Read Fulfulde Esaaya 40 Bible Online

Esaaya 40 - Fulfulde bible

Esaaya 40

¹“Nde'itine ummaatoore am, nde'itine nde”, non Allah mooɗon wi'i.

²“Mbelne ɓerɗe yimɓe Urusaliima. Anndine ɓe, konu maɓɓe timmi, aybe maɓɓe yaafaama, ɓe keɓi diga juŋngo Allah ngeenaari hakkeeji maɓɓe cowi ɗiɗi.”

³Goɗɗo ɗon hoola nder ladde: “Mo'inane Jawmiraawo laawol, mbaɗane Allah men buuwol darnuŋgol nder ladde hamaadaare.

⁴Waadiwol fuu towta, hooseere e towndiire fuu leesta. Lesdi kooseeje laato yayre, nokkuuje towɗe boo laato waadiwol.

⁵Tedduŋgal Jawmiraawo waŋgan, yimɓe fuu ngi'an ɗum, ngam hunnduko Jawmiraawo wi'i ɗum.”

⁶Goɗɗo wi'i: “Wooynu!” Mi ƴami: “Ɗume mi wooynata?” — “Wooynu: Yimɓe fuu nanndi bee fuɗŋgooji, ɗelko mum fuu bana pinndi ladde.

⁷Fuɗŋgooji njooran, pinndi ɗaylan, to poofɗe Jawmiraawo puufi dow maajum. Fakat yimɓe nanndi bee fuɗŋgooji.

⁸Fuɗŋgooji njooran, pinndi ɗaylan, ammaa wolde Allah meeɗen tabitan haa foroy.”

⁹Wa'a dow hooseere townde, an Siyona, gaazoowo habaru seyo! Townu sawtu ma bee semmbe, an Urusaliima, gaazoowo habaru seyo! Townu sawtu, taa hul! Wi' gure Yahuuda: “Ndaa Allah mooɗon!”

¹⁰Ndaa, Jawmiraawo Allah ɗon wara bee baawɗe. Baawɗe maako ke'i ngam laamaago. Ndaa, ngeenaari maako ɗon wondi bee maako, mbarjaari maako ɗon ardo mo.

¹¹O duran tokkere maako bana gaynaako. O mooɓtan e o hoo'an mbaaloy dow juuɗe maako, o roondoto koy haa wiɓɓere maako. O ɗowan baali musinanɗi bee hakkiilo.

¹²Moy foondi ndiyamji nder newre mum? Moy heerori asamanji bee hapakaare? Moy foondi mbulwuldi duniyaaru fuu bee etirgal? Moy foondi kooseeje dow awnorɗum e towndiije bee taasaaje?

¹³Moy foondi Ruuhu Jawmiraawo, moy woni dawroowo ekkitinɗo mo?

¹⁴Bee moy o waadi sawari haa o heɓa anndal? Moy ekkitini mo kiita ngooŋɗuka? Moy faamtini mo hikma? Moy anndini mo laawol faamu?

¹⁵Ndaa, ummaatooje nanndi bee toɓɓere haa yaasi cafgal, teddeeŋga maaje bana teddeeŋga jaareeŋgel dow awnorɗum, duuɗe boo bana collaayel.

¹⁶Laynde Libanon he'ataa huɓɓugo yiite ngam maako, dabbaaji maare ke'ataa ngam lii'aneego bana guleteeɗi.

¹⁷Ummaatooje fuu laati meere yeeso maako, o ɗon laara ɗe bana meereejum koros.

¹⁸Bee moy nanndinton Allah? Bee suura kaye nanndinton mo?

¹⁹Ɓolinoowo ɓolinan lawru, tappoowo suddan ndu bee kaŋŋeeri, o waɗanan ndu callalluhoy cardi.

²⁰Talakaajo mo waawataa hokkugo irin dokkal nga'al, suɓan leggal ngal nyolataa. Nden o ɗaɓɓitan cehoowo baawɗo, haa o sehana mo lawru ndu dimmbataako.

²¹On anndaa ɗum na? On nanaay ɗum na? Ɓe ngeccaay on ɗum diga fuɗɗam na? On paamaay ɗum diga caɓɓuki duniyaaru na?

²²Kaŋko o ɗon jooɗi haa dow taarde duniyaaru, jooɗiiɓe nder maaru laati bana baɓɓatti. O ɗon we'ita asamanji, o ɗon yaajina ɗi bana suudu laymaaru, haa o wartira ɗi jooɗorde maako.

²³O ɗon laatina laamiiɓe huunde meere, o ɗon laatina hiitooɓe duniyaaru huunde meere.

²⁴Neeɓaay ɓe njube, neeɓaay ɓe aawe, neeɓaay leggal maɓɓe waɗi ɗaɗi nder lesdi, o fuufa dow maɓɓe, ɓe njooran. Henndu saatundu wiftoto ɓe bana nyaande.

²⁵Kadi, bee moy nanndinton Allah Ceniiɗo haa o nannda bee maako?

²⁶Tijje dow, ndaare! Moy tagi koode ɗe ngi'oton? Kaŋko yahrata ɗe fuu bana sooje'en haa konu, o ɗon ewno ɗe fuu innde bee innde. Ngam baawɗe maako mawɗe e semmbe maako ɗuuɗnde, walaa koo woore maaje majji.

²⁷Onon yimɓe Isra'iila, danygol Yaakubu, koni mbi'oton: “Joonde am suuɗanake Jawmiraawo, Allah hakkilantaa gooŋga am!”

²⁸On anndaa ɗum na? On nanaay ɗum na? Jawmiraawo, Allah duumiiɗo tagi keeri duniyaaru. O somataa, o tampataa, hakkiilo maako heɓtataake.

²⁹O ɗon hokka comɗo semmbe, o ɗon ɗuɗɗinana tampuɗo baawɗe.

³⁰Derke'en coman, tampan, suka'en boo ndo'oto do'ere naawnde.

³¹Ammaa hoolotooɓe Jawmiraawo, semmbe muuɗum'en hesɗitan, ɓe piiran bana dute. Ɓe ndoggan, ammaa ɓe tampataa. Ɓe njahan, ammaa ɓe comataa.