Read Fulfulde Farillaaji Lewi'en 18 Bible Online

Farillaaji Lewi'en 18 - Fulfulde bible

Farillaaji Lewi'en 18

¹Jawmiraawo umri Muusa,

²o wi'a Isra'iila'en ni'i: “Min woni Jawmiraawo Allah mon.

³Taa tokke al'aadaaji lesdi Misra ndi njooɗiiɗon naane. Taa tokke al'aadaaji lesdi Kanaana boo ndi njahranmi on haa muuɗum, taa ɗowtane ɗabiyaaji yimɓe wonɓe ton.

⁴Ammaa ɗowtane kiitaaji am, kakkilane farillaaji am. Min woni Jawmiraawo Allah mon.

⁵Tokke umrooje am e kiitaaji am. Koo moy baɗanɗo ɗum yeeɗan. Min woni Jawmiraawo.

⁶Taa goɗɗo waalda bee banndum debbo. Min woni Jawmiraawo.

⁷Taa toskin baaba ma bee waaldugo bee daada ma. Taa toskin daada ma bana non.

⁸Taa toskin baaba ma bee waaldugo bee gooto rewɓe maako.

⁹Taa waaldu bee deerɗa debbo, ɓii baaba ma malla ɓii daada ma, danyaaɗo nder saare malla nokkuure woɗnde.

¹⁰Taa waaldu bee taaniraawo ma debbo, a toskinan hoore ma.

¹¹Taa waaldu bee ɓii baaba ma, mo daada feere, ngam o deerɗa.

¹²Taa waaldu bee goggo ma, ngam o deerɗu baaba ma.

¹³Taa waaldu bee yaapendo ma, ngam o deerɗu daada ma.

¹⁴Taa toskin bappa ma bee waaldugo bee debbo maako, ngam o debbo bappa ma.

¹⁵Taa waaldu bee debbo ɓiya gorko, esiraawo ma.

¹⁶Taa waaldu bee debbo deerɗa. Taa toskin deerɗa bana nii.

¹⁷Taa waaldu bee debbo e ɓiɗɗo mum debbo, koo bee taaniraawo maako debbo boo, ngam ɓe danygol maako, ɗum nyidduɗum.

¹⁸Taa te'u deerɗu debbo ma, ngam ɗum umminan kaajal, to a waaldi bee maako yaake debbo ma o geeto.

¹⁹Taa waaldu bee debbo kayloowo, ɗum coɓɗum.

²⁰Taa waaldu bee debbo keeddiɗɗa, ngam taa a soɓa.

²¹Taa lii'ana lawru Molek guleteeŋgel nder ɓikkoy ma, koo gootel. Taa soɓnu innde Allah ma bee waɗugo irin ɗu'um. Min woni Jawmiraawo.

²²Taa gorko waalda bee gorko, ɗum nyidduɗum yeeso am.

²³Taa gorko malla debbo waalda bee ndabbaawa, ɗum coɓɗum, ɗum aybewol nyidduŋgol.

²⁴Taa coɓne ko'e mon bee waɗugo irin kuuje ɗe'e. Bana non heefeerɓe coɓniri ko'e muuɗum'en. Min mi riiwan ɓe yeeso mooɗon.

²⁵Kuuɗe maɓɓe coɓni lesdi. Ngam man mi hiiti ndi. Ndi tuuti jooɗiiɓe ton.

²⁶Ɓe mbaɗi kuuje nyidduɗe ɗe'e fuu, ɓe coɓni lesdi. Ammaa onon, sey on ɗowtano farillaaji am e kiitaaji am, onon Isra'iila'en e hoɗɓe caka mooɗon fuu, taa on mbaɗa irin ɗu'um.

²⁸Nden kam lesdi tuutataa on bana ndi tuutiri heefeerɓe aartuɓe on jooɗaago ton.

²⁹Koo moy waɗi irin ɗu'um, o gurtinteeɗo jama'aare maako.

³⁰Kakkilane umrooje am, taa tokke al'aadaaji nyidduɗi ɗi yimɓe aartuɓe on jooɗaago ton. Taa coɓne ko'e mon bee waɗugo irin kuuje ɗe'e. Min woni Jawmiraawo Allah mon.”