Read Fulfulde Esaaya 56 Bible Online

Esaaya 56 - Fulfulde bible

Esaaya 56

¹Ndaa nii Jawmiraawo wi'i: “Kakkilane kiita ngooŋɗuka, mbaɗe kuuɗe adiliije. Ngam kisndam am ɓadake yottaago, adilaaku am ɓadake waŋgugo.

²Barka laatanto neɗɗo baɗanɗo ɗum, ɓii Aadama jogotooɗo ɗum, kakkilananɗo nyannde siwtorde ngam taa o soɓna nde, aynanɗo juŋngo mum ngam taa waɗa halleende sam.”

³Jananno mo hawtani yimɓe Jawmiraawo, taa wi'a: “Fakat Jawmiraawo senndirtam bee ummaatoore mum!” Taa cortaaɗo wi'a: “Ndaa, mi lekki joorki!”

⁴Ngam Jawmiraawo wi'i sortaaɓe: “To on kakkilani nyalɗe ciwtorɗe am, to on mbaɗi ko fottani yam, to on tabiti nder alkawal am,

⁵nden kam mi hokkan on ko ɓurata ɓiɓɓe worɓe e rewɓe, waato ciftinorɗum e daraja nder suudu am, caka mahi saare am. Inɗe mon nduumoto, ittataake sam.”

⁶Jananɓe hawtananɓe yimɓe Jawmiraawo ngam jagganaago mo, yiɗɓe innde Jawmiraawo ngam laataago suka'en maako, hakkilananɓe nyannde siwtorde ngam taa ɓe coɓna nde e jogotooɓe alkawal am,

⁷mi yahran ɓe haa hooseere am seniinde, mi seynan ɓe nder suudu do'a am. Mi yerdoto guleteeɗi maɓɓe e kirseteeɗi ɗi ɓe lii'anto yam dow hirsirde am. Suudu am wi'ete suudu do'a ngam ummaatooje fuu.

⁸Jawmiraawo Allah mooɓtanɗo Isra'iila'en dahaaɓe wi'i: “Mi ɓesdanan mooɓtaaɓe mooɓteteeɓe woɗɓe.”

⁹Ngare, onon dabbaaji ladde e laynde fuu, haa on nyaama!

¹⁰Aynooɓe Isra'iila ɓe wumɓe, walaa ko ɓe anndi, ɓe dawaaɗi muukaaji, ɗi mbaawataa wohugo. Ɓe ɗon koyɗa, ɓe ɗon mbaali, ɓe ngiɗi ɗoyɗi.

¹¹Ɓe dawaaɗi ɗuuɗa-suunooji ɗi kaarataa sam. Ɓe waynaaɓe ɓe paamataa sam, koo moy ɗon tokko laawol muuɗum. Koo moy maɓɓe ɗon ɗaɓɓita riba muuɗum kalluka tan.

¹²Koo moy ɗon wi'a: Ngare, sey mi ɗaɓɓita inaboojam. Njaren nguykinoojam haa nguyken! Jaŋngo boo nii non! Luttuɗam ɓuri ɗuuɗugo!