Read Fulfulde Farillaaji Lewi'en 19 Bible Online

Farillaaji Lewi'en 19 - Fulfulde bible

Farillaaji Lewi'en 19

¹Jawmiraawo umri Muusa,

²o wi'a jama'aare Isra'iila fuu ni'i: “Laate on senaaɓe, ngam min Jawmiraawo Allah mon mi ceniiɗo.

³Koo moy mooɗon teddina daada mum e baaba mum. Kakkilane nyalɗe ciwtorɗe am. Min woni Jawmiraawo Allah mon.

⁴Taa ngaylite haa labbi, taa mbaɗane ko'e mon ɗowanteeɓe ɓe njamndi ɓolinaandi. Min woni Jawmiraawo Allah mon.

⁵To on ɗon lii'ano yam kirseteeŋga ngam kawtal mon, tokke umrooje ɗe ndokkumi on, haa mi yerdo on.

⁶Nyaame kusel maaga nyannde nde kirsoton nga malla jaŋngo man. Ko lutti haa nyannde tataɓre, ngule ɗum bee yiite,

⁷ngam ɗum laati coɓɗum. To on nyaami ɗum nyannde tataɓre, mi yerdataako on.

⁸Nyaamanɗo ɗum waɗan aybe, ngam o soɓnan ko laati cenaaɗum ngam am. O gurtinteeɗo diga jama'aare maako.

⁹To on ɗon coda alkamaari mon, taa code ngonndi haa sera ngesa, taa lorte sodugo luttanndi boo.

¹⁰To on ɗon itta inabooje mon, taa lorte ittugo luttanɗe, taa mooɓte ko saami boo. Accane ɗe talaka'en e jananɓe. Min woni Jawmiraawo Allah mon.

¹¹Taa ngujje, taa pewpewtire, taa mbaɗindire rikici.

¹²Taa kune dow fewre bee innde am, ngam taa on leesna innde Allah mon. Min woni Jawmiraawo.

¹³Taa ɓille goɗɗo, taa njaɓte ko o mari boo. Taa njoge ngeenaari kuuwoowo, koo jemmaare woore boo.

¹⁴Taa kuɗe paho. Taa mballine fergere haa laawol bumɗo. Kule Allah mon. Min woni Jawmiraawo.

¹⁵Laate on adili'en nder kiitaaji. Taa koynane talaka'en, taa teddine mawɓe boo, ammaa on kiitano heeddiɗɗiraaɓe mooɗon bee adilaaku.

¹⁶Taa caŋkite tufle caka yimɓe mon. Taa ceede fewre ngam on ndo'a goɗɗo kiita mbareego. Min woni Jawmiraawo.

¹⁷Taa nganye goɗɗo nder ɓerɗe mon. To a woodi feloore dow keeddiɗɗa, yeccu mo ɗum bee baŋguɗum, ngam taa a waɗa aybe ngam daliila maako.

¹⁸Taa waata koo moy, taa tokka tikkango goɗɗo ummaatoore ma. Ammaa yiɗ keeddiɗɗiraawo ma bana no a yiɗiri hoore ma. Min woni Jawmiraawo[13].

¹⁹Ɗowtane farillaaji am. Taa acce dabbaaji mon asli feere feereeji ngoowrindira. Taa aawe aawdiiji ɗiɗi feere feereeji haa ngesa ngoota. Taa ɓorne limce cannyiraaɗe bee kuuje ɗiɗi.

²⁰To goɗɗo waaldi bee korɗo mum mo goɗɗo feere muuyi ɗum, ammaa o soottaay mo tawon, korɗo boo heɓaay ndimu tawon, nden kam ɓe hiiteteeɓe, ammaa naa kiita mbareego, ngam ɗum korɗo maako.

²¹Sey gorko wadda njawdiri mbaalu ngam am haa dammugal laymaaru fottirde, ndi kirseteendi ngam joɓki aybe maako.

²²Limanjo waɗana mo laɓɓinki bee njawdiri man ngam ittuki aybe maako yeeso am, kaŋko boo o heɓan yaafuye.

²³To on nasti lesdi, on njubake leɗɗe dimooje ɓiɓɓe ton, ndaare ɗe bana coɓɗe duuɓi tati, taa nyaame ɗe.

²⁴Nduuɓu nayaɓu ɓiɓɓe maaje fuu laato dokkal yettoore ngam am.

²⁵Ammaa nduuɓu njowaɓu on nyaaman ɗe. To on mbaɗi bana non, ɗe ɓesdanan on rimugo ɓiɓɓe. Min woni Jawmiraawo Allah mon.

²⁶Taa nyaame kusel ngel ƴiiƴam mum rufaaka. Taa mbaɗe hiila koo kaye.

²⁷Taa laɓe ko'e mon bee taarnugo, taa ta'e seraaji bakkuɗe mon boo.

²⁸Taa ƴare ɓalli mon ngam woyugo maayɗo malla ngam daliilawol koo ngole boo. Min woni Jawmiraawo.

²⁹Taa laatine ɓiɓɓe mon rewɓe daakaare'en ngam rewugo labbi, taa coɓne ɓe bana non. To on mbaɗi ɗum, yimɓe mbaɗan daakaareeku, lesdi boo heewan kuuɗe nyidduɗe.

³⁰Kakkilane nyalɗe ciwtorɗe am, teddine suudu am seniindu. Min woni Jawmiraawo.

³¹Taa carwe sarwotooɓe maayɓe malla hiila'en, ngam taa ɓe coɓna on. Min woni Jawmiraawo Allah mon.

³²Umme yeeso marɗo dandanndi, teddine ndottiijo, kule Allah mon. Min woni Jawmiraawo.”

³³Taa ɓille jananɓe jooɗiiɓe nder lesdi mon.

³⁴Saa'i ɓe koɗata haa mooɗon, ɓe laatano on bana yimɓe lenyol mon. Ngiɗe ɓe bana ko'e mon, ngam onon boo on hoɗɓeno nder lesdi Misra. Min woni Jawmiraawo Allah mon.

³⁵“Taa mbaɗe aybe bee haala kiita. Kuuje ɗe poondirton njuutirka e teddeeŋga bee muuɗum'en, laato gooŋgaaje,

³⁶non boo kaa'e awnorɗum e kuuje etirɗe alkamaari e nebbam e njaramji. Min woni Jawmiraawo Allah mon, gurtinɗo on lesdi Misra.

³⁷Ngam man ɗowtane farillaaji am e kiitaaji am fuu. Min woni Jawmiraawo.”