Read Fulfulde Farillaaji Lewi'en 9 Bible Online

Farillaaji Lewi'en 9 - Fulfulde bible

Farillaaji Lewi'en 9

¹Nde asaweere kalfitinki kuugal timmi, jaŋngo man Muusa ewni Haruna e ɓiɓɓe mum e ndotti'en Isra'iila.

²O wi'i Haruna: “Hoo'u ngaari kalhaldi kirseteendi ngam ittuki hakkeeji e njawdiri mbaalu nguleteendi, ɗiɗi fuu ɗi ngalaa aybe. Lii'ana ɗi Jawmiraawo.

³Nden yeccu Isra'iila'en ɓe koo'a njawdiri mbeewa kirseteendi ngam ittuki hakkeeji e gaggel ngel nduuɓu e jawgel mbaalu ngel nduuɓu ɗum nguleteeɗum, ɗum fuu ɗum walaa aybe

⁴e ngaari kalhaldi e njawdiri mbaalu, ɗi kirseteeɗi ngam kawtal yimɓe bee Allah. Ɓe lii'ano ɗi Jawmiraawo hawtaade bee dokkal nyaamdu njiiɓaaŋgal bee nebbam. Ngam Jawmiraawo waŋganan ɓe hannde.”

⁵Ko Muusa umri ɓe, ɓe ngaddi ɗum fuu yeeso laymaaru fottirde. Jama'aare fuu mooɓi ton, dari yeeso Jawmiraawo.

⁶Muusa wi'i ɓe: “Jawmiraawo umri on waɗugo ɗum fuu, ngam haa tedduŋgal maako waŋgana on.”

⁷Nden o wi'i Haruna: “Yah haa hirsirde, lii'a kirseteeŋga e nguleteeŋga ngam ittuki hakke ma e hakkeeji yimɓe. Lii'a kirseteeŋga ngam ittuki hakkeeji yimɓe, bana Jawmiraawo umri ɗum.”

⁸Haruna yehi haa hirsirde, hirsi ngaari kalhaldi ngam ittuki hakke muuɗum.

⁹Ɓiɓɓe maako ngaddani mo ƴiiƴam maari. O suuwi hoondu maako nder maajam, o wuji ɗam haa luwe hirsirde. O rufi ƴiiƴam luttuɗam haa les hirsirde.

¹⁰Nden o hoo'i ɓellere e ɓooƴe e ɓellere dow heŋre ngam ittuki hakke go, o wuli ɗum dow hirsirde, bana Jawmiraawo umruno Muusa.

¹¹Ammaa kusel e laral, o wuli ɗum yaasi saŋngeere.

¹²Nden Haruna hirsi nguleteeŋga mum. Ɓiɓɓe maako ngaddani mo ƴiiƴam maaga. O wicci ɗam haa bakeeje hirsirde man nayi fuu.

¹³Ɓe ndokki mo hoore maaga e geɓe maaga feere, o wuli ɗe dow hirsirde.

¹⁴Nden o looti teteki maaga e kolce maaga, o wuli ɗum dow hirsirde, haa dow ngulaaŋga.

¹⁵Ɓaawo man o lii'i dokkal yimɓe. O hoo'i njawdiri mbeewa kirseteendi ngam ittuki hakkeeji maɓɓe. O hirsi ndi, o lii'i ndi bana kirsaaŋga naane ngam ittuki hakke maako.

¹⁶O waddi boo gaggel e njawdiri guleteeɗum, o lii'i ɗum fodde umroore.

¹⁷O lii'i dokkal nyaamdu, o hoo'i haa maagal deydey tamndande, o wuli ɗum dow hirsirde. Kanjum woni ɓesdaari dow nguleteeŋga fajiri fajiri.

¹⁸Nden o hirsi ngaari kalhaldi e njawdiri mbaalu ngam kawtal yimɓe bee Allah. Ɓiɓɓe maako ngaddani mo ƴiiƴam maaji, o wicci ɗam haa bakeeje hirsirde man nayi fuu.

¹⁹Ɓe koo'i ɓellere ngaari e wicco njawdiri e ɓellere suddunde teteki e ɓooƴe e ɓellere dow heŋre,

²⁰ɓe mballini ɗum dow biiwol ngaari e biiwol njawdiri. Haruna wuli ɓellere fuu dow hirsirde.

²¹O ɓaŋgti biiwi e daŋngo nyaamo yeeso Jawmiraawo, bana Muusa umruno mo.

²²Nde Haruna timmini lii'aago kirsaaɗi ɗi'i fuu: Waato ngam ittuki hakke e guleteeŋga e ngam kawtal yimɓe bee Allah, o ɓaŋgti juuɗe maako dow yimɓe, o barkiɗini ɓe, nden o jippi.

²³Muusa e Haruna nasti laymaaru fottirde. Nden ɓe ngurti, ɓe mbarkiɗini yimɓe. Tedduŋgal Jawmiraawo waŋgani ɓe fuu.

²⁴Jawmiraawo jippini yiite, nge nyaami nguleteekoy e ɓellere dow hirsirde. Yimɓe ummaatoore fuu ngi'i ɗum, ɓe kooli bee seyo. Nden ɓe cujidi.