Read Fulfulde Esaaya 8 Bible Online

Esaaya 8 - Fulfulde bible

Esaaya 8

¹Jawmiraawo wi'i yam: “Hoo'u alluha makka, winndu dow maaka bee binndol koyŋgol: Maher-Salal-Has-Baj. Bana wi'go yaawango keɓal konu, yaawɗan jaɓtugo.”

²Mi hoo'i bee am seedooɓe hoolaaɓe: Uriya, limanjo e Zekariya ɓii Yeberikiya.

³Ɓaawo man mi nasti haa debbo am. O reedi, o danyi ɓiɗɗo gorko. Jawmiraawo wi'i yam: “Ewnu mo Yaawan keɓal konu-yaawɗan jaɓtugo.

⁴Ngam hiddeko ɓiŋngel annda wi'go: Baaba am malla daada am, ɓe koocan risku Damas e jawdi Samariya yeeso laamiiɗo Assuura.”

⁵Jawmiraawo tokki wolwango yam, wi'i:

⁶“Yimɓe ɓe'e ɗon njawo ndiyam Siloha ilanɗam bee hakkiilo, ammaa ɓe ɗon ndiwna[9] yeeso Recin e ɓii Remaliya.

⁷Ngam man, min Jawmiraawo mi yahran ndiyamji Efratis mawɗi cemmbiɗɗi dow maɓɓe — waato laamiiɗo Assuura bee baawɗe muuɗum fuu. Maayo man faccan, teelan[10] dow pomoole mum fuu.

⁸Ndiyam maago nastan Yahuuda, ɗam hebbinan lesdi, ɗam suddan ndi, ɗam yottoto daande goɗɗo.” Baawɗe laamiiɗo oo njaajan haa sudda njaajirka lesdi maaɗa fuu, an Immanuyila.

⁹Annde ɗum, onon ummaatooje, ɓerɗe mon ta'an! Keɗite, onon jooɗiiɓe lesɗe daayiiɗe fuu. Taade balmi, ɓerɗe mon ta'an! Taade balmi, ɓerɗe mon ta'an!

¹⁰Nufe nufo ammaa ngo laatoto meere! Mbolwe ko ngiɗɗon, ɗum laatataako! Ngam Allah ɗon wondi bee meeɗen.

¹¹Ndaa ko Jawmiraawo wi'i yam saa'i o naŋngi yam bee semmbe, o reentini[11] yam, taa mi tokko laawol ummaatoore nde'e:

¹²“Taa ewne tuurtol ko yimɓe ɓe'e fuu ewnata tuurtol. Taa kule ko ɓe kulata, taa kultore sam.

¹³Ammaa anndite Jawmiraawo honooɓe asama o ceniiɗo, kaŋko korminton, kaŋko kuloton.

¹⁴O laatanto laamuuji Isra'iila ɗiɗi nokkuure seniinde, hayre nde fergata ɗi, tapaare nde do'ata ɗi, o laatanto boo jooɗiiɓe Urusaliima tuuforgol.

¹⁵Ɗuuɗɓe caka maɓɓe pergoto, ɓe ndo'oto, ɓe ngewan, ɓe nastan tuuforgol e ngol naŋngan ɓe.”

¹⁶Sey mi maɓɓa wahayuuji ɗi'i, mi maɓɓa ekkitinol ngo'ol boo, ngam haa pukara'en am ayna ngol.

¹⁷Mi ɗon heɗito Jawmiraawo mo wiirnani danygol Yaakubu yeeso muuɗum. Kaŋko mi tammori.

¹⁸Ndaa, min e ɓikkoy koy Jawmiraawo hokkimmi, min laatani Isra'iila alaama e kaayeefi ko iwi haa Jawmiraawo honooɓe asama, jooɗiiɗo dow hooseere Siyona.

¹⁹To yimɓe mbi'i on: “Sey on ƴama sarwotooɓe maayɓe e waɗooɓe hatti, sofndooɓe e lorlortirooɓe bolle. Naa yimɓe ummaatoore koo ndeye ɗon ƴama ɗowanteeɓe muuɗum'en e ɓe ɗon ƴama maayɓe ngam haala yeeɗɓe na?”

²⁰Njaabe ɓe: “Aa'a! Sey goɗɗo nana seedamku e ekkitinol Allah!” To on mbi'ataa non, ɓe ngi'ataa baɓɓol.

²¹Ɓe ngiiloto nder lesdi, ɓe ɓilliiɓe e dolɓe. To dolo naawi ɓe, ɓe tikkan, ɓe naalan laamiiɗo maɓɓe e Allah maɓɓe. Ɓe tijjoto dow,

²²ɓe ndaaran haa les, ammaa ɓe ngi'an sey ɓillaare e nyiɓre e mettamɓeram, ɓe wudinaaɓe nder nyiɓre nyiɓɓunde.

²³Fakat, nyiɓre suddataa lesdi ɓilliindi haa foroy. Naane Jawmiraawo yawi lesdi Zabulon e Neftali, ammaa yeeso ɗo o teddinan laawol kommbi mbeela, lesdi gaɗa Urdun, waato Galiili haa ummaatooje goɗɗe njooɗi.