Read Fulfulde Esaaya 48 Bible Online

Esaaya 48 - Fulfulde bible

Esaaya 48

¹Nane ɗu'um, onon yimɓe Yaakubu, ewnaaɓe bee innde Isra'iila, onon danygol Yahuuda: On ɗon kunoro bee innde Jawmiraawo, on ɗon ewno Allah Isra'iila, ammaa naa bee gooŋgaaku e adilaaku.

²On ɗon ewno ko'e mon bee innde berniwol ceniiŋgol, on ɗon tuugo dow Allah Isra'iila mo innde mum Jawmiraawo honooɓe asama.

³Diga ɓooyma mi wooyni, mi anndini kuuje aartuɗe laataago. Nden mi waɗi ɗum, ɗum laati bee juhuki.

⁴Mi anndi ko'e mon caati bana njamndi, bana njamndi mboɗeeri.

⁵Ngam maajum anndinmi on ɗum diga ɓooyma, hiddeko ɗum laato. Mi yecci on ɗum, ngam taa on mbi'a: Lawru amin waɗi ɗum. Suura amin cehaaŋga e suura amin ɓolinaaŋga umri ɗum.

⁶On nani ɗum, on ndaari ɗum fuu! Onon boo on anndintaa ɗum na? “Diga jonta ngeccanmi on kuuje kese, kuuje cuuɗiiɗe ɗe on anndaa.

⁷Jonta ɗe tagaama, naa ɓooyma. Haa wargo hannde on meeɗaayno nanugo haala maaje, ngam taa on mbi'a: Min anndi ɗe!

⁸On meeɗaay nanugo koo anndugo ɗe. Noppi mon maɓɓitaaki diga ɓooyma. Ngam mi anndi on zammbooɓe, ɓe ewni on tuurtooɓe diga reedu daada.

⁹Ngam daliila innde am paasitanmi tikkere am. Ngam daliila maŋgtoore am naŋgtumi hoore am, ngam taa mi nattina on.

¹⁰Ndaa, mi laɓɓini on, ammaa naa bana cardi. Mi foondi on nder ɓolinirde ɓillaare.

¹¹Ngam daliila hoore am tan mbaɗanmi ɗum. Mi accataa goɗɗo soɓna innde am. Mi hokkataa goɗɗo feere tedduŋgal am.”

¹²“Naneeɗam, onon yimɓe Isra'iila, danygol Yaakubu, ewnaaɓe am! Min woni arano, min boo ragareejo.

¹³Juŋngo am saɓɓi lesdi, nyaamo am we'iti asamanji. To mi ewnake lesdi e asamanji, ɗum fuu ɗum darodotto.

¹⁴Mooɓe, on fuu, nane! Moy caka ɗowanteeɓe anndini kuuje ɗe'e? Goɗɗo mo ngiɗmi ɗum, kaŋko o hiɓɓinan muuyo am dow Baabila, juŋngo maako yowoto dow Kaldiya'en.

¹⁵Min, min feere am wolwi, mi ewni mo, mi waddi mo, nufaye maako hiɓɓan.

¹⁶Ɓaditeeɗam, nane ɗu'um: Diga fuɗɗam mi wolwaay bee sirri. Diga fuɗɗoode kuuje ɗe'e, mi ɗon.” — Ammaa jonta Jawmiraawo Allah neli yam bee Ruuhu muuɗum.

¹⁷Ndaa nii Jawmiraawo, coottoowo on, Ceniiɗo Isra'iila wi'i: “Min woni Jawmiraawo Allah mon, ekkitinɗo on ko nafata on. Mi ɗowan on dow laawol ngol tokkotooɗon.

¹⁸Kadi, to on kakkilanino umrooje am, salaaman mooɗon ilanno bana ndiyam nder maayo, adilaaku mooɗon bana ƴuuge mbeela.

¹⁹Danygol mon laatotono bana njaareendi, ngol ɗuuɗanno bana gabbe maari. Innde maɓɓe nattataano, nde halkataano yeeso am.”

²⁰Ngurte Baabila, ndogge Kaldiya'en! Anndine ɗum bee hoolo seyo, ngooyne ɗum! Njahre habaru man haa keerol duniyaaru, mbi'e: “Jawmiraawo sootti suka mum Yaakubu!”

²¹Ɓe maatataa ɗomka haa ladde haa o ɗowata ɓe. O ilnanan ɓe ndiyam e tapaare. O seekan tapaare, ndiyam ila.

²²“Walaa salaaman ngam halluɓe sam.” Nii Jawmiraawo wi'i.