Read Fulfulde Yeremiya 32 Bible Online

Yeremiya 32 - Fulfulde bible

Yeremiya 32

¹Jawmiraawo wolwani Yeremiya nder nduuɓu Sedekiya, laamiiɗo Yahuuda, sappoowu. Ɗum nduuɓu Nabukodonosor, laamiiɗo Baabila, sappo e joweetataɓu.

²Saa'i man honooɓe laamiiɗo Baabila ɗon kippo Urusaliima. Annabi Yeremiya o kaɓɓaaɗo haa daldal saare laamiiɗo Yahuuda haa ɓe aynata naŋngaaɓe.

³Laamiiɗo Sedekiya maɓɓi mo ton, wulli mo ngam Yeremiya waɗno annabaaku, wi'no: “Ndaa nii Jawmiraawo wi'i: Mi hokkan berniwol ngo'ol haa juŋngo laamiiɗo Baabila, o nyaaman ngol.

⁴Laamiiɗo Sedekiya daɗataa Kaldiya'en, ngam mi hokkan mo haa juŋngo laamiiɗo Baabila, o laaran mo gite bee gite, o wolidan bee maako.

⁵O yahran Sedekiya haa Baabila. Ton o jooɗoto haa saa'i mi yaali mo fahin. Koo to on kaɓi bee Kaldiya'en, on keɓataa jaalorgal sam.”

⁶Yeremiya wi'i: “Jawmiraawo wolwani yam, wi'i:

⁷Hananiyel ɓii bappa ma Sallum, waran haa maaɗa, wi'an: Soodu ngesa am haa Anatot, ngam an woni banndam ɓadiiɗo, mo woodi laawol soottugo ka.

⁸Ɗum laati bana Jawmiraawo wi'no. Hananiyel, ɓii bappa am wari haa daldal saare laamiiɗo go, wi'i yam: Soodu ngesa am haa Anatot nder lesdi Benyamin, ngam a woodi laawol soottugo ka. Soodu ka ngam hoore maaɗa. Nden mi annditi ɗum wolde Jawmiraawo.

⁹Mi soodi ngesa man haa Anatot e juŋngo Hananiyel, ɓii bappa am, mi yoɓi mo ceede cardi sappo e joweeɗiɗi.

¹⁰Mi winndi ɗereewol coggu, mi maɓɓi ngol, mi waɗani ngol lammba, mi seedni ngol seedooɓe, mi awni ceede man dow awnorɗum.

¹¹Nden mi hoo'i ɗereewol coggu maɓɓaaŋgol e misaaluwol maagol maɓɓitiiŋgol.

¹²Mi hokki ɗereeji man ɗiɗi fuu haa Baruku ɓii Neriya ɓii Mahaseya, gite Hananiyel ɓii bappa am e seedooɓe waɗɓe juuɗe muuɗum'en haa ɗereewol coggu e Yahuudu'en jooɗiiɓe nder daldal saare go.

¹³Nden mi umri Baruku yeeso maɓɓe, mi wi'i:

¹⁴Ndaa nii Jawmiraawo honooɓe asama, Allah Isra'iila wi'i: Hoo'u ɗereeji coggu ɗi'i, maɓɓaaŋgol e misaaluwol maagol maɓɓitiiŋgol, resu ɗi nder mbulku, ngam haa ɗi nduura ton duuɓi ɗuuɗɗi.

¹⁵Ngam min Jawmiraawo honooɓe asama, Allah Isra'iila, mi wi'i: Yimɓe coodan fahin cuuɗi e gese inabooje e gese goɗɗe nder lesdi ndi'i.”

¹⁶Nde mi hokki Baruku ɓii Neriya ɗereewol coggu go, mi tori Jawmiraawo:

¹⁷“Yaa Allah Jawmiraawo, an a tagi asama e lesdi bee baawɗe ma mawɗe e juŋngo ma fortaaŋgo. Walaa ko salorte!

