Read Fulfulde Esaaya 53 Bible Online

Esaaya 53 - Fulfulde bible

Esaaya 53

¹Moy nuɗɗini ko nanɗen? Haa moy Jawmiraawo waŋginani juŋngo mum?

²O mawni yeeso maako bana fuɗŋgo iwŋgo diga ɗaɗol nder lesdi njoorndi. O walaa ŋarol koo ɗelko sakko ngi'en mo, haa jaati maako boo, walaa ko fottani en.

³Yimɓe njawi mo, ngudini mo. O woowri bee naaworlaaji e bone, koo moy wiirni yeeso mum ngam taa yi'a mo. En njawi mo, en paalaay mo.

⁴“Asee boo naaworlaaji meeɗen o roondi, bone meeɗen o hooci. Bee non fuu en ndaari mo bana Allah hiiti mo, fiyi mo, leestini mo.

⁵Ammaa o yuwaama daliila zunuubaaji meeɗen, o torraama ngam aybeeji meeɗen. Kiita ka o jaɓi, waddani en salaaman, daliila kuuduuje maako en kurgake.

⁶Enen fuu en majjino bana baali, koo moy tokkuno laawol muuɗum. Ammaa Jawmiraawo yowi aybe meeɗen fuu dow maako.

⁷Ɓe toonyi mo, ammaa o munyani ɗum, o maɓɓitaay hunnduko maako bana jawgel ngel ɓe njahrata hirseego, bana mbaalu muukaaŋgu yeeso meksooɓe gaasa muuɗum, non o maɓɓitaay hunnduko maako.

⁸Ɓe naŋngi mo bee semmbe, ɓe ndo'i mo kiita. Caka yimɓe yidere maako, walaa mo numi dow ko heɓi mo. O ittaama diga lesdi yeeɗɓe daliila zunuubaaji ummaatoore am.

⁹Ɓe mbaɗi yenaande maako caka halluɓe, ɓe mbaɗi hawriire maako caka riskuɓe koo to o waɗaay toonyaare, hunnduko maako wolwaay fewre.”

¹⁰Jawmiraawo muuyi torrugo mo e yarnugo mo bone. Ɓaawo o lii'i hoore maako ngam ittugo hakkeeji, o yi'an danygol maako, balɗe maako njuutan, muuyo Jawmiraawo hiɓɓoto bee maako.

¹¹Daliila torraaji ɗi o yari, o heɓan seyo fahin, o anndan o torraaki meere. Kaŋko woni suka am adiliijo. O roondi aybeeji ɗuuɗɓe, bana nii o adilinan ɓe.

¹²Ngam maajum ndokkan mo mi geɗal maako caka mawɓe, o senndan keɓal bee semmbiɗɓe, ngam o jaɓi maayugo, o limdaama bee waɗɓe zunuuba. Ammaa o roondi hakkeeji ɗuuɗɓe, o do'ani waɗɓe zunuuba.