Read Fulfulde Yeremiya 23 Bible Online

Yeremiya 23 - Fulfulde bible

Yeremiya 23

¹Jawmiraawo wi'i: “Kayto! Ardiiɓe yimɓe am ɓe halluɓe! Ɓe acci yimɓe am majja, caŋkito.”

²Ndaa nii Jawmiraawo Allah Isra'iila wi'i dow ardiiɓe ɗowanɓe ummaatoore muuɗum: “On caŋkiti yimɓe am, on ndiiwi ɓe, on kakkilanaay ɓe sam. Ngam maajum kiitotoomi on ngam kuuɗe mon kalluɗe.

³Mi mooɓtan yimɓe am luttuɓe diga lesɗe haa ndiiwmi ɓe fuu, mi hooran ɓe haa lesdi maɓɓe, ɓe ndanyndanytiran, ɓe ɗuuɗan.

⁴Mi darnan ardiiɓe dow maɓɓe ngam hakkilango ɓe, ngam taa ɓe meeta hulugo koo hultorgo koo majjugo.” Non Jawmiraawo wi'i.

⁵Jawmiraawo wi'i: “Saa'i ɗon wara haa mi suɓa goɗɗo mo danygol Daawuda bi'eteeɗo Fuɗŋgo, o adiliijo. O laatoto laamiiɗo, o laamoto bee faamu, o tabitinan kiita ngooŋɗuka e adilaaku nder lesdi.

⁶Nder balɗe maako Yahuuda rimɗinte, Isra'iila boo jooɗoto jam. Yimɓe ewnoto laamiiɗo oo: Jawmiraawo-woni-adilaaku-meeɗen.”

⁷Jawmiraawo wi'i: “Saa'i ɗon wara nde kunotooɗo meetataa wi'ugo: Fakat bana Jawmiraawo mo wurtini yimɓe Isra'iila e Misra o geeto.

⁸Ammaa o wi'an: Fakat Jawmiraawo o geeto. Kaŋko wartiri yimɓe Isra'iila diga lesdi woyla e lesɗe ɗe o saŋkitino ɓe fuu haa ɓe njooɗo nder lesdi maɓɓe.”

⁹Ndaa ko Yeremiya wi'i dow annabi'en: “Ɓernde am ta'i, ɓanndu am fuu ɗon diwna ngam daliila Jawmiraawo, ngam bolle maako ceniiɗe. Mi laati bana guykuɗo mo nguykinoojam naŋngi ɗum.

¹⁰Lesdi heewi jeenooɓe, yimɓe ɗon njaawɗa waɗugo ko halli, ɓe semmbiɗɓe waɗugo ko haanaay. Naaloore Jawmiraawo ɗon dow lesdi. Ngam maajum ndi ɗon nder suno, durduɗe fuu ɗayli.

¹¹Jawmiraawo wi'i: Annabi'en e liman'en mbonnake, mi tawi halleende maɓɓe koo nder suudu am boo.

¹²Ngam maajum laawol maɓɓe laatoto laawol moostanŋgol e nyiɓɓuŋgol. Mi waɗan ɓe pergo, ɓe ndo'o. Mi ukkan ɓe sarru, ngam saa'i kiita maɓɓe ɓadake, non Jawmiraawo wi'i.

¹³Mi yi'i faataare annabi'en haa Samariya. Ɓe mbaɗi annabaaku bee innde Ba'al, ɓe majjini ummaatoore am Isra'iila.

¹⁴Ammaa mi yi'i annabi'en haa Urusaliima ɗon mbaɗa ko ɓuri nyiddugo. Ɓe ɗon mbaɗa njeenu, ɓe ɗon mbolwa pewe, ɓe ɗon mballa waɗooɓe zunuuba, ngam taa goɗɗo acca waɗugo ko halli. Haa gite am, ɓe fuu ɓe laati bana Sodoma, ɓe halluɓe bana yimɓe Gomorra.

¹⁵Ngam maajum, ndaa nii Jawmiraawo honooɓe asama wi'i dow annabi'en ɓe'e: Mi nyaamnan ɓe kaaɗɗum, mi yarnan ɓe ndiyam mbaroojam. Ngam faasikaare fuu iwi haa annabi'en Urusaliima, nde saŋkiti haa lesdi fuu.”

¹⁶Ndaa nii Jawmiraawo honooɓe asama wi'i: “Taa nane bolle annabi'en. Ɓe ɗon kebbina ɓerɗe mooɗon bee tammunde meere. Ɓe ɗon anndina on ko ɓe ngi'i, ammaa ɗum iwaay haa am, ɗum iwi haa numooji maɓɓe.

¹⁷Ɓe ɗon mbi'a yawotooɓe yam: Jawmiraawo wi'i jam wondan bee mooɗon. Ɓe ɗon mbi'a saata-ko'e'en boo: Sarru ukkantaako on.”

