Read Fulfulde Esaaya 61 Bible Online

Esaaya 61 - Fulfulde bible

Esaaya 61

¹Ruuhu Jawmiraawo Allah ɗon dow am. Ngam Jawmiraawo moyti yam, neli yam haa mi waazina laafuɓe habaru seyo, mi nyawnda ta'a-ɓerɗe'en, haa mi wooynana haɓɓaaɓe ndimu, jooɗiiɓe nder kaɓɓirgal boo dimɗinki.

²O neli yam yeeynugo hitaande baŋguki mo'ere Jawmiraawo e nyalaade nde Allah men waatoto konne'en mum. O neli yam de'itingo wonɓe nder suno fuu,

³meetugo yimɓe Siyona jooɗiiɓe nder ndoondi, rufugo nebbam seyo haa pellel bojji, maŋgtooje haa pellel saklere. Ɓe ewneteeɓe Leɗɗe Adilaaku, ciraka Jawmiraawo ngam waŋgingo tedduŋgal maako.

⁴Ɓe nyiɓtoto bille ɓooymaaje, ɓe ndartinan nokkuuje gibbinaaɗe naane. Ɓe mbo'itinan berniiji geewaaɗi, perwuɗi nder gide caliiɗe.

⁵Jananɓe ngaran, nduran dammooji mon. Ɓe ndeman gese mon, ɓe kuuwan nder gese inabooje mon boo.

⁶Ammaa onon on ewneteeɓe liman'en Jawmiraawo. Ɓe ewnan on suka'en Allah meeɗen. On nyaaman risku ummaatooje, on njurorto tedduŋgal maaje.

⁷Haa pellel toskaare, on keɓan barka cowi ɗiɗi. Haa pellel saklere, on ceyorto geɗe mon. On keɓtan marle mon cowi ɗiɗi nder lesdi maɓɓe, seyo laatanto on haa foroy.

⁸Ngam min Jawmiraawo mi yiɗi kiita ngooŋɗuka. Mi ɗon wanya jaɓtuki e halleende. Mi hokkan yimɓe am mbarjaari maɓɓe bee hoolaare, mi haɓɓan alkawal duumiiŋgal bee maɓɓe.

⁹Ummaatooje anndan danygol maɓɓe, jama'aaje boo anndan ɓiɓɓe maɓɓe. Yi'anɓe ɓe fuu annditan ɓe danygol ngol mi barkiɗini ɗum.

¹⁰Urusaliima ɗon maŋgta: “Mi seyorto Jawmiraawo masin! Mi welweltan daliila Allah am. Ngam o ɓorni yam kisndam bana limce, o moji yam bee adilaaku bana alkibbaare, bana ɓaŋganɗo meetiiɗo meetaleewol mum nannduŋgol ngol limanjo, bana ɓaŋgeteeɗo pawniiɗo bee fawne muuɗum.

¹¹Fakat bana lesdi fuɗnirta haako muuɗum, bana jarne boo fuɗnirta aawdi muuɗum, non Allah Jawmiraawo fuɗnirta adilaaku e maŋgtoore yeeso ummaatooje fuu.”