Read Fulfulde Esaaya 58 Bible Online

Esaaya 58 - Fulfulde bible

Esaaya 58

¹Jawmiraawo wi'i: “Hoolu bee sawtu, taa naŋgta! Townu sawtu ma bana luwal! Anndin ummaatoore am yimɓe danygol Yaakubu zunuubaaji e hakkeeji maɓɓe.

²Ɓe ɗon ƴama muuyo am nde weeti fuu, ɓe ɗon ɗaɓɓa anndugo laabi am. Ɓe ɗon bana ummaatoore waɗannde koo ɗume fodde adilaaku, nde accaay gooŋga Allah maare boo. Ɓe ɗon ƴamammi kiitaaji gooŋɗuɗi, ɓe ngiɗi mi ɓadito ɓe.”

³Yimɓe ƴami: “Ko suumaye nafata to a faalataa ɗum? Ko yaŋgititgo ko'e amin nafata to a hakkilantaa ɗum?” Jawmiraawo jaabi: “Ndaa, nyannde on ɗon cuumo, on ɗon mbaɗa ko on ngiɗi, on ɗon ɓilla huuwanooɓe mon.

⁴Suumaye mon ɗon yahra on haa jokkirgol e haɓre e kutupaaje naawɗe. On cuumaaki hannde bana no haandi sakko mi nana do'aaje mon diga dow.

⁵On ɗon leestina ko'e. Kanjum woni suumayeere nde ngerdotoomi na? On ɗon tura ko'e mon bana kewal, on ɗon mbaalo dow limce buhuuje e ndoondi. Kanjum mbi'oton suumaye, nyalaade nde fottanta yaa Jawmiraawo na?

⁶Ndaa, suumayeere nde ngerdotoomi: Yooftugo yimɓe ɓe naŋnguɗon bilaa hujja, fiɓtugo ɓoggi kaɓɓirgal, rimɗingo toonyaaɓe, yewugo kaɓɓirgal koo ngale.

⁷Cennde nyaamdu mon bee dolɓe, nastine laafuɓe yiilotooɓe nder cuuɗi mon. To on ngi'i goɗɗo temmbo, ɓorne mo. Taa ngaylitane banndiraaɓe mon ɓaawo.

⁸Nden kam annoora mon yaynan bana jayŋgol fajiri, kuuduuje mon nyawndoto law. Adilaaku mon ardoto on, tedduŋgal am boo wonan ɓaawo mooɗon, faddoto on.

⁹To on torake yam, mi jaaboto on. To on ngookani yam ngam ballal, mi wi'an: Na'am. To on acci toonyaago e sappaago yimɓe bee kooli e wolwugo bolle kalluɗe,

¹⁰to on ndokki dolɓe ko nyaamoton, on kaarni laafuɓe, nden kam annoora mon yaynan nder nyiɓre, nyiɓre mon laatoto bana caka nyalawma.

¹¹Min Jawmiraawo mi ɗowan on foroy, mi haarnan on caka lesdi njoordi, mi semmbiɗinan i'e mon. On laatoto bana jarne cafaaɗe, bana seeɓoore nde sooyataa ndiyam.

¹²Daliila mooɗon, ɓe nyiɓtoto bille ɓooymaaje dow caɓɓaaje ɗe gide caaliiɗe mballini. On ewneteeɓe maɓɓooɓe ceekli, wo'itinooɓe pattule haa yimɓe njooɗo.”

¹³Jawmiraawo wi'i: “To on kakkilani nyannde siwtorde, to on cuklanaaki kuuɗe mon nyalaade am seniinde, to on ceyorake nde, to on teddini nde, to on tokkaaki laabi mon, on mbolwataa bolle meereeje,

¹⁴nden kam ɓerɗe mon keɓan welwelo haa am. Mi daaynan on cakle duniyaaru fuu. Mi laatinan on jaaliiɓe, on caaloto dow kooseeje lesdi. Mi nyaamnan on nder maral ngal ndokkumi kaaka mon Yaakubu. Min Jawmiraawo wi'i ɗum.”