Read Fulfulde Esaaya 47 Bible Online

Esaaya 47 - Fulfulde bible

Esaaya 47

¹Jawmiraawo wi'i: “An Baabila, jippa leeso laamu ma, jooɗa nder mbulwuldi lesdi. Naane a nanndi bee paanyo debbo, a berniwol Kaldiya'en. Ammaa a meetataa ewneego neeminiiɗo, ɗelemɗo.

²Hoo'u namarde, namu! Sudditit yeeso ma, ɓaŋgtu limce ma, sudditit kosɗe ma, eera maaje!

³Temmbuki ma waŋga, koo moy yi'a toskaare ma. Mi waatoto, walaa mo haɗatammi!”

⁴Non coottoowo amin wi'i. Innde maako Jawmiraawo honooɓe asama, Ceniiɗo Isra'iila.

⁵Jooɗa siriw, nastu nder nyiɓre, berniwol Kaldiya'en! A meetataa ewneego jawmu laamuuji.

⁶Mi tikkanino ummaatoore am, mi soɓnuno maral am, mi hokkuno ɓe haa juŋngo ma. A yurminaay ɓe, a yowani koo nayeejo boo kaɓɓirgal tedduŋgal.

⁷A ɗonno wi'a: Mi laamoto haa foroy. A hakkilanaay kuuje ɗe'e, a numaay dow ko tammi laataago.

⁸Jonta kam, nan ɗu'um, an cuunaaɗo neeminaare, jooɗiiɗo nder de'ere, an bi'anɗo nder ɓernde ma: Sey min, walaa goɗɗo sam! Mi meeɗataa laataago debbo jurumɗo, mi sooyataa ɓikkoy.

⁹Ammaa kuuje ɗiɗi ɗe'e: Sooynde gorko e sooynde ɓikkoy ngaran dow ma nder saa'iire woore, nder nyalaade woore. Ɗe ngaran dow ma bee semmbe maaje fuu koo to hiilaaji ma ɗuuɗi, koo to moccooje ma ɗuuɗi masin.

¹⁰A ɗonno hoolo halleende ma. A wi'i: Walaa mo yi'atammi. Hikma ma e anndal ma majjini ma. A wi'i nder ɓernde ma: Sey min, walaa goɗɗo sam!

¹¹Sarru waran dow ma, a waawataa daaynugo ngu bee hiila. Masiibo ukkanto ma, a waawataa daɗugo mo. Bilaa anndaaŋgal ma, halkere waran dow ma bee juhuki.

¹²“Kadi, dara dow sirriiji ma, bee hiilaaji ma ɗuuɗɗi ɗi kuuwɗa bee tiɗɗinaare diga nderkaaku ma. Teema ɗi nafete, teema a hulnan konne'en!

¹³A somi ngam sawariiji ɗi keɓɗa fuu. Sey annduɓe haala koode asama, yeccooɓe ko heɓete nde lewru dari fuu ndaro, ɓe kisne.

¹⁴Ndaa, ɓe laati bana geene joorɗe, yiite nyaaman ɓe. Ɓe ndaɗataa ɗemŋgal yiite. Naa ɗum ƴulɓe ngam sa'ugo tamseeje malla boo ngam aytinaago.

¹⁵Hiila'en ɓe comnuɗa hoore ma daliila muuɗum'en laatoto bana non. A tiini sarwaago ɓe diga nderkaaku ma. Jonta boo koo moy ɗon tiito yeeso muuɗum, walaa mo waawata hisnugo ma.”