jayli asamanji campititto. Asamanji taggoto bana deftere taggaande, jayli asamanji caaman bana haako inabohi e ibbi saamirta.

⁵Kaafahi Jawmiraawo ɗon ɓakkori bee ƴiiƴam haa asama. Ki ukkanto Edoom, dow ummaatoore nde mi hiiti kiita nattineego.

⁶Ƴiiƴam ɗon simta diga kaafahi Jawmiraawo, ki ɗon saɓa ɓellere, bee ƴiiƴam boorti e njawɗi, bee ɓellere ɓooƴe boorti. Ngam Jawmiraawo, o waɗan kirsol maŋngol haa berniwol Bosra, o mbaran yimɓe ɗuuɗɓe nder lesdi Edoom.

⁷Yimɓe ndo'odotto bee bani e nga'oy e ga'i kalhali. Ƴiiƴam suddan lesdi maɓɓe, ɓellere suddan mbulwuldi maari.

⁸Ngam ɗum laatani Jawmiraawo nyalaade waataago, hitaande waataago konne'en daliila Siyona.

⁹Maaje Edoom laatoto demmbere ɓaleere, mbulwuldi boo baruudu[38], lesdi man laatoto demmbere ɓaleere jamnaande.

¹⁰Jemma e naaŋge yiite maari nyifataako, cuurɗe maari eeŋgan haa foroy. Ndi laatoto bille diga yidere haa yidere. Goɗɗo saalataako ton, haa abada.

¹¹Duujiire e camnagel maran ndi, ngaasiyoowal e leekuwal njooɗoto ton. Jawmiraawo nattinan lesdi ndi'i, koo ɗume fuu wilan e ndi ferwan.

¹²Mawɓe maari ngonataa ton ngam laamingo laamiiɗo. Laamiiɓe maɓɓe fuu ngoodaa.

¹³Gi'e mawnan nder laamorɗe maari, geene e giŋngille boo nder cuuɗi cemmbiɗɗi. Ndi laatoto jooɗorde cuuli e nokkuure dabbi.

¹⁴Kuuje ladde e pobbi pottotiran ton, jawɗi kawrotiran ton, ginnawol jemmawol wonan, siwtoyto ton.

¹⁵Foosokre boo waɗan waalorde ton, sakkinan geeraaɗe, solƴinan ɗe, mawninan ɓikkoy muuɗum haa ɗowdi mum. Jigaaje mooɓotiran ton, gootal gootal fuu.

¹⁶Mbiɗite deftere Jawmiraawo, njaŋnge! Walaa koo gootel caka kuuje ɗe'e luttata ɓaawo. Ɗe fuu ɗe taweteeɗe ton ngam hunnduko maako umri ɗe, Ruuhu maako mooɓti ɗe fuu.

¹⁷O waɗani ɗe kur'u, juŋngo maako yeɗani ɗe lesdi bee ɓoggol poondirgol. Haa foroy ɗe maran ndi, diga yidere haa yidere ɗe njooɗoto nder maari.