Read Fulfulde Esaaya 54 Bible Online

Esaaya 54 - Fulfulde bible

Esaaya 54

¹“Ummin gookaali seyo, an dimaro mo meeɗaay danyugo! Welweltu, hoolu bee seyo, an mo meeɗaay luuweego! Ngam ɓikkoy geewaaɗo ɓuran ɓikkoy te'aaɗo ɗuuɗugo.” Non Jawmiraawo wi'i.

²Yaajin babal suudu laymaaru ma. Sey ɓe mbe'ita wiirndallooji jooɗorde ma, taa famɗin. Juttin ɓoggi maaru, tiggu tiggirɗe ma booɗɗum.

³Ngam a yaajan haa nyaamo e nano. Danygol ma heɓtan lesdi ndi ummaatooje nyaami ɗum, hebbinan berniiji geewaaɗi.

⁴Taa hul, ngam a semtintaake. Taa sakla, ngam a toskintaake. A yejjitan toskaare nderkaaku ma, a meetataa siftorgo mbustu suddaare[46] ma.

⁵Ngam tagɗo ma laatoto gorko ma, Jawmiraawo honooɓe asama woni innde maako, coottoowo ma, ɗum Ceniiɗo Isra'iila, o ewneteeɗo Allah duniyaaru fuu.

⁶A nanndi bee debbo accaaɗo, mo hakkiilo mum sakli, ammaa Jawmiraawo ewni ma. Goɗɗo wudinan debbo sukaaku mum na? Non Allah ma wi'i:

⁷“Mi acci on wakkati seɗɗa, ammaa mi jaɓan on bee enɗam ɗuuɗɗam.

⁸Nde tikkere am saati, mi suuɗi on yeeso am wakkati seɗɗa, ammaa mi enɗan on bee mbooɗeeŋga nduumiiŋga.” Non Jawmiraawo coottoowo ma wi'i.

⁹“Ɗum laatanto on bana nder zamanu Nuuhu: Mi hunino ilamji meetataa ilnugo lesdi. Bana non boo kunortoomi jonta mi meetataa tikkango on e telɓango on.

¹⁰Koo to kooseeje cotti, towndiije boo ndimmbake, mbooɗeeŋga am sottantaa on, alkawal salaaman am bee mooɗon dimmbataako.” Non Jawmiraawo enɗoowo on wi'i.

¹¹An Urusaliima, a ɓillaaɗo, keni ndimmbini ma, walaa mo de'itini ma! Ndaa, mi nyiɓtoto mahi ma dow kaa'e ɓaleeje. Mi wallinan caɓɓaaje ma bee kaa'e safira.

¹²Mi lamsoto mahi ma bee kaa'e boɗeeje. Mi waɗan dammuɗe ma bee kaa'e ɗelkooje e mahi taariiɗi ma fuu bee kaa'e marɗe saman.

¹³Ɓikkoy ma fuu laatoto pukara'en Jawmiraawo. Salaaman ɓikkoy maaɗa ɗuuɗan.

¹⁴A tabitan bee adilaaku. A daayoto ɓillaare, a hulataa fahin. A daayoto kultoreeŋgol boo, ngol ɓaditittaako ma.

¹⁵To goɗɗo ukkanake ma, ɗum iwaay diga am. Koo moy jokkiranɗo bee maaɗa do'oto daliila ma.

¹⁶“Ndaa, min tagi kilaajo puufanɗo ƴulɓe jamnaaɗe ngam waɗugo balmi koo ɗiye. Min tagi nattinoowo boo ngam nattingo balmi ɗi'i.

¹⁷Balmol taaskaaŋgol ngam naawnugo ma meemataa ma. A do'an wullotooɓe ma fuu. Non maral suka'en Jawmiraawo wa'i, mi waɗanan ɓe adilaaku am.” Non Jawmiraawo wi'i.