Read Fulfulde Yeremiya 11 Bible Online

Yeremiya 11 - Fulfulde bible

Yeremiya 11

¹Jawmiraawo wolwani Yeremiya, wi'i:

²“Nan bolle alkawal nga'al, anndin ɗe yimɓe Yahuuda e jooɗiiɓe haa Urusaliima.

³Yeccu ɓe: Ndaa nii Jawmiraawo Allah Isra'iila wi'i: Naaloore dow neɗɗo mo ɗowtantaako bolle alkawal nga'al.

⁴Mi haɓɓi ngal bee kaakiraaɓe mooɗon, nyannde nde mi wurtini ɓe lesdi Misra, haa ɓolinirde ngam ɓolingo njamndi. Mi wi'i ɓe: Naneeɗam, mbaɗe ko mi umrata on fuu. Nden kam on laatoto ummaatoore am, min boo mi laatoto Allah mooɗon.

⁵Bana nii kebbiniranmi hunayeere am nde kunaniimi kaakiraaɓe mooɗon, haa mi hokka ɓe lesdi keewndi kosam e njumri, bana ko laati hannde.” Mi jaabi: “Ooho, yaa Jawmiraawo!”

⁶Nden Jawmiraawo wi'i Yeremiya: “Saala caka gure Yahuuda e laabi Urusaliima. Wooynu ko mbi'mi fuu, wi' yimɓe: Nane bolle alkawal nga'al, mbaɗe ko ɗe mbi'i on!

⁷Nde mi wurtini kaakiraaɓe mooɗon lesdi Misra, mi barri ɓe ɗuuɗɗum haa ɓe ɗowtano bolle am. Mi tokki barraago[11] ɓe haa wargo hannde.

⁸Ammaa ɓe nanaay, ɓe kakkilaay. Koo moy tokki ɓernde mum saatunde, hallunde. Mi umri ɓe ɓe ɗowtano alkawal, ammaa ɓe cali. Ngam maajum mi ukkani ɓe kiita ka winnda nder maagal fuu.”

⁹Nden Jawmiraawo wi'i Yeremiya: “Yimɓe Yahuuda e jooɗiiɓe haa Urusaliima ɗon kaɓɓa dabare dow am.

¹⁰Ɓe lori haa hakkeeji kaakiraaɓe maɓɓe saliiɓe ɗowtanaago bolle am, ɓe tokki ɗowanteeɓe woɗɓe, ɓe ɗowtani ɓe. Yimɓe Isra'iila e yimɓe Yahuuda piisti alkawal ngal kaɓɓumi bee kaakiraaɓe maɓɓe.

¹¹Ngam maajum ndaa nii Jawmiraawo wi'i: mi ukkanan ɓe sarru, ɓe mbaawataa daɗugo ngu. To ɓe torake yam, mi nanataa ɓe.

¹²Nden berniiji Yahuuda e jooɗiiɓe haa Urusaliima njahan toraago labbi ɗi ɓe ngulani ɗi uurle. Ammaa ɗi mbaawataa hisnugo ɓe, saa'i sarru go ukkanto ɓe.

¹³Labbi lesdi Yahuuda ɗuuɗi bana gure maɓɓe. Bana limgal laabi nder Urusaliima, bana non limgal kirsirɗe ɗe ɓe ndarni ngam wulango Ba'al uurle.

¹⁴An Yeremiya, taa do'ana yimɓe ɓe'e, taa tora ngam maɓɓe! To ɓe mboyani yam nder saa'iire sarru, mi nanataa ɓe.”

¹⁵Jawmiraawo wi'i: “Yimɓe ɓe'e ɓe ngiɗmi, ɗon mbaɗa halleende. Ɗume ɓe ɗaɓɓata nder suudu am jonta? Ɓe tammo togayeeje e kusel kirsanaaŋgel labbi hisnan ɓe sarru na?[12]

¹⁶Naane mi ewni ɓe jaytunhi kecci, dimoohi ɓenndalooje booɗɗe. Ammaa jonta, bee hoolo bana felmaaŋgo kuɓɓanmi yiite haa haakooji maaki, mi yewan lice maaki.

¹⁷Min Jawmiraawo honooɓe asama mi jo'ini Isra'iila e Yahuuda. Ammaa jonta ewniimi sarru dow maɓɓe, ngam ɓe mbaɗi kalluɗum: Ɓe ngulani Ba'al uurle, kanjum tikkini yam.”

¹⁸Yeremiya wi'i: “Jawmiraawo anndini no wanywanyɓe maako kaɓɓiri dabare dow maako.

¹⁹Min maa, mi laatino bana jawgel beeɓŋgel ngel ɓe njahrata hirseego. Mi anndaano ɓe ɗon kaɓɓa dabare dow am. Ɓe mbi'i: Pe'enma lekki, saa'i ki kecci tawon. Itten mo diga lesdi yeeɗɓe, ngam taa goɗɗo siftora innde maako!”

²⁰Nden Yeremiya waɗi do'a: “Yaa Jawmiraawo honooɓe asama, an woni kiitoowo gooŋgaajo, a ɗon linya ɓerɗe e numooji yimɓe. Accu mi yi'a no a waatorto ɓe, ngam mi halfitinani ma haala am!

²¹Ndaa ko Jawmiraawo wi'i dow yimɓe Anatot ɗaɓɓuɓe mbarugo yam. Ɓe mbi'i ɓe mbaratam, to mi tokkake waɗugo annabaaku bee innde Jawmiraawo!

²²Ngam maajum Jawmiraawo honooɓe asama wi'i: Mi hiitoto ɓe. Suka'en maɓɓe maayran bee kaafahi, ɓiɓɓe maɓɓe worɓe e rewɓe maayran bee weelo.

²³Walaa koo gooto maɓɓe luttata, ngam mi ukkan sarru dow yimɓe Anatot, nder hitaande nde ta'umi ngam hiitaago ɓe.”