Read Fulfulde Esaaya 5 Bible Online

Esaaya 5 - Fulfulde bible

Esaaya 5

¹Useni, acceeɗam mi yimana giɗaaɗo am e ngesa inabooje maako gimol ngo'ol: Soobaajo am woodino ngesa inabooje haa townde marnde lesdi njamri.

²O remi ka, wurtini kaa'e e maaka. O jubi nder maaka lekkon mbooɗkon, o nyiɓi aynirdu nder maaka, o wasi ɓiɗɗirɗum, o tammo ka rimanan mo ɓiɓɓe dakamje, ammaa nyolɗe o tawi.

³Jonta, onon jooɗiiɓe nder Urusaliima e yimɓe Yahuuda, mi tori on ta'anammi kiita hakkunde am e ngesa inabooje am!

⁴Koni ka rimaay ɓiɓɓe belɗe, sey lammuɗe? Ko ngejjititmi huuwugo ka? Mbi'e ko lutti!

⁵Mi anndina on ko mi yiɗi waɗugo ngesa inabooje am: Mi ittan kowaagol haa na'i e dammooji dura ka. Mi yibbinan mahol taariiŋgol, haa yimɓe njaaɓa ka.

⁶Mi wilan ka fuu, ka meetataa salteego malla remeego. Giŋngille e gi'e puɗan nder maaka, mi haɗan koo duule boo toɓnugo iyeende dow maaka.

⁷Isra'iila woni ngesa inabooje Jawmiraawo honooɓe asama, worɓe Yahuuda ɗum lekkon maako cuɓaakon kon o jubi. O ɗaɓɓiti kiita ngooŋɗuka, sooynde adilaaku o tawi, o ɗaɓɓi adilaaku, hoolo tampuɓe o tawi.

⁸Bone laatanto mahooɓe suudu dow suudu, ɓesdanɓe ngesa bee ngesa, haa to babal timmi! Onon feere mooɗon tan mari babal!

⁹Ndaa ko Jawmiraawo honooɓe asama wolwani yam: “Fakat, cuuɗi ɗuuɗɗi ɗi'i laatoto bille, cuuɗi mawɗi booɗɗi ɗi'i keɓataa jooɗotooɓe nder maaji.

¹⁰Ngam ngesa inabooje ka ɓoggi sappo, hokkan inaboojam mbulku ngootu, buhu aawdi hokkan ƴaamnde muudooje ɗiɗi e reeta.”

¹¹Bone laatanto dawooɓe cub haa ɓe ɗaɓɓita nguykinoojam, faɓɓooɓe haa esaa'i ngam inaboojam fertina ɓe ɓanndu.

¹²Hoodu e moolooru e mbaggu e ciidal e inaboojam moddinta juulɗe maɓɓe. Ammaa ɓe kakkilantaa kuugal Jawmiraawo, ɓe ngi'ataa kuuɗe ɗe o huuwani ɓe.

¹³Ngam maajum yimɓe ummaatoore am ndahaama[4], ngam ɓe ngalaa faamu. Tedduɓe maɓɓe maayran weelo, mooɓe maɓɓe laahan daliila ɗomka.

¹⁴Ngam man joonde maayɓe maɓɓititto masin, nde maɓɓitan hunnduko jaasɗum. Tedduɓe Urusaliima e mooɓre berniwol fuu nastan nde bee hoolo seyo nder juulde maɓɓe.

¹⁵Bana non neɗɗo turoto, koo moy leestan, gite mawnitiiɓe toskoto.

¹⁶Ammaa Jawmiraawo honooɓe asama ɓaŋgoto nder kiita ngooŋɗuka, bee adilaaku Allah Ceniiɗo waŋginirta senaare muuɗum.

¹⁷Baali nyaaman bana nder ngaynaaka, be'i nduran, keɓan ko nyaama ton nder bille ɗe'e.

¹⁸Bone laatanto fooɗooɓe aybe muuɗum'en bee ɓoggi zammba e hakke muuɗum'en boo bee ɓoggi moota pucci.

¹⁹Ɓe ɗon mbi'a: “Sey Jawmiraawo yaawɗo, o yaawna kuugal maako, haa min ngi'a ngal. Sey Ceniiɗo Isra'iila timmina ko o nufi, ngam min annda ɗum!”

²⁰Bone laatanto wi'ooɓe kalluɗum ɗum booɗɗum e booɗɗum boo ɗum kalluɗum, sannjooɓe nyiɓre bee jayŋgol nden jayŋgol boo bee nyiɓre, wartirooɓe kaaɗɗum belɗum e belɗum boo kaaɗɗum.

²¹Bone laatanto laarooɓe ko'e muuɗum'en ɓe hikma'en, numanɓe ɓe hakkilɓe.

²²Bone laatanto waawɓe yarugo inaboojam e semmbiɗɓe jillugo nguykinoojam,

²³gooŋɗinooɓe kalluɗo ngam ɓe keɓa ngeenaari, ammaa salotooɓe gooŋɗingo adiliijo.

²⁴Ngam maajum, bana ɗemŋgal yiite wulirta calwaaje, bana huɗo yoorko jinnirta nder yiite, bana non ɗaɗol maɓɓe nyolan, pinndi maɓɓe caŋkititto bana sollaare. Ngam ɓe cali ɗowtanaago tawreeta Jawmiraawo honooɓe asama, ɓe njawi wolde Ceniiɗo Isra'iila.

²⁵Ngam maajum tikkere Jawmiraawo ɗon ukko dow ummaatoore mum. O ɗon forta juŋngo maako dow maɓɓe, o fiya ɓe. Kooseeje ɗon ndiwna, ɓalli maayɓe ɗon mbaali bana mbuuwri dow laabi. Bee non fuu, tikkere maako feewtaay, juŋngo maako ɗon forti tawon.

²⁶O darnanan yimɓe ummaatoore daayiinde tuutawal, o ewnoto ɓe haa ɓe ngara diga keerol duniyaaru fuu. Ndaa, law ɓe ngaran bee jaawal!

²⁷Walaa comɗo caka maɓɓe malla pergotooɗo. Walaa ngoŋnganɗo malla ɗaanotooɗo. Taadorgol keeci maɓɓe fiistaaki, lokkuli paɗe maɓɓe ta'aay.

²⁸Kuri maɓɓe ceeɓi, lagaaje maɓɓe tiraama, kororamje pucci maɓɓe caati bana kaa'e, kosɗe mootaaji pucci maɓɓe bana duluuru.

²⁹Hoolo maɓɓe bana ngo mbarooga, ɓe ɗon ubba bana ɓiɓɓe barooɗe. Ɓe ubba, ɓe naŋnga keɓal, ɓe ndaɗa bee maagal, walaa baawanɗo hisnugo ngal diga hunnduko maaga.

³⁰Nyalaade man ɓe koolan dow Isra'iila bana mbeela hoolata. To goɗɗo laari haa lesdi, sey nyiɓre e mettamɓeram, duule cuddi jayŋgol.