Read Fulfulde Farillaaji Lewi'en 6 Bible Online

Farillaaji Lewi'en 6 - Fulfulde bible

Farillaaji Lewi'en 6

¹Jawmiraawo wi'i Muusa:

²“Umru Haruna e ɓiɓɓe mum ni'i: Ndaa umroore dow guleteeɗi. Sey nguleteeŋga waala dow hirsirde haa fajiri, yiite boo waala huɓɓugo dow maare.

³Nden limanjo ɓorno toggoore leŋ e gajeere leŋ. O itta ndoondi guleteeɗi dow hirsirde, o jippina ndi baŋnge maare.

⁴Nden o ɓorto limce maako, o ɓorno limce goɗɗe. Ɓaawo man o yahra ndoondi yaasi saŋngeere haa nokkuure senaande.

⁵Taa yiite dow hirsirde nyifa sam. Nde weeti fuu, limanjo wallina leɗɗe dow maage, taaskitina guleteeɗi dow maage, wula ɓellere kirsaaɗi ngam kawtal yimɓe bee Allah dow maage boo.

⁶Yiite tokko huɓɓugo dow hirsirde, taa nge nyifo sam.”

⁷“Ndaa umroore dow dokke nyaamdu. Limanjo mo danygol Haruna lii'ano Jawmiraawo dokkal nyaamdu yeeso hirsirde.

⁸Nden o hoo'a kuroori ɗiggundi njiiɓaandi bee nebbam go, deydey tamndande, non boo uurle fuu. O wula ɗum dow hirsirde, ɗum geɗal ciftinorgal. Uureeŋgol maajum belŋgol fottanan Jawmiraawo.

⁹Liman'en nyaama luttuɗum. Ɓe mbaɗa tamseeje ɗe ufnaaka bee man, ɓe nyaama ɗe haa nokkuure seniinde, haa daldal laymaaru fottirde.

¹⁰Taa ɓe tamsa ɗum bee ufnirɗum. Jawmiraawo hokki ɓe ɗum, ɗum geɗal maɓɓe haa dokke guleteeɗe ngam Jawmiraawo. Ɗum ɓurɗum senaago, bana kirseteeɗi ngam ittuki hakkeeji e joɓki aybeeji boo.

¹¹Ɗum farilla nduumiika haa gide mon fuu: Koo moy gorko mo danygol Haruna nyaama ɗum. Ɗum geɗal maɓɓe haa dokke lii'anaaɗe Jawmiraawo. To goɗɗo feere meemi ɗum, o senoto.”

¹²Ndaa umroore nde Jawmiraawo hokki Muusa

¹³dow nastinki limanjo mo danygol Haruna nder kuugal mum: “Nyalaade ɓe nastinta mo nder kuugal maako, sey o lii'ano Jawmiraawo kuroori ɗiggundi kilo tati, reeta man fajiri, reeta boo kiikiiɗe, kal-kal bee dokkal nyaamdu nyalaade nyalaade.

¹⁴O jiiɓa ndi bee nebbam, o sa'a[4] ɗum dow beɗol njamndi. Nden o feta ɗum, o wula ɗum, ɗum laato uureeŋgol belŋgol pottananŋgol Jawmiraawo.

¹⁵Koo moy mo danygol Haruna, mo laatoto hooreejo liman'en, lii'o dokkal nga'al. Ɗum dokkal guleteeŋgal ngam Jawmiraawo. Kanjum woni farilla nduumiika.

¹⁶Dokkal nyaamdu ngal limanjo hokkata, ngal guleteeŋgal fuu, ngal nyaamataake.”

¹⁷Jawmiraawo wi'i Muusa:

¹⁸“Umru Haruna e ɓiɓɓe mum umroore dow kirseteeɗi ngam ittuki hakkeeji. Sey ɓe kirsa ndabbaawa ngam ittuki hakkeeji haa wakeere hirsirde woylaare, haa nokkuure nde ɓe kirsata guleteeɗi boo. Kirseteeŋga nga'a nga ɓurŋga senaago.

¹⁹Limanjo lii'otooɗo kirseteeŋga man, nyaama nga haa nokkuure seniinde, haa daldal laymaaru fottirde.

²⁰To goɗɗo feere meemi kusel maaga, senaare maaga torran mo. To ƴiiƴam maaga seɗɗa wiccake haa limce goɗɗo, sey o loota pellel haa ƴiiƴam meemi haa nokkuure seniinde.

²¹To limanjo defi kusel maaga nder fayannde loope, sey o fusa nde. Ammaa to o defi ngel nder fayannde njamndi, sey o yigga nde, o lalla nde.

²²Worɓe fuu nder asli liman'en nyaaman kusel man, ngel ɓurŋgel senaago.

²³Ammaa to limanjo yahri ƴiiƴam kirseteeŋga nder laymaaru fottirde ngam ittuki hakkeeji, nden kam kusel maaga nyaamataake, sey o wula ngel fuu.”