Read Fulfulde Esaaya 38 Bible Online

Esaaya 38 - Fulfulde bible

Esaaya 38

¹Nder wakkati man Hezekiya nyawi haa o ɓadake maayugo. Annabi Esaaya ɓii Amoosa wari laarugo mo, wi'i: “Ndaa nii Jawmiraawo wi'i: Saa'i waɗi, umru saare ma alkawal, ngam a yeeɗataa, a maayan.”

²Nden Hezekiya wayliti gal mahol. O tori Jawmiraawo,

³o wi'i: “Yaa Jawmiraawo, siftor no mi yeeɗiri yeeso maaɗa bee gooŋga e ɓernde woore, no kuuwrumi ko fottani ma.” Hezekiya woyi masin.

⁴Nden Jawmiraawo wolwani Esaaya, wi'i:

⁵“Yah, wi' Hezekiya: Ndaa nii Jawmiraawo Allah kaaka ma Daawuda wi'i: Mi nani tornde ma, mi yi'i gonɗi ma. Ndaa, mi ɓesdante duuɓi sappo e jowi.

⁶Mi hisnete, an bee berniwol ngo'ol diga juŋngo laamiiɗo Assuura. Mi aynan berniwol ngo'ol.

⁷Kanjum laatante alaama diga Jawmiraawo, haa o hebbina koŋngol ngol o wolwi:

⁸Ndaa, mi lornan ɗowdi ɓaawo bee jaaɓruɗe sappo dow jaaɓruɗe Akas saa'i naaŋge ɗon loro ɓaawo.” Naaŋge lorti bee jaaɓruɗe sappo dow jaaɓruɗe haa nge jippino.

⁹Ɓaawo Hezekiya, laamiiɗo Yahuuda yamɗiti e nyawu muuɗum, o winndi bolle ɗe'e:

¹⁰“Mi numi: Haa reeta balɗe am ngonmi, doole mi dilla, mi nasta dammuɗe joonde maayɓe, mi sooya duuɓi am luttuɗi.

¹¹Mi numi mi meetataa yi'ugo Jawmiraawo nder lesdi yeeɗɓe. Mi meetataa laarugo yimɓe caka jooɗiiɓe nder duniyaaru.

¹²Jooɗorde am ittaama, nde yahraama daayiiɗum bana laymaaru waynaaɓe. Mi taggi yoŋki am bana cannyoowo taggirta limce. O ta'i yam e geesewol. Mi numi: Hakkunde nyalawma e jemma o timminan yoŋki am.

¹³Jemma fuu mi wooki, ngam o yewi i'e am fuu bana mbarooga. Mi numi: O timminan yoŋki am law.

¹⁴Mi siiki bana collel zawleeru, mi uumi bana poola. Gite am comi tijjaago dow. Yaa Jawmiraawo, mi ɓilliiɗo, yiidam!

¹⁵Ɗume mi wi'ata mo? Ngam o jaabi yam, kaŋko waɗi ɗum. Mi yeeɗan duuɓi am fuu bee mettamɓeram nder nafsu, mi jaŋkiniiɗo.

¹⁶Jawmiraawo ɗon wondi bee yimɓe muuɗum. Ɓe ngeeɗan e ruuhu maako yeeɗinan ko ɗon nder maɓɓe fuu. A nyawndatam, a yeeɗinan yoŋki am.[41]

¹⁷Ndaa, mettamɓeram sannji warti salaaman. A yiɗi yam, a hisni yam diga ngaska halkere, a sakkini hakkeeji am fuu ɓaawo ma.

¹⁸Ngam joonde maayɓe yettataa ma, waade boo maŋgtataa ma. Nastuɓe nder ngaska tammortaako gooŋgaaku ma.

¹⁹Ammaa geeto yettete, sey geeto tan, sey kaŋko yettete bana am hannde. Baaba anndinan ɓikkoy gooŋgaaku ma.

²⁰Jawmiraawo hisni yam! Sey en ngimana mo bee moolooji ngeendam men fuu nder haykaliiru Jawmiraawo.”

²¹Esaaya wi'i ɓe koo'a tamre ibbe joorɗe, ɓe takka ɗum dow ɓuudi, ngam haa laamiiɗo yamɗita.

²²Ammaa Hezekiya ƴami: “Alaama kaye gooŋɗinta mi heɓan yahugo haa haykaliiru Jawmiraawo?”