Read Fulfulde Esaaya 41 Bible Online

Esaaya 41 - Fulfulde bible

Esaaya 41

¹“Onon duuɗe, njeeɗe haa on nanammi. Sey ummaatooje kesɗitina semmbe muuɗum'en, ɗe ɓadito, ɗe mbolwa. Ɓadotiren haa mbaɗen kiita.

²Moy ummini jaalotooɗo haa fuunaaŋge, hokki mo jaalorgal koo toy o yahata fuu? Moy hokki mo ummaatooje, leestinani mo laamiiɓe? Kaafahi maako ɗon wartira ɗe collaaje, lagaawal maako ɗon wartira ɗe nyaande nde henndu ruuynata.

³O ɗon taasna ɗe, o ɗon saalo jam dow laawol ngol kosɗe maako meeɗaay tokkaago.

⁴Moy waɗi ɗum? Moy waɗi ɗum, sonaa min, ewniiɗo gide yimɓe diga fuɗɗam? Min Jawmiraawo mi arano, mi wonan boo bee ɓaawo'en!

⁵Duuɗe ngi'i ɗum, ɗe kuli. Keeri duniyaaru ndiwni, ɓaditi, ngari.

⁶Yimɓe ɗon mballotira, koo moy ɗon wi'a keeddiɗɗum: Semmbiɗiɗ!

⁷Baɗoowo sanaa'a ɗon semmbiɗina ɓolinoowo, tappoowo kaŋŋeeri ɗon semmbiɗina kilaajo tappoowo dow daada-kilaaru. O ɗon wi'ana takkuki njamndi: Ki wooɗi. Nden o tiggan lawru bee suufuuje ngam taa ndu dimmbo.

⁸Ammaa an, Isra'iila[42], suka am, Yaakubu mo cuɓmi ɗum, danygol soobaajo am Ibrahiima,

⁹mi jogi ma diga keeri duniyaaru, mi ewni ma diga nokkuuje maaru ɓurɗe daayaago, mi wi'i ma: An woni suka am, mi suɓi ma, mi wudinaay ma!

¹⁰Taa hul, ngam mi ɗon wondi bee ma! Taa laar koo toy bee kulol, ngam min woni Allah maaɗa. Mi semmbiɗinte, mi yiidete, mi jogoto ma bee nyaamo am jaalotooŋgo.

¹¹Ndaa, tikkananɓe ma fuu cemtan, toskoto. Jokkiranɓe bee ma laatoto meere, ɓe kalkan.

¹²A ɗaɓɓitan wanyɓe ma, ammaa a tawataa ɓe. Honɓe ma laatoto huunde meere.

¹³Ngam min Jawmiraawo Allah maaɗa mi ɗon jogo nyaamo ma, min bi'ɗo ma: Taa hul, mi yiidete.”

¹⁴Jawmiraawo wi'i: “Taa hul, an ngilŋgel Yaakubu! An peetum Isra'iila, mi yiidete! Min Ceniiɗo Isra'iila, mi coottoowo ma.

¹⁵Ndaa, mi waɗi ma bana corɓirɗum ceeɓɗum, kesum, marɗum nyii'e ɗuuɗɗe. A sorɓan kooseeje, a naman ɗe, a wartiran towndiije bana nyaande.

¹⁶A jaartan ɗe, haa henndu wifa ɗe, henndu saatundu saŋkita ɗe. Ammaa an a seyorto Jawmiraawo, a jurorto Ceniiɗo Isra'iila.

¹⁷Laafuɓe e yurumɓe ɗon ɗaɓɓita ndiyam, ɗam woodaa. Ɗemɗe maɓɓe ɗon njoora ngam ɗomka. Min Jawmiraawo mi jaɓanan ɓe tornde maɓɓe. Min Allah Isra'iila mi accataa ɓe.

¹⁸Mi ɓulnan maaje dow towndiije cooke, ceeɓooje boo caka waadiiji. Mi wartiran ladde weendu ndiyam, lesdi njoorndi boo ceeɓooje ndiyam.

¹⁹Nder harde njo'inanmi leɗɗe cemmbiɗɗe e leɗɗe gaware e asuraaje e jaytunje. Nder ladde njubotoomi leɗɗe booɗɗe e irin leɗɗe booɗɗe mawɗe e pamare

²⁰ngam haa ɓe ngi'a ɓe annda, ɓe ndaara, ɓe paama ɓe fuu, min Jawmiraawo waɗi ɗum, min Allah Ceniiɗo Isra'iila tagi ɗum.”

²¹Jawmiraawo, laamaniiɗo danygol Yaakubu wi'i: “Onon labbi ummaatooje, anndine wullaandu mon, mbaŋgine hujjaaji mon!

²²Mbaŋgine ɗi, anndine min ko tammi laataago! Paamtine min kuuje ɓooymaaje no ɗe mba'i, haa min kakkilana ɗe, min annda no ɗe laatorto. Malla ngecce min kuuje garanɗe.

²³Mbi'e min ko warata ɓaawoɗon, nden min anndan on ɗowanteeɓe. Kadi mbaɗe booɗɗum malla kalluɗum, haa min kayɗina, min kula.

²⁴Ndaa, on laatake huunde meere, kuugal mooɗon boo ɗum meereejum koros. Mo suɓi on, laati nyidduɗo.

²⁵Mi ummini goɗɗo woyla, o wari. Haa fuunaaŋge ewniimi innde maako. O yaaɓan mawɓe bana loope, bana mahoowo payanɗe yaaɓirta loope kecce.

²⁶Moy caka mooɗon anndini ɗum diga fuɗɗam, haa min annda ɗum? Moy wi'i ɗum diga wakkati ɓooyma, haa min mbi'a: Gooŋga! Walaa anndinɗo ɗum, walaa geccuɗo ɗum, walaa nanɗo bolle mon.

²⁷Aartuɗo yottaago haa Siyona wi'i: Ndaa, ndaa ɓe! Mi ɗon hokka Urusaliima gaazoowo habaru seyo.

²⁸Mi ɗon laara ɗowanteeɓe ɓe'e, ammaa mi yi'ataa koo moy. Walaa carwoowo caka maɓɓe. Walaa jaabotooɗo to mi ƴami.

²⁹Ndaa, ɓe fuu maɓɓe ɓe huunde meere. Kuuɗe maɓɓe ɗe meere. Labbi maɓɓe ɗi henndu sookru.”