Read Fulfulde Esaaya 62 Bible Online

Esaaya 62 - Fulfulde bible

Esaaya 62

¹Ngam daliila Siyona mi jeeɗataako. Ngam daliila berniwol Urusaliima mi de'itittaa, haa to adilaaku maagol waŋgi bana ɗelko naaŋge, kisndam maagol boo bana jamre yiite.

²Ummaatooje ngi'an adilaaku maaɗa, laamiiɓe fuu ngi'an tedduŋgal maaɗa. Ɓe ewnirte bee innde hesre nde Jawmiraawo taynorto ɗum.

³A laatoto meetaleewol ɗelkanŋgol haa juŋngo Jawmiraawo, a meetaleewol laamiiɗo haa newre Allah maaɗa.

⁴A meetataa wi'eego: Accaaɗo. Ɓe meetataa wi'ugo lesdi ma: Geewaaɗo. Ammaa ɓe mbi'ete: Ceynanɗo Jawmiraawo, lesdi ma boo: Te'aaɗo. Ngam Jawmiraawo seyorto ma, o laatanto lesdi ma bana ɓaŋɗo.

⁵Bana suka te'irta paanyo debbo, non nyiɓtoowo ma haɓɓan teegal bee maaɗa. Bana ɓaŋɗo seyorto ɓaŋgeteeɗo, non Allah maaɗa seyorto ma.

⁶An Urusaliima, mi darni aynooɓe dow mahi ma. Jemma bee naaŋge fuu ɓe njeeɗataako sam. Onon siftinoranɓe Jawmiraawo ko o huni, taa ciwte!

⁷Taa acce mo o siwto, sey to o dartini Urusaliima, o wartiri ngol daliila maŋgtoore haa duniyaaru fuu.

⁸Jawmiraawo hunori bee juŋngo mum nyaamo, semmbiɗŋgo: “Mi meetataa nyaamnugo konne'en mon alkamaari mon, jananɓe meetataa yarugo inaboojam mon ɗam keɓɗon bee kuugal mon caatuŋgal.

⁹Ammaa mooɓtanɓe alkamaari, kamɓe nyaamata ndi, ɓe maŋgtan Jawmiraawo, ittanɓe inabooje njaran inaboojam nder daldal suudu am seniindu.”

¹⁰Caale! Ngurte yaasi berniwol! Mbaɗane ummaatoore laawol! Ceeke buuwol, itte kaa'e! Ɓaŋgte tuutawal dow ummaatooje!

¹¹Ndaa, Jawmiraawo ɗon yeeyna haa yotti keeri duniyaaru: “Mbi'e Siyona: Kisndam ma ɗon wara. Mbarjaari maako ɗon bee maako, ngeenaari maako ɗon ardo mo.

¹²Ɓe wi'eteeɓe ummaatoore seniinde, soottaaɓe Jawmiraawo. Urusaliima boo, yimɓe mbi'ete Berniwol ngol Allah yiɗi, berniwol ngol accataake.”