Read Fulfulde Farillaaji Lewi'en 26 Bible Online

Farillaaji Lewi'en 26 - Fulfulde bible

Farillaaji Lewi'en 26

¹Jawmiraawo wi'i: “Taa mbaɗane ko'e mon labbi, taa ndarne suuraaji cehaaɗi malla daŋraŋge malla kaa'e bee suuraaji diidaaɗi dow muuɗum'en nder lesdi mooɗon, ngam on cujidana ɗum. Min woni Jawmiraawo Allah mon.

²Kakkilane nyalɗe ciwtorɗe am, teddine suudu am seniindu boo. Min woni Jawmiraawo.

³To on tokkake farillaaji am, to on kakkilani umrooje am, to on ɗowtanake ɗe,

⁴nden kam mi toɓnanan on iyeele nder saa'iije maaje, haa lesdi waɗa ƴaamle, leɗɗe nder ladde boo ndima ɓiɓɓe.

⁵Alkamaari mon ɗuuɗan masin. Hiddeko on timmina fiyugo ndi, on ittan inabooje. Diga on timminaay teɓugo inabooje tawon, saa'i aawugo yaaltan. On nyaaman, on kaaran, on njooɗoto jam nder lesdi mon.

⁶Mi hokkan on salaaman nder lesdi mon. On mbaaloto jam, walaa kulnanɗo on. Mi nattinan dabbaaji mbarooji nder lesdi, konu meetataa laataago nder lesdi mon.

⁷On ndiiwan konne'en mon, on mbaran ɓe bee kaafaaje mon.

⁸Njowo mooɗon ndiiwan teemerre, teemerre mon boo ndiiwan ujine sappo, on mbaran konne'en mon bee kaafaaje.

⁹Mi barkiɗinan on bee ɓikkoy ɗuuɗkoy, mi tabitinan alkawal am bee mooɗon.

¹⁰Diga on timminaay alkamaari rowaniiri tawon, on codan hikkaari. Doole on ngudina rowaniiri, haa keɓon babal wallingo kesri.

¹¹Mi jooɗoto caka mooɗon nder jooɗorde am, mi meeɗataa wanyugo on.

¹²Mi wondan bee mooɗon, mi laatoto Allah mon, onon boo on laatoto ummaatoore am.

¹³Min Jawmiraawo Allah mon mi wurtini on lesdi Misra, ngam taa on tokko huuwango ɓe bana maccuɓe. Mi yewi kaɓɓirgal dow daaɗe mon, haa on njaha on rimɓe, on ɓaŋgta ko'e mon.”

¹⁴Jawmiraawo ɓesdi wi'ugo: “Ammaa to on ɗowtanaaki yam, to on tokkaaki umrooje ɗe'e fuu,

¹⁵to on ngudini farillaaji am, to on nganyi kiitaaji am, to on ɗowtanaaki umrooje am fuu, to on piisti alkawal am,

¹⁶nden kam mi hiitoto on. Mi ukkanan on kultoreeŋgol, mi nyawnan on nyawuji ciiɓanɗi on e jonte, haa gite mon tampa, tum semmbe mon ustan. On aawan gese mon, ammaa on naftortaa ɗe, ngam konne'en mon njaɓtan ƴaamle mon.

¹⁷Mi honan on, haa konne'en mon njaalo on, wanyɓe on laamano on. On ndoggan ngam kulol, koo to diiwanɗo on walaa.

¹⁸To on ɗowtanaaki yam ɓaawo kuuje ɗe'e fuu, nden kam mi ɗuɗɗinan kiitaaji dow hakkeeji mooɗon cowi joweeɗiɗi.

¹⁹Mi ittan baawɗe ɗe on maŋgtorto. Mi haɗan asama toɓnugo iyeende. Lesdi mon yooran, saatan bana njamndi mboɗeeri.

²⁰On torroto meere, ngam lesdi mon ƴaamnataa, leɗɗe boo ndimataa ɓiɓɓe.

²¹To on tokkake tuurtango yam, to on calake ɗowtanaago yam, nden kam mi ɗuɗɗinan kiitaaji dow hakkeeji mooɗon cowi joweeɗiɗi fahin.

²²Mi neldan dabbaaji ladde caka mooɗon, ɗi mbara ɓikkoy mon, ɗi nattina dabbaaji mon, ɗi usta on, ɗi perwina laabi mon.

²³To on tokkake tuurtango yam, to on njaɓaay elto tawon,

²⁴nden kam mi honan on, mi ɓesdan saatingo kiitaaji dow hakkeeji mon cowi joweeɗiɗi.

