Read Fulfulde Yeremiya 3 Bible Online

Yeremiya 3 - Fulfulde bible

Yeremiya 3

¹“To goɗɗo seeri debbo muuɗum, debbo oo boo dilli, goɗɗo feere te'i mo. Ɗum duŋaama haa goriiko arano oo hooca mo fahin na? To o hoociti mo, ɗum soɓnataa lesdi na? Ammaa an[6] a waɗi daakaareeku bee waaye'en ɗuuɗɓe. Noy lortortoɗa haa am?” Non Jawmiraawo wi'i.

²“Tijja seɗɗa heedi towndiije cooke, laar: Woodi nokkuure haa ɓe mbaaloraaki ma na? A jooɗino haa laabi, kal-kal bee goɗɗo Arabjo nder ladde. A soɓni lesdi bee daakaareeku ma e halleende nde mbaɗɗa.

³Ngam maajum kaɗmi iyeende, a heɓaay iyeende ragareere. A debbo daakaareejo yoora-giteejo, a sali semtugo.

⁴Jonta boo a ɗon woya yeeso am: Baaba am, an woni soobaajo am diga nderkaaku am!

⁵A numi: O tikkantam haa foroy na, o limantam ɗum aybe haa abada na? Bana nii mbi'ɗa, ammaa bee non fuu a tokki waɗugo kalluɗum.”

⁶Nder zamanu laamiiɗo Yusiya, Jawmiraawo wolwani yam: “A yi'i ko Isra'iila, gudinɗo nuɗɗinki waɗi na? O yehi dow kooseeje towɗe fuu e les leɗɗe kecce fuu, o waɗi daakaareeku ton.

⁷Mi tammino, ɓaawo o waɗi ɗum fuu, o wartan haa am sike. Ammaa o wartaay. Yahuuda, deerɗiiko zammboowo boo, yi'i ɗum.

⁸O yi'i boo no mi wudiniri Isra'iila gudinɗo nuɗɗinki, no mi hokkiri mo ɗereewol ceergal ngam o waɗno njeenu. Ammaa Yahuuda, deerɗiiko zammbotooɗo, hulaay. O yehi kaŋko boo, o waɗi daakaareeku.

⁹O numaay sam, o soɓni lesdi bee daakaareeku maako, o waɗi njeenu bee rewugo kaa'e e leɗɗe.

¹⁰Bee non fuu Yahuuda, debbo zammbotooɗo go wartaay haa am bee gooŋga, sey bee fewjere.” Non Jawmiraawo wi'i.

¹¹Nden Jawmiraawo wi'i yam: “Aybe Isra'iila gudinɗo nuɗɗinki mawnaay bana aybe Yahuuda zammbotooɗo.

¹²Yah, wooynu bolle ɗe'e gal woyla: Jawmiraawo wi'i: An Isra'iila gudinɗo nuɗɗinki, lorta! Mi acci laarugo on bee tikkere, ngam mi koolniiɗo, mi tikkataa haa foroy.” Non Jawmiraawo wi'i.

¹³“Annditit aybe ma tan: A tuurtani Jawmiraawo Allah maaɗa, a rewi labbi jananni les leɗɗe kecce fuu, a nanaay bolle am.” Non Jawmiraawo wi'i.

¹⁴“Lorte, onon ɓiɓɓe tuurtuɓe, ngam min woni Jawmu mooɗon.” Non Jawmiraawo wi'i. “Mi hoo'an on, gooto haa wuro, ɗiɗo boo haa banndiraaɓe, mi wartiran on haa Siyona.

¹⁵Mi hokkan on waynaaɓe fottananɓe yam, ɓe ayna on bee hakkiilo e faamu.”

¹⁶Jawmiraawo wi'i: “To on ɓesdake, on ɗuuɗi nder lesdi, saa'i man yimɓe mbolwataa haala sundukru alkawal Jawmiraawo, ɓe numataa haala maaru, ɓe ciftortaa ndu, ɓe ɗaɓɓitittaa ndu. Walaa baɗanɗo hesru boo.

¹⁷Saa'i man ɓe ewnoto Urusaliima Leeso laamu Jawmiraawo. Ummaatooje fuu mooɓoto ton ngam teddingo innde Jawmiraawo haa Urusaliima. Ɓe meetataa tokkaago numooji ɓerɗe maɓɓe kalluɗe.

¹⁸Saa'i man yimɓe Yahuuda ngardan bee yimɓe Isra'iila, ɓe fuu maɓɓe ɓe ummoto lesdi woyla, ɓe ngara nder lesdi ndi marnumi kaakiraaɓe mooɗon.

¹⁹Mi wi'no: Fakat mi liman on caka ɓiɓɓe, mi hokkan on lesdi mboondi, maral ɓurŋgal wooɗugo caka ummaatooje. Mi wi'no: On ewnoto yam Baabiraawo, on accataa tokkaago yam sam.

²⁰Ammaa bana debbo zammborto gorum, bana non on zammborake yam, onon yimɓe Isra'iila.” Non Jawmiraawo wi'i.

²¹Nane, bojji ɗon haa towndiije cooke. Yimɓe Isra'iila ɗon mboya ngam ɓe ngayli laabi maɓɓe, ɓe ngejjiti Jawmiraawo Allah maɓɓe!

²²“Lorte, onon ɓiɓɓe tuurtooɓe, haa mi hurga tuurtol mooɗon.” Yimɓe mbi'i: “Ndaa min, min ɗon ngara haa maaɗa, ngam an woni Jawmiraawo Allah amin.

²³Fakat, sujidango labbi haa nokkuuje towɗe nafataa, hoolo dow kooseeje woni meere. Fakat, kisndam Isra'iila ɗon haa Jawmiraawo Allah amin.

²⁴Lawru semtiniindu nyaami nafuuda kuugal kaakiraaɓe amin diga saa'i min derke'en tawon, ndu nyaami dammooji maɓɓe e na'i maɓɓe e ɓiɓɓe maɓɓe worɓe e rewɓe.

²⁵Sey min mbaalo min semtuɓe, toskaare amin sudda min, ngam min mbaɗi hakke dow maaɗa, yaa Jawmiraawo Allah amin, minin e kaakiraaɓe amin, diga nderkaaku amin haa wargo hannde, min ɗowtanaaki Jawmiraawo Allah amin.”