Read Fulfulde Yeremiya 1 Bible Online

Yeremiya 1 - Fulfulde bible

Yeremiya 1

¹Ndaa bolle Yeremiya ɓii Hilkiyya, gooto caka liman'en Anatot nder lesdi Benyamin.

²Jawmiraawo wolwani Yeremiya nder zamanu Yusiya ɓii Amon, laamiiɗo Yahuuda, nder nduuɓu laamu maako sappo e tataɓu.

³Jawmiraawo wolwani mo fahin nder zamanu Yooyakim ɓii Yusiya, laamiiɗo Yahuuda, haa wargo timmoode nduuɓu sappo e go'oowu nder laamu Sedekiya ɓii Yusiya, laamiiɗo Yahuuda, haa konne'en ndahi yimɓe Urusaliima, nder lewru jowaɓru.

⁴Jawmiraawo wolwani yam, wi'i:

⁵“Hiddeko mi waɗe nder reedu daada ma, mi anndi ma. Hiddeko a danye, mi seni ma, mi darni ma a annabiijo ngam ummaatooje.”

⁶Ammaa min mi wi'i: “Kayya, yaa Jawmiraawo Allah! Mi anndaa wolwugo, ngam mi derkeejo!”

⁷Jawmiraawo jaabi yam: “Taa wi': Mi derkeejo. Ammaa yah haa yimɓe ɓe mi nelete haa muuɗum'en fuu, wi' ɓe ko mi umrete fuu.

⁸Taa hul ɓe, ngam mi ɗon wondi bee ma ngam hisnugo ma.” Non Jawmiraawo wi'i.

⁹Nden o forti juŋngo maako, o meemi hunnduko am, o wi'i yam: “Ndaa, mi waɗi bolle am nder hunnduko maaɗa.

¹⁰Hanndeere nde'e mi darni ma dow ummaatooje e laamuuji ngam ɗoofugo e fe'ugo, ngam halkugo e yibbingo, ngam nyiɓtaago e jubaago.”

¹¹Jawmiraawo wolwani yam, wi'i: “Yeremiya, ɗume a yi'ata?” Mi jaabi: “Mi ɗon yi'a lisal lawjahi[1].”

¹²Jawmiraawo wi'i: “A yi'i booɗɗum, ngam mi ɗon hakkilana[2] wolde am haa mi hiɓɓina nde.”

¹³Jawmiraawo wolwani yam ɗiɗawre, wi'i: “Ɗume a yi'ata?” Mi jaabi: “Mi ɗon yi'a fayannde waywannde. Hunnduko maare wuuri, ɗon ɓula diga woyla.”

¹⁴Jawmiraawo wi'i yam: “Diga woyla sarru ukkanto yimɓe lesdi ndi'i fuu,

¹⁵ngam mi ɗon ewno yimɓe asli fuu diga laamuuji woyla.” Non Jawmiraawo wi'i. “Kanji ɗi ngaran, ɗi njo'ina leese laamu maaji yeeso nastirɗe Urusaliima, yeeso mahi taariiɗi ngol fuu, ɗi konan berniiji Yahuuda fuu.

¹⁶Mi do'an Yahuudu'en kiita daliila halleende maɓɓe fuu. Ɓe acci yam, ɓe ngulani ɗowanteeɓe woɗɓe uurle, ɓe cujidani ko juuɗe maɓɓe mbaɗi.

¹⁷Ammaa an, taada, yah yeccu ɓe ko mi umrete fuu. Taa hultor daliila maɓɓe, ngam taa mi hulne yeeso maɓɓe.

¹⁸Ndaa, mi darni ma hannde a berniwol cemmbiɗŋgol, a daŋraŋgal njamndi e gasol njamndi mboɗeeri yeeso lesdi fuu, yeeso laamiiɓe Yahuuda e ardiiɓe, yeeso liman'en e yimɓe lesdi.

¹⁹Ɓe konete, ammaa ɓe njaalataako ma ngam mi ɗon wondi bee maaɗa ngam hisnugo ma.” Non Jawmiraawo wi'i.