Read Fulfulde Esaaya 45 Bible Online

Esaaya 45 - Fulfulde bible

Esaaya 45

¹Ndaa ko Jawmiraawo wi'i Koores laamiiɗo mo o moyti, mo o naŋngi juŋngo mum nyaamo ngam do'ugo ummaatooje yeeso maako, ngam ɓortugo laamiiɓe, ngam maɓɓititgo dammuɗe berniiji yeeso maako, taa pareeje maɓɓe fahin:

²“Min mi ardoto ma, mi leesnan pelle towɗe, mi fusan pareeje njamndi, mi yewan jamɗe palduɗe.

³Mi hokkete ndesaaje sirriije e nyukkiiɗe haa annda min woni Jawmiraawo, min Allah Isra'iila, mi ewni ma bee innde ma.

⁴Mi ewni ma bee innde ma daliila Yaakubu suka am e daliila ummaatoore Isra'iila nde cuɓmi ɗum. Mi hokki ma soomoore teddunde, asee boo a anndaa yam.

⁵Min woni Jawmiraawo, walaa goɗɗo feere sam. Walaa Allah, sonaa min. A anndaa yam, ammaa mi hokki ma baawɗe.

⁶Mi waɗi ɗum haa yimɓe diga fuunaaŋge haa hiirnaaŋge paama, walaa Allah sonaa min. Min woni Jawmiraawo, walaa goɗɗo feere sam!

⁷Mi waɗi annoora, mi tagi nyiɓre boo. Mi waɗi hayru, mi tagi sarru boo. Min Jawmiraawo waɗata kuuje ɗe'e fuu.

⁸Asamanji, toɓne saawawre! Duule acce adilaaku ila! Lesdi maɓɓito, jaɓa ɗum haa ndi fuɗna kisndam e adilaaku! Min Jawmiraawo tagi ɗum fuu.”

⁹Bone laatanto jokkiranɗo bee baɗɗo ɗum, ngam o fayannde caka payanɗe ɗe loope. Fakat, loope kecce potaay wi'ugo mahoowo: Ko mbaɗata? Kuugal maaɗa nafataa sam!

¹⁰Bone laatanto bi'anɗo baaba mum: Koni ndanyata? Malla daada mum: Koni ɓesnata?

¹¹Ndaa nii Jawmiraawo, Ceniiɗo Isra'iila, tagɗo ummaatoore nde'e wi'i: “On ƴamatam haala kuuje garanɗe na? On umratam dow ɓikkoy am e dow ko kuuwanmi na? Kayya!

¹²Min waɗi lesdi, min tagi neɗɗo dow maari. Juuɗe am mbe'iti asamanji, min ɗowata jama'aaje man fuu.

¹³Min ummini Koores nder adilaaku, mi wo'itinan laabi maako fuu. Kaŋko o nyiɓtoto berniwol am, o yooftan yimɓe am dahaaɓe, naa daliila ceede malla caahuuji.” Non Jawmiraawo honooɓe asama wi'i.

¹⁴Ndaa nii Jawmiraawo wi'i: “Risku Misra e bote filu Etiyopiya e Seba'en juuta-darɗe'en ngaran haa mooɗon, laatanto on. Ɓe tokkoto on, ɓe haɓɓaaɓe bee callalluuji, ɓe turoto yeeso mooɗon, ɓe ceedoto: Allah kam haa mooɗon tan woni, walaa ɗowanteeɗo feere.”

¹⁵Fakat a Allah cuuɗiiɗo, Allah Isra'iila, kisnoowo!

¹⁶Sehooɓe labbi fuu cemtan, keewan mbustu e toskaare.

¹⁷Ammaa yimɓe Isra'iila keɓan kisndam nduumiiɗam haa Jawmiraawo. Ɓe cemtataa, ɓe meeɗataa mbustu haa abada abadin!

¹⁸Jawmiraawo tagi asamanji, kaŋko woni Allah. O waɗi lesdi, o tabitini ndi. O tagaay ndi ngam haa ndi ferwa, ammaa ngam yimɓe njooɗo ton. Ndaa nii o wi'i: “Min woni Jawmiraawo, walaa Allah feere sam.

¹⁹Mi wolwaay nder cuuɗiiɗum malla haa nokkuure nyiɓɓunde. Mi wi'aay yimɓe danygol Yaakubu: Ɗaɓɓiteeɗam meere! Ngam min woni Jawmiraawo, bolwanɗo gooŋga. Mi ɗon anndina ko fotti.”

²⁰Mooɓotire, ngare, ɓadite hawtaade, onon luttuɓe ummaatooje! Roondotooɓe lawru muuɗum'en ndu leggal e torotooɓe ɗowanteeɗo mo waawataa hisnugo, ɓe ngalaa anndal.

²¹Ngare, mbaŋgine hujjaaji mon, carwootire hakkunde mooɗon! Moy yecci ɗum diga ɓooyma? Moy anndini ɗum diga naane? Naa min Jawmiraawo na? Walaa Allah, sonaa min. Allah adiliijo, kisnoowo feere woodaa, sey min.

²²“Kadi ngaylite haa am, kise, onon yimɓe haa keeri duniyaaru fuu! Ngam min woni Allah, walaa goɗɗo feere sam.

²³Mi ɗon hunoro hoore am, ko mbi'anmi ɗum gooŋga, ɗum waylataako: Koppi fuu tugganto yam, ɗemɗe fuu kunanto yam.

²⁴Yimɓe ɓe'e mbi'an: Haa Jawmiraawo tan adilaaku e semmbe ngoni. Ammaa wanyɓe yam fuu ngaran yeeso am, ɓe cemtan.

²⁵Min Jawmiraawo mi adilinan danygol Isra'iila fuu, kamɓe boo ɓe mbelmbeltan.”