Read Fulfulde Farillaaji Lewi'en 7 Bible Online

Farillaaji Lewi'en 7 - Fulfulde bible

Farillaaji Lewi'en 7

¹“Ndaa umroore dow kirseteeɗi ngam joɓki aybeeji. Ɗi ɓurɗi senaago.

²Sey ɓe kirsa ndabbaawa ngam joɓki aybeeji haa wakeere hirsirde woylaare, haa nokkuure nde ɓe kirsata guleteeɗi boo. Ɓe mbicca ƴiiƴam maaga haa bakeeje hirsirde man nayi fuu.

³Ɓe koo'a ɓellere maaga fuu, waato wicco e ɓellere suddunde kuuje reedu

⁴e ɓooƴe bee ɓellere wonnde dow maaje e ɓellere dow heŋre.

⁵Limanjo wula ɗum fuu dow hirsirde, ɗum nyaamdu wuleteendu ngam Jawmiraawo. Kanjum woni kirseteeŋga ngam joɓki aybeeji.

⁶Worɓe fuu nder asli liman'en nyaaman kusel maaga. Sey ɓe nyaama ngel haa nokkuure seniinde ngam ngel ɓurŋgel senaago.

⁷Woodi umroore woore dow kirseteeɗi ngam ittuki hakke e joɓki aybe ɗiɗi fuu: Kusel maaji laatanto limanjo lii'otooɗo ɗi.

⁸Non boo laral ndabbaawa nguleteeŋga laatanto limanjo lii'otooɗo nga.

⁹Dokkal nyaamdu koo ngale defaaŋgal nder fayannde malla ca'aaŋgel[5] dow beɗol njamndi, laatanto limanjo lii'otooɗo ngal.

¹⁰Ammaa dokke kuroori njiiɓaandi bee nebbam malla jiiɓaaka, kanje laatanto liman'en danygol Haruna fuu, ɓe cennda ɗe hakkunde maɓɓe.”

¹¹“Ndaa umroore dow kirseteeɗi ngam kawtal yimɓe bee Allah, ɗi lii'antooɗon Jawmiraawo.

¹²To goɗɗo waddi kirseteeŋga nga'a ngam yettugo Allah, sey o wadda ndabbaawa hawtaade bee dokkal tamseeje ɗe ufnaaka. O wadda tamseeje ɗe kuroori ɗiggundi njiiɓaandi bee nebbam malla tamseeje bette gujaaɗe bee nebbam malla tamre kuroori ɗiggundi njiiɓaandi bee nebbam.

¹³O ɓesda boo tamseeje ufnaaɗe dow dokkal maako ngal o yettirta Allah.

¹⁴Sey o lii'ano Jawmiraawo yeɓre dokkal maako woore, nde laatanto limanjo dufanɗo ƴiiƴam kirseteeŋga maako haa les hirsirde.

¹⁵Ammaa kusel kirseteeŋga ngam kawtal yimɓe bee Allah, ngam yettugo Allah, nyaame nyalaade ɓe kirsata nga, taa ngel lutta haa jaŋngo man.

¹⁶To goɗɗo waddi kirseteeŋga nga'a ngam o hebbina togayeere malla to ɗum dokkal caahiiŋgal, nden kam ɓe nyaama nga nyalaade ɓe kirsata nga, jaŋngo man boo ɓe nyaama ko lutti.

¹⁷Ammaa ko lutti haa nyannde tataɓre, sey ɓe ngula ɗum.

¹⁸To ɓe nyaami kusel luttuŋgel nyannde tataɓre, Allah yerdataako goɗɗo oo. Allah limantaa mo nga, nga coɓŋga. Koo moy nyaami kusel man, nastini hoore mum nder aybe.

¹⁹Kusel ngel meemi coɓɗum koo ɗume, nyaamataake, sey wulugo ngel. Koo moy cenaaɗo to yiɗi, nyaama kusel kirseteeŋga nga'a.

²⁰Ammaa to goɗɗo coɓɗo nyaami kirsaaŋga lii'anaaŋga Jawmiraawo ngam kawtal yimɓe bee Allah, o gurtinteeɗo jama'aare maako.

²¹Non boo to o meemi coɓɗum koo ɗume haa yimɓe malla dabbaaji malla ladooji, nyaami kusel maaga, o gurtinteeɗo diga jama'aare maako.”

²²Jawmiraawo umri Muusa,

²³o wi'a Isra'iila'en ni'i: “Taa on nyaama ɓellere na'i malla baali malla be'i sam.

²⁴To ndabbaawa waati malla to huunde ladde faɗɗi nga, on mbaawan huuwtinirgo ɓellere maaga ngam kuuɗe feere feereeje, ammaa taa on nyaama nde.

²⁵Dabbaaji potanɗi ngam on lii'ano ɗi Jawmiraawo guleteeɗi, to goɗɗo nyaami ɓellere maaji, o gurtinteeɗo diga jama'aare maako.

²⁶Koo toy on njooɗoto fuu, taa on nyaama ƴiiƴam dabbaaji malla colli.

²⁷To goɗɗo nyaami ƴiiƴam, o gurtinteeɗo diga jama'aare maako.”

²⁸Jawmiraawo umri Muusa,

²⁹o wi'a Isra'iila'en ni'i: “Koo moy lii'otooɗo kirseteeŋga ngam kawtal yimɓe bee Allah, sey o waddana Jawmiraawo dokkal diga kirseteeŋga man.

³⁰Geɗal Jawmiraawo guleteeŋgal, sey o wadda ngal bee juuɗe maako: Ɓellere ndabbaawa e biiwol maaga. O ɓaŋgta biiwol man yeeso Jawmiraawo.

³¹Limanjo wula ɓellere dow hirsirde, ammaa biiwol laatanto liman'en.

³²Daŋgo nyaamo woni geɗal limanjo, ittaaŋgal diga kirseteeŋga ngam kawtal yimɓe bee Allah.

³³Kaŋgo woni geɗal limanjo ɓii Haruna lii'otooɗo ƴiiƴam e ɓellere kirsaaŋga ngam kawtal yimɓe bee Allah.

³⁴Biiwol maaga woni dokkal, daŋngo nyaamo boo woni geɗal ittaaŋgal haa kirsaaŋga nga'a. Jawmiraawo hoo'i ɗum haa Isra'iila'en, yeɗi ɗum liman'en. Kanjum ɗum farilla nduumiika ngam Isra'iila'en.

³⁵Kanjum woni geɗal Haruna e ɓiɓɓe mum haa dokke guleteeɗe ngam Jawmiraawo. Ɓe keɓi ngal nyalaade ɓe kalfitinaama kuugal maɓɓe.

³⁶Nyalaade man Jawmiraawo umri Isra'iila'en ndokka liman'en geɗal man haa kirseteeɗi maɓɓe. Ɗum farilla nduumiika haa gide maɓɓe fuu.”

³⁷Kanjum woni umrooje dow guleteeɗi e dokke nyaamdu e kirseteeɗi ngam ittuki hakkeeji e kirseteeɗi ngam joɓki aybeeji e dokkal ngam nastuki kuugal limanku e kirseteeɗi ngam kawtal yimɓe bee Allah.

³⁸Jawmiraawo umri Muusa umrooje ɗe'e haa hooseere Sina nder ladde, nyalaade o umri Isra'iila'en ɓe lii'ano mo dokke maɓɓe.