Read Fulfulde Esaaya 39 Bible Online

Esaaya 39 - Fulfulde bible

Esaaya 39

¹Saa'i maajum Merodak-Baladan ɓii Baladan, laamiiɗo Baabila neldi bataakewol e dokkal haa Hezekiya. Ngam o nani Hezekiya nyawino, yamɗiti.

²Hezekiya seyori ɗum. O holli nelaaɓe sigordu ndesaaje maako, cardi e kaŋŋeeri e uurle e nebbam caɗɗam, non boo suudu balmi e ko woni nder ndesaaje maako fuu. Walaa ko o suuɗani ɓe nder saare maako e nder maral maako.

³Nden annabi Esaaya wari haa laamiiɗo Hezekiya, ƴami mo: “Ɗume worɓe ɓe'e mbi'i? Diga toy ɓe ngari?” Hezekiya jaabi: “Diga lesdi ndaayiindi ɓe ngari, diga Baabila, ngam laarugo yam.”

⁴O ƴami: “Ɗume ɓe ngi'i nder saare ma?” Hezekiya jaabi: “Ɓe ngi'i koo ɗume ko woni nder saare am fuu. Walaa ko mi suuɗani ɓe nder ndesaaje am.”

⁵Esaaya wi'i Hezekiya: “Nan koŋngol Jawmiraawo honooɓe asama:

⁶Ndaa, nyalɗe ɗon ngara, ɓe njahran haa Baabila ko woni nder saare ma fuu, ɗum ko kaakiraaɓe ma mbaagi haa wargo hannde, walaa ko luttata sam. Non Jawmiraawo wi'i.

⁷Ɓe koo'an woɗɓe nder danygol maaɗa, haa ɓe laato saraaki'en nder laamorde laamiiɗo Baabila.”

⁸Hezekiya wi'i Esaaya: “Koŋngol Jawmiraawo ngol mbolwuɗa, ngol wooɗi.” O wi'i: “Nder balɗe am kam, jam e salaaman ɗon!”