¹⁸Moy caka annabi'en ɓe'e meeɗi jooɗaago nder dawriinde Jawmiraawo? Moy laari mo, nani habaru maako? Moy heɗiti wolde maako, hakkilani nde?

¹⁹Tikkere Jawmiraawo waran bana henndu saatundu, bana duluuru ukkantoondu ko'e halluɓe.

²⁰Nde naŋgtataako, sey to o hiɓɓini anniya maako fuu. Haa timmoode on paaman ɗum laaɓɗum.

²¹Jawmiraawo wi'i: “Min mi nelaay annabi'en ɓe'e, ammaa ɓe ndilli. Mi wolwanaay ɓe, ammaa ɓe ɗon tokko waɗugo annabaaku.

²²To ɓe ndawridino bee am, nden kam ɓe ngeccanno yimɓe am ko mbi'mi, ɓe lornanno ɓe diga laabi maɓɓe kalluɗi e kuuɗe maɓɓe kalluɗe.

²³Kadi mi Allah gi'anɗo ko ɓadi tan na? Naa non! Mi Allah gi'anɗo ko daayi boo.

²⁴Woodi nyukkotooɗo haa pellel ngel mi yi'ataa mo na? Non Jawmiraawo wi'i. Naa min woni gonɗo koo toy haa asama e dow lesdi na?

²⁵Annabi'en waɗɓe annabaaku fewre bee innde am, mi nani ko ɓe mbi'i: Mi yi'i koyɗol, mi yi'i koyɗol!

²⁶Haa ndey annabi'en ɓe'e accata estugo yimɓe am bee hasugo pewe maɓɓe malla anndingo ɓe ko numooji maɓɓe nufi?

²⁷Ɓe tammi bee yeccirgo koyɗi maɓɓe ɓe mbaɗan yimɓe am ngejjita innde am, bana kaakiraaɓe maɓɓe ngejjitirno innde am, tokki Ba'al.

²⁸Annabiijo mo yi'i koyɗol, yecca ɗum bana koyɗol. Ammaa annabiijo mo nani wolde am, sey o wolwa wolde am bee gooŋga. Kadi ƴommbal nanndi bee sammeere na?” Non Jawmiraawo wi'i.

²⁹“Wolde am nanndi bee yiite malla bee tappirɗum ko fusata tapaare.” — Non Jawmiraawo wi'i.

³⁰“Ngam maajum mi ɗon hona annabi'en ɓe'e. Ɓe ɗon koocindira bolle am, nden ɓe ngaaza ɗe bana bolle maɓɓe.

³¹Mi ɗon hona annabi'en wolwanɓe bolle muuɗum'en, nden ɓe pewa: Kaŋko wi'i ɗum.” Non Jawmiraawo wi'i.

³²“Mi ɗon hona annabi'en waazanɓe koyɗi pewooji. Ɓe ɗon majjina ummaatoore am bee pewe maɓɓe e manooje maɓɓe. Min mi nelaay ɓe, mi umraay ɓe waɗugo annabaaku, ɓe mbaawataa wallugo ummaatoore sam.” Non Jawmiraawo wi'i.

³³“An Yeremiya, to gooto nder ummaatoore am koo annabiijo koo limanjo ƴami ma: Ɗume woni koŋngol Jawmiraawo? Doŋngal[19] ngale o yowanta min? — Nden njaaba mo: Onon ngoni doŋngal Jawmiraawo. Ngam maajum o wudinan on.

³⁴To limanjo malla annabiijo malla gooto nder ummaatoore am wi'i: Ɗo woni koŋngol Jawmiraawo, nden kam mi hiitoto mo, kaŋko e saare maako fuu.

³⁵Ndikka koo moy ƴama keeddiɗɗum malla banndum: Ɗume Jawmiraawo jaabi, ɗume o wi'i?

³⁶Taa goɗɗo meeta wi'ugo: Ɗo woni koŋngol Jawmiraawo. Bolle ɗe goɗɗo man wolwata laataaki koŋngol Jawmiraawo, ammaa ɗum iwi haa maako. Yimɓe ngayli bolle Allah geeto mo Jawmiraawo honooɓe asama.

³⁷Sey a ƴama annabi'en: Ɗume Jawmiraawo jaabi, ɗume o wi'i?

³⁸To ɓe mbi'i ma: Ɗo woni koŋngol Jawmiraawo, — nden yeccu ɓe: Jawmiraawo haɗi on wolwugo bana nii, ammaa on mbolwi ɗum.

³⁹Ngam maajum, ndaa nii o wi'i: Fakat mi roondoto on dow balbe am bana goɗɗo roondorta doŋngal mum, nden mi wudinan on, onon e berniwol ngol ndokkumi on, onon e kaakiraaɓe mooɗon.

⁴⁰Mi suddan on bee jancoore duumiinde e toskaare duumiinde nde yejjitittaake.”