Read Fulfulde Farillaaji Lewi'en 23 Bible Online

Farillaaji Lewi'en 23 - Fulfulde bible

Farillaaji Lewi'en 23

¹Jawmiraawo umri Muusa,

²o wi'a Isra'iila'en ni'i: “Ndaa nyalɗe juulɗe ɗe mooɓtoton mooɓtorde senaande ngam Jawmiraawo:

³On kuuwa kuuɗe mon nyalɗe joweego. Nyannde joweeɗiɗawre woni siwtorde. Nder maare taa on kuuwa sam, ammaa on mooɓta mooɓtorde senaande. Nyalaade siwtorde, Jawmiraawo jeyi, koo toy on njooɗoto fuu.

⁴Ndaa nyalɗe juulɗe ɗe ngooynoton mooɓtorde nder saa'iije ta'aaɗe, ngam on mooɓta mooɓtorde senaande.”

⁵“Nyannde sappo e nayaɓre nder lewru aranndu, to naaŋge muti, on mbaɗana Jawmiraawo juulde Paska.

⁶Nyannde sappo e jowaɓre maaru, laato juulde tamseeje ɗe ufnaaka ngam Jawmiraawo. Nyalɗe joweeɗiɗi, sey tamseeje ɗe ufnaaka tan nyaamoton.

⁷Nyannde arannde, mbaɗe mooɓtorde senaande. Taa kuuwe kuugal naawŋgal sam.

⁸Nder nyalɗe joweeɗiɗi, lii'ane Jawmiraawo guleteeɗi. Nyannde joweeɗiɗawre, mbaɗe mooɓtorde senaande. Taa kuuwe kuugal naawŋgal sam.”

⁹Fahin Jawmiraawo umri Muusa,

¹⁰o wi'a Isra'iila'en ni'i: “To on nasti lesdi ndi Jawmiraawo hokkata on, to on mba'i alkamaari mon, sey on ngaddana limanjo haɓɓere alkamaari arannde.

¹¹Kaŋko o ɓaŋgta nde yeeso Jawmiraawo, ngam haa Jawmiraawo yerdo on. Sey o waɗa ɗum nyannde tokkotoonde siwtorde.

¹²Nyannde lii'otooɗon haɓɓere maajum, lii'e boo jawgel mbaalu ngel walaa aybe, ngel nduuɓu, ngel guleteeŋgel ngam Jawmiraawo.

¹³Hawtaade bee maagel lii'e dokkal nyaamdu: Kuroori ɗiggundi kilo joweego, jiiɓaandi bee nebbam. Uureeŋgol man belŋgol fottanan Jawmiraawo. Ɓesde boo dokkal dufeteeŋgal: Inaboojam liitir bee reeta.

¹⁴Taa nyaame ƴaamle mon koo tamseeje, koo gabbe kecce malla ca'aaɗe boo, sey to on ngaddani Allah mon dokkal man. Koo toy njooɗoton fuu, ɗum laati farilla nduumiika haa gide mon fuu.”

¹⁵“Ɓaawo nyannde tokkotoonde siwtorde man, waato nyannde lii'antooɗon Jawmiraawo haɓɓere alkamaari go, sey on lima asaweeje joweeɗiɗi.

¹⁶Nyannde tokkotoonde siwtorde joweeɗiɗawre, waato nyannde cappanɗe jowaɓre, lii'ane Jawmiraawo dokkal nyaamdu kesal.

¹⁷Saare fuu wadda tamseeje ɗiɗi, ɓaŋgta ɗe yeeso Jawmiraawo. On mbaɗa tamseere fuu bee kuroori ɗiggundi kilo tati tati, bee ufnirɗum boo. Dokkal nga'al laatano Jawmiraawo diga ƴaamle mon aartuɗe.

¹⁸Hawtaade bee maaje, sey jama'aare lii'o njawkoy baali njoweeɗiɗoy koy nduuɓu e gaggel e jawɗi baali ɗiɗi, ɗum fuu ɗum walaa aybe. Ɗum guleteeɗum ngam Jawmiraawo, hawtaade bee dokkal nyaamdu e dokkal dufeteeŋgal. Uureeŋgol man fottanan Jawmiraawo.

¹⁹Sey on lii'o boo njawdiri mbeewa kirseteendi ngam ittuki hakkeeji e njawkoy baali ɗiɗoy koy nduuɓu, kirseteekoy ngam kawtal yimɓe bee Allah.

²⁰Limanjo ɓaŋgta kirseteeɗi ɗi'i yeeso Jawmiraawo, hawtaade bee tamseeje go e njawkoy ɗiɗoy. O lii'ano Jawmiraawo dokke ceniiɗe ɗe'e ngam liman'en.

