Read Fulfulde Farillaaji Lewi'en 2 Bible Online

Farillaaji Lewi'en 2 - Fulfulde bible

Farillaaji Lewi'en 2

¹“To goɗɗo yiɗi lii'anaago Jawmiraawo dokkal nyaamdu, sey o hoo'a kuroori ɗiggundi, o waɗa nebbam dow maari, o sammina uurle dow maari boo.

²Nden o yahra ɗum haa liman'en danygol Haruna. Limanjo hoo'a kuroori ɗiggundi deydey tamndande e nebbam, o hoo'a boo uurle man fuu, o wula ɗum dow hirsirde, ɗum geɗal ciftinorgal. Uureeŋgol dokkal man belŋgol fottanan Jawmiraawo.

³Ammaa luttuɗum dokkal nyaamdu ɗum geɗal Haruna e danygol mum. Ɗum geɗal ɓurŋgal senaago haa dokke guleteeɗe ngam Jawmiraawo.

⁴To a yiɗi lii'aago dokkal nyaamdu tamsaaŋgal diga kaatane, taa waɗ ɗum bee tamre ufnaande. Sey ɗum laato tamseeje ɗe kuroori ɗiggundi njiiɓaandi bee nebbam malla tamseeje bette gujaaɗe nebbam.

⁵To a yiɗi lii'aago tamseeje ca'aaɗe[2] dow beɗol njamndi, sey a waɗa ɗe bee jiiɓaaɗum kuroori ɗiggundi e nebbam.

⁶Sey a feta ɗe, a waɗa nebbam dow maaje. Kanjum woni dokkal nyaamdu.

⁷To a yiɗi lii'aago defaaɗum nder fayannde, sey a waɗa ɗum bee jiiɓaaɗum kuroori ɗiggundi e nebbam.

⁸Sey a yahra dokke nyaamdu bana ɗe'e yeeso Jawmiraawo, a hokka ɗe limanjo, kaŋko boo o ɓadina ɗe haa hirsirde.

⁹O hoo'a geɗal ciftinorgal, o wula ngal dow hirsirde. Uureeŋgol man belŋgol fottanan Jawmiraawo.

¹⁰Ammaa luttuɗum dokke nyaamdu ɗum geɗal Haruna e danygol mum. Ɗum geɗal ɓurŋgal senaago haa dokke guleteeɗe ngam Jawmiraawo.

¹¹Dokke nyaamdu fuu ɗe lii'antooɗon Jawmiraawo, taa mbaɗe ɗe bee ufnirɗum. Taa puunaandi malla njumri tawe nder dokke guleteeɗe ngam Jawmiraawo.

¹²Ngadde ɗum yeeso Jawmiraawo bana geɗal aranal haa ƴaamle mon, ammaa taa ngule ɗum dow hirsirde bana dokkal ngal uureeŋgol mum belŋgol fottanta Jawmiraawo.

¹³Cammine mannda dow dokkal nyaamdu fuu, taa dokkal mon ŋakkira mannda laatiiɗam alaama alkawal hakkunde Allah bee mooɗon.

¹⁴To on ngiɗi lii'anaago Jawmiraawo dokkal ƴaamle mon aartuɗe, sey on lii'o gabbe alkamaari kesri, ca'aaɗe, namaaɗe. Kanjum ɗum laati bana dokkal mon haa ƴaamle mon aartuɗe.

¹⁵Mbaɗe nebbam dow dokkal man, ɓesde uurle boo. Kanjum woni dokkal nyaamdu.

¹⁶Limanjo hoo'a geɗal ciftinorgal haa gabbe e nebbam, wula ngal, non boo uurle fuu. Ɗum dokkal guleteeŋgal ngam Jawmiraawo.”