Read Fulfulde Esaaya 66 Bible Online

Esaaya 66 - Fulfulde bible

Esaaya 66

¹Ndaa nii Jawmiraawo wi'i: “Asama woni leeso laamu am, lesdi woni jaaɓruɗum kosɗe am. Kadi suudu nduye on nyiɓantammi? Nokkuure ndeye laatoto siwtorde am?

²Kuuje ɗe'e fuu, juŋngo am waɗi ɗe, nden ɗe fuu ɗe laati. Non Jawmiraawo wi'i. Ndaa ɓe'e ndaaranmi: Yaŋkiniiɓe e ta'a-ɓerɗe'en, diwnanɓe ngam wolde am.

³Mo hirsi ngaari, mbari neɗɗo boo. Mo hirsi mbaalu, yewi rawaandu daande boo. Mo waddi dokkal, lii'i boo ƴiiƴam gaduuji. Mo wuli uurle ngam am, sujidani boo lawru. Kamɓe ɓe cuɓi laabi maɓɓe, ɓerɗe maɓɓe ɗon ceyoro kuuje maɓɓe nyidduɗe ɗe'e.

⁴Ngam maajum min boo mi suɓanan ɓe sarru, mi ukkanan ɓe ko hulnata ɓe. Ngam mi ewni ɓe, ammaa walaa jaabiiɗo. Mi wolwi, ammaa ɓe nanaay, ɓe mbaɗi kalluɗum yeeso am, ɓe cuɓi ko fottanaay yam sam.”

⁵Nane wolde Jawmiraawo, onon diwnanɓe ngam wolde maako: “Deerɗiraaɓe mon woɗɓe nganyi on, ndiiwi on ngam on ɗon tokko yam. Ɓe mbi'i: Jawmiraawo waŋgina tedduŋgal muuɗum haa min ndaara seyo mon! Ammaa kamɓe toskoto.”

⁶Nane hoolo nder berniwol, hoolo nder haykaliiru! Ɗum sawtu Jawmiraawo mo ɗon waato konne'en maako.

⁷“Hiddeko o luuwe, o danyi. Hiddeko luuwe naŋnga mo, o ɓesni ɓiɗɗo gorko.

⁸Moy meeɗi nanugo irin ɗu'um? Moy meeɗi yi'ugo irin maajum? Ummaatoore waawan danyeego nder nyannde woore na? Jama'aare waawan danyeego saa'iire woore na? Fuɗɗam luuwe nii Siyona danyi ɓiɓɓe muuɗum!

⁹Kadi to mi yottini debbo haa wakkati luuwe mum, nden mi haɗan mo danyugo na?” Nii Jawmiraawo wi'i. “Min hokkata yoŋki, kadi mi maɓɓan danyrugol na?” Nii Allah wi'i.

¹⁰Ceyode bee berniwol Urusaliima, mbelmbelte daliila maagol, onon yiɗɓe ngol fuu! Ceyode bee maagol, onon wonɓe nder suno daliila maagol.

¹¹Musine kosam maagol de'itinanɗam, kaare bee maajam. Ceyore ɗuuɗeeŋga risku maagol.

¹²Ndaa nii Jawmiraawo wi'i: “Mi ilnanan ngol salaaman bana maayo, tedduŋgal ummaatooje boo bana maayo teelanŋgo[49]. Onon boo on laatoto bana ɓiŋngel ngel daada mum musninta ɗum, roondoto ɗum dow wuttudu, huufata ɗum dow koppi mum.

¹³Bana daada de'itinirta ɓiyum, non de'itiniranmi on nder Urusaliima!

¹⁴On ngi'an ɗum, ɓerɗe mon ceyoto, i'e mon kesɗitan bana huɗo hecco.” Juŋngo Jawmiraawo waŋganan suka'en maako. Ammaa konne'en maako maatan tikkere maako.

¹⁵Ngam ndaa, Jawmiraawo ɗon wara nder yiite, mootaaji pucci maako bana duluuru. O hiɓɓinan tikkere maako bee caatal, o telɓiran bee ɗemɗe yiite.

¹⁶Ngam bee yiite e kaafahi maako, Jawmiraawo hiitorto yimɓe fuu. Yimɓe ɓe o mbarata ɗuuɗan.

¹⁷Jawmiraawo wi'i: “Senanɓe ko'e muuɗum'en ngam yahugo jarne ngam rewugo labbi, tokkotooɓe ardiiɗo gonɗo haa caka, nyaamanɓe gaduuji e doombi e kuuje karamɗe, ɓe kalkan ɓe fuu.

¹⁸Mi anndi kuuɗe maɓɓe e numooji maɓɓe. Wakkati mooɓtugo yimɓe ummaatooje e ɗemɗe fuu yottake. To ɓe ngari, ɓe ngi'an tedduŋgal am.

¹⁹Mi darnan alaama caka maɓɓe, mi nelan woɗɓe caka daɗɓe maɓɓe haa ummaatooje: Haa Tarsis e Pul e Lud, lesdi annduɓe fiɗugo kuri, haa Tubal e Yawan[50], haa duuɗe daayiiɗe ɗe meeɗaay nanugo habaru am, ɗe meeɗaay yi'ugo tedduŋgal am boo. Ɓe anndinan tedduŋgal am caka ummaatooje ɗe'e.

²⁰Ɓe ngaddantam deerɗiraaɓe mon diga ummaatooje fuu, ɓe laatanto Jawmiraawo dokkal. Ɓe ngaddan ɓe haa hooseere am seniinde, haa Urusaliima, dow pucci e mootaaji pucci e leese e alfadariije e geelooɗi, bana yimɓe Isra'iila ngaddirta dokke nyaamdu haa suudu am nder taasaaje laaɓɗe.

²¹Woɗɓe maɓɓe mi laatinan ɓe liman'en e Lewi'en.” Non Jawmiraawo wi'i.

²²“Mi tagan asamaawu kesu e lesdi kesri, ɗum tabitan yeeso am. Bana non danygol e innde mon tabitirta.

²³Juulde lewru hesru koo ndeye e nyannde siwtorde koo ndeyeere yimɓe fuu ngaran sujidango yam.” Non Jawmiraawo wi'i.

²⁴“To ɓe ngurtake, ɓe ngi'an ɓalli maayɓe tuurtanɓe yam. Ngilŋgu maɓɓe waatataa, yiite maɓɓe nyifataa. Ɓe laatoto nyidduɓe haa yimɓe fuu.”