²¹Nyannde man taa on kuuwa kuugal naawŋgal, ammaa on ngooyna mooɓtorde senaande. Koo toy njooɗoton fuu, ɗum laati farilla nduumiika haa gide mon fuu.

²²To on ɗon mba'a alkamaari mon, taa mba'e ngondi haa sera ngesa, taa lorte lawnditaago luttundi boo. Accane ndi talaka'en e jananɓe. Jawmiraawo woni Allah mon.”

²³Jawmiraawo umri Muusa,

²⁴o wi'a Isra'iila'en ni'i: “Nyannde go'oore nder lewru joweeɗiɗaɓru laatano on siwtorde. Sey on mooɓta mooɓtorde senaande bee fuufugo luwe.

²⁵Nyannde man taa on kuuwa kuugal naawŋgal sam, ammaa on lii'ano Jawmiraawo nguleteeŋga.”

²⁶Jawmiraawo ɓesdi wi'ugo Muusa:

²⁷“Nyannde sappoore nder lewru joweeɗiɗaɓru woni nyalaade ittuki hakkeeji. Nyannde man taa on nyaama sam. Sey on mooɓta mooɓtorde senaande, on lii'ano Jawmiraawo nguleteeŋga.

²⁸Taa kuuwe kuugal koo ngale, ngam ɗum nyalaade ittuki hakkeeji, ngam keɓon yaafuye haa Jawmiraawo Allah mon.

²⁹Koo moy nyaami nder nyannde man, o gurtinteeɗo diga jama'aare maako.

³⁰Koo moy huuwi kuugal koo ngale nder maare, Jawmiraawo nattinan mo caka yimɓe maako.

³¹Taa on kuuwa sam, ɗum laati farilla nduumiika haa gide mon fuu, koo toy njooɗoton.

³²Nyalaade man laatano on siwtorde, diga maŋngariba nyannde joweenayaɓre haa maŋngariba nyannde sappoore. Taa on nyaama koo ɗume nder maare.”

³³Jawmiraawo umri Muusa,

³⁴o wi'a Isra'iila'en ni'i: “Nyannde sappo e jowaɓre nder lewru joweeɗiɗaɓru ɗum fuɗɗoode juulde bukkaaji, nyalɗe joweeɗiɗi ngam Jawmiraawo.

³⁵Nyannde juulde man arannde, sey on mooɓta mooɓtorde senaande, taa on kuuwa kuugal naawŋgal koo ngale.

³⁶Nyalɗe joweeɗiɗi fuu lii'ane Jawmiraawo guleteeɗi. Nyannde joweetataɓre mooɓte fahin mooɓtorde senaande, lii'ane Jawmiraawo nguleteeŋga. Ɗum nyannde mooɓtorde juulde, taa on kuuwa kuugal koo ngale nder maare.

³⁷Kanje ngoni juulɗe ɗe Jawmiraawo umri on jogaago, ngam on mooɓta mooɓtorde senaande, on lii'ano Jawmiraawo kirseteeɗi e guleteeɗi e dokke nyaamdu e kirseteeɗi ngam kawtal mon e dokke dufeteeɗe, nyalaade koo ndeyeere fodde umroore maare.

³⁸Dow maajum woodi nyalɗe ciwtorɗe goɗɗe e dokke umraaɗe e dokke ɗe kebbinton togayeeje mon bee muuɗum'en e dokke caahiiɗe ngam Jawmiraawo.”

³⁹“Ammaa nyannde sappo e jowaɓre nder lewru joweeɗiɗaɓru, to on timmini mooɓtugo ƴaamle gese mon, mbaɗe juulde nde'e nyalɗe joweeɗiɗi. Nyannde maare arannde ɗum siwtorde, non boo nyannde joweetataɓre.

⁴⁰Nyannde arannde koo'e ɓiɓɓe leɗɗe booɗɗe e lice dibinooje e lice leɗɗe cukkuɗe e leɗɗe goɗɗe, ngam on ceyo yeeso Jawmiraawo Allah mon nyalɗe joweeɗiɗi.

⁴¹Mbaɗe juulde man nyalɗe joweeɗiɗi ngam Jawmiraawo, nder lewru joweeɗiɗaɓru. Kanjum woni farilla nduumiika haa gide mon fuu.

⁴²Nyalɗe joweeɗiɗi ɗe'e, Isra'iila'en fuu njooɗo nder bukkaaji.

⁴³Bana non danygol mon anndiran Jawmiraawo acci Isra'iila'en njooɗo nder bukkaaji, saa'i o wurtini ɓe lesdi Misra. Kaŋko woni Jawmiraawo Allah mon.”

⁴⁴Bana non Muusa anndiniri Isra'iila'en haala juulɗe ngam Jawmiraawo.