²⁵Mi ukkan kaafahi dow mooɗon, mi waatoto on ngam on piisti alkawal bee am. To on ɗaɓɓiti hisrude nder berniiji mon, mi nyawnan on nyawu kalluŋgu ndaaɓoowu, mi hokkan on haa juuɗe konne'en mon.

²⁶Mi sooynan on nyaamdu. Tamsirde woore he'an rewɓe sappo sa'ugo tamseeje muuɗum'en. Ɓe poondanan on ɗe dow awnorɗum. On nyaaman ɗe, ammaa on kaarataa sam.

²⁷To on tokkake tuurtango yam ɓaawo kiitaaji ɗi'i fuu, to on calake ɗowtanaago yam,

²⁸nden kam mi honan on bee tikkere, mi tullitinan kiitaaji dow hakkeeji mon cowi joweeɗiɗi fahin.

²⁹On nyaaman kusel ɓikkoy mon ngam daliila weelo.

³⁰Mi nattinan nokkuuje mon towɗe, mi yibbinan gulduɗe uureteeɗum, mi sakkinan nyawmanɗe mon dow labbi mon pe'aaɗi. Mi wanyan on,

³¹haa mi laatina berniiji mon bille. Mi yibbinan cuuɗi mon cenaaɗi, mi jaɓataa uureeŋgol kirseteeɗi mon.

³²Mi laatinan lesdi mon ladde meere, haa konne'en mon waranɓe ton kayɗina.

³³Mi saŋkitan on nder ummaatooje goɗɗe, mi fartan on bee kaafahi losaaki. Lesdi mon laatoto ladde meere, berniiji mon laatoto bille.

³⁴Nden kam lesdi seyorto kitaale ciwtorɗe ɗe caliiɗon hokkugo ndi. Ndi ferwan, ndi siwtoto, saa'i on ɗon paɓɓa nder lesɗe konne'en mon.

³⁶Luttanɓe mon nder lesɗe konne'en mon, mi waɗan kulol maŋngol nder ɓerɗe maɓɓe. Koo sonyo haako yoorko nder henndu dogginan ɓe. Ɓe ndoggan bana to kaafahi tokkake ɓe, ɓe ndo'oto koo to diiwanɗo ɓe walaa.

³⁷Goɗɗo do'oto dow goɗɗo bana do'otooɓe yeeso kaafahi, koo to diiwanɗo ɓe walaa. Saa'i man on mbaawataa dartaago yeeso konne'en mon.

³⁸On kalkan caka ummaatooje, lesdi konne'en mon moɗan on.

³⁹Luttanɓe mon nder lesɗe konne'en mon njinnan ngam daliila aybeeji maɓɓe e aybeeji kaakiraaɓe maɓɓe.

⁴⁰Nden ɓe mbaŋginan aybe maɓɓe e aybe kaakiraaɓe maɓɓe yeeso am, ngam ɓe ngewi umroore am, ɓe tuurtani yam.

⁴¹Daliila man mi honi ɓe, mi dahi ɓe nder lesɗe konne'en maɓɓe. Nden ɓe annditan sooynde ɗowtaare maɓɓe, ɓe leestinan ko'e maɓɓe, ɓe njaɓan kiita dow aybe maɓɓe.

⁴²Saa'i man mi siftoran alkawal am bee Yaakubu e Isiyaaku e Ibrahiima, mi siftoran lesdi boo.

⁴³Ammaa sey lesdi sooya yimɓe tawon, ngam ndi seyoro siwtaare maari wakkati ɓe ɗon ndaayi bee maari. Kamɓe boo, sey ɓe njoɓa aybe maɓɓe tawon, ngam ɓe njawi kiitaaji am, ɓe nganyi farillaaji am.

⁴⁴Ammaa koo to ɓe ɗon nder lesɗe konne'en maɓɓe, mi wudintaa ɓe, mi wanyataa ɓe. Mi nattintaa ɓe, mi fiistataa alkawal am bee maɓɓe, ngam min woni Jawmiraawo Allah maɓɓe.

⁴⁵Mi yejjitittaa alkawal am bee kaakiraaɓe maɓɓe ɓe ngurtinmi lesdi Misra yeeso ummaatooje, haa mi laato Allah maɓɓe. Min woni Jawmiraawo.”

⁴⁶Kanjum woni farillaaji e kiitaaji e umrooje ɗum Jawmiraawo tabitini hakkunde muuɗum bee Isra'iila'en dow hooseere Sina bee hunnduko Muusa.