Read Fulfulde Esaaya 42 Bible Online

Esaaya 42 - Fulfulde bible

Esaaya 42

¹Jawmiraawo wi'i: “Ndaa suka am, mi jogoto mo, o cuɓaaɗo am mo yoŋki am seyorto ɗum. Mi waɗi Ruuhu am dow maako. O waŋginanan ummaatooje kiita ndarnuka.

²O wookataa, o townataa sawtu, walaa nananɗo daande maako haa laabi.

³O yewataa kewal nyobbaaŋgal. O nyifataa pittirlayel cuuraaŋgel. Fakat o tabitinan kiita ngooŋɗuka.

⁴Kaŋko o tampataa, o tiinoto haa to o tabitini kiita ngooŋɗuka nder duniyaaru. Duuɗe ɗon ndeena ekkitinol maako.”

⁵Allah Jawmiraawo mo tagi asamanji, we'iti ɗi, mo waɗi lesdi e fuɗŋgooji maari, mo hokki yimɓe wonɓe dow maari poofɗe e yahooɓe dow maari ruuhu — ndaa nii o wi'i suka maako:

⁶“Min Jawmiraawo mi ewnori ma ngam adilaaku. Mi naŋngan juŋngo ma, mi aynete, bee maaɗa kaɓɓiranmi alkawal bee yimɓe, bee maaɗa ndokkiranmi ummaatooje annoora,

⁷haa mbumtina wumɓe, ngurtina haɓɓaaɓe diga fursina, jooɗiiɓe nder nyiɓre boo diga yaŋgada muuɗum'en.

⁸Min woni Jawmiraawo, kanjum woni innde am. Mi hokkataa ɗowanteeɗo goɗɗo tedduŋgal am, mi senndataa maŋngu am bee labbi.

⁹Kuuje aartanɗe laatake. Jonta kuuje kese anndinanmi. Hiddeko ɗe puɗɗa, ngeccanmi on ɗe.”

¹⁰Ngimane Jawmiraawo yimre hesre, ngime maŋgtoore maako haa keeri duniyaaru, onon yahooɓe dow mbeela e ko hebbini nga, onon duuɗe e jooɗiiɓe ton!

¹¹Sey ladde hamaadaare bee gure gonɗe nder maare towna sawtu, non boo kawyeeji yimɓe Keedar. Sey jooɗiiɓe dow tapaare mbelmbelta, ɓe mbaɗa gookaali seyo dow geereeje kooseeje!

¹²Sey ɓe teddina Jawmiraawo, ɓe anndina maŋgtoore maako haa duuɗe!

¹³Jawmiraawo ɗon wurto bana jaaliiɗo, bana konoowo o ɗon ummina tikkere maako saatunde. O ɗon hoola, o ɗon wooka wookaandu konu. O ɗon jaalo konne'en maako.

¹⁴Allah wi'i: “Duuri mi sirwi, mi jeeɗi, mi naŋgti hoore am. Jonta ngookanmi bana debbo ɓesnanɗo, mi foofan, mi laahan.

¹⁵Mi ferwinan kooseeje e towndiije, mi ɗaylinan haako maaje fuu. Mi wartiran maaje ndiyam lesdi njoorndi, mi ɓeeɓnan beeli.

¹⁶Mi yahran wumɓe dow laawol ngol ɓe anndaa, mi ɗowan ɓe dow laabi ɗi ɓe anndaa. Nyiɓre yeeso maɓɓe, mi wartiran nde jayŋgol, laawol leliiŋgol boo darnuŋgol. Kanjum mbaɗanmi, mi accataa ɗum sam.

¹⁷Hooliiɓe labbi cehaaɗi, ewnotooɓe suuraaji ɓolinaaɗi ɗowanteeɓe muuɗum'en, ɓe loroto ɓaawo, ɓe cemta.”

¹⁸“Nane, onon fahɓe! Onon wumɓe boo, ndaare, ngi'e!

¹⁹Moy woni bumɗo, sonaa suka am? Moy woni paho bana nelaaɗo am mo nelanmi ɗum? Moy woni bumɗo bana ɗakkotirɗo bee am, moy woni paho bana suka Jawmiraawo?

²⁰On ngi'i ɗuuɗɗum, ammaa on kakkilanaay ɗum. Noppi mon maɓɓiti, ammaa on nanaay.”

²¹Ɗum fottani Jawmiraawo o waŋgina maŋngu tawreeta maako, o teddina ka ngam daliila adilaaku maako.

²²Ammaa yimɓe ummaatoore nde'e ɓe jaɓtaaɓe, ɓortaaɓe. Ɓe maɓɓaaɓe nder gasɗe, suuɗiiɓe nder cuuɗi kaɓɓorli. Ɓe laati keɓal konu, walaa kisnanɗo ɓe. Ɓe jaɓtaaɓe, ammaa walaa bi'anɗo: Hokkitam!

²³Moy caka mooɗon nanata kuuje ɗe'e? Moy heɗititto, moy hakkilanta ɗum nder nyalɗe garanɗe?

²⁴Moy hokki Isra'iila, danygol Yaakubu haa juuɗe jaɓtooɓe? Naa ɗum Jawmiraawo mo mbaɗɗen hakke dow muuɗum? Ɓe cali tokkaago laabi maako, ɓe ɗowtanaaki tawreeta maako.

²⁵Ngam maajum o rufi tikkere maako saatunde e o ukki konu caatuŋgu dow maɓɓe. Ɗum ukki dow maɓɓe koo toy fuu bana yiite, ammaa ɓe paamaay. Ɗum wuli ɓe, ammaa ɓerɗe maɓɓe njaɓaay.