¹⁸A ɗon mo'ana gide ujineeje, a ɗon hiito aybe baabiraaɓe haa ɓiɓɓe maɓɓe. An woni Allah mawɗo, baawɗo, innde ma Jawmiraawo honooɓe asama!

¹⁹Nufayeeje ma e kuuɗe ma ɗe mawɗe. Gite ma ɗon ndaara laabi ɓiɓɓe Aadama fuu, ngam a warjo koo moy fodde laabi mum e kuuɗe mum.

²⁰A waɗi alaamaaji e kaayeefiiji nder lesdi Misra. A ɗon tokko waɗugo ɗi haa wargo hannde, nder Isra'iila e nder ummaatooje goɗɗe. Jonta yimɓe anndi innde ma bana ko laati hannde.

²¹A wurtini yimɓe ummaatoore ma diga lesdi Misra bee alaamaaji e kaayeefiiji e juŋngo ma semmbiɗŋgo, fortiiŋgo e kulniiŋgo.

²²A hokki ɓe lesdi ndi'i, keewndi kosam e njumri, bana a hunorani kaakiraaɓe maɓɓe.

²³Ammaa nde ɓe nasti ndi, ɓe mari ndi, ɓe ɗowtanaaki ma, ɓe ɗowtanaaki tawreeta ma. Ɓe mbaɗaay ko a umruno ɓe waɗugo fuu. Ngam maajum a ukkani ɓe sarru ngu'u fuu.

²⁴Ndaa, Kaldiya'en mbaagi lesdi haa yotti mahol berniwol ngam nyaamugo ngol. Ngol yanan haa juuɗe honanɓe ngol ngam daliila konu e weelo e nyawu kalluŋgu ndaaɓoowu. Ko mbi'ɗa fuu laatake, a ɗon yi'a ɗum!

²⁵Ammaa bee non fuu, yaa Jawmiraawo, a wi'i mi sooda ngesa bee ceede haa gite seedooɓe, koo nde a hokki berniwol ngo'ol haa juuɗe Kaldiya'en.”

²⁶Jawmiraawo wolwani Yeremiya, wi'i mo:

²⁷“Min woni Jawmiraawo Allah mo yimɓe fuu. Walaa ko salortammi.

²⁸Ngam maajum mbi'mi: Mi hokkan berniwol ngo'ol haa juuɗe Nabukodonosor, laamiiɗo Baabila e Kaldiya'en, ɓe nyaama ngol!

²⁹Kaldiya'en honanɓe berniwol ngo'ol, nastan ngol, kuɓɓan yiite nder maagol, ngulan ngol bee soorooji maagol fuu. Ngam dow soorooji ɗi'i fuu yimɓe nguli uurle ngam Ba'al, ndufi dokke dufeteeɗe ngam ɗowanteeɓe woɗɓe. Ɓe tikkini yam bee maajum.

³⁰Diga fuɗɗam yimɓe Isra'iila e Yahuuda ɗon mbaɗa kalluɗum tum yeeso am. Ɓe ɗon tikkinammi tum bee kuuɗe maɓɓe kalluɗe.

³¹Berniwol ngo'ol tikkini yam, ummini ɓernde am, diga nyalaade yimɓe puɗɗi nyiɓugo ngol haa wargo hannde. Mi taynori halkugo ngol yeeso am,

³²ngam yimɓe Isra'iila e Yahuuda fuu, kamɓe e laamiiɓe maɓɓe e ardiiɓe maɓɓe e liman'en maɓɓe e annabi'en maɓɓe e yimɓe Yahuuda e jooɗiiɓe haa Urusaliima fuu, ɓe tikkini yam bee halleende maɓɓe.

³³Ɓe ngaylitani yam ɓaawe, naa geese maɓɓe. Koo nde mi tokki ekkitingo ɓe, ɓe nanaay, ɓe njaɓaay elto.

³⁴Ko ɓuri hallugo boo, ɓe njo'ini labbi maɓɓe nyidduɗi nder suudu senaandu ngam am, ɓe coɓni ndu.

³⁵Ɓe mahi towndiije ngam Ba'al nder waadiwol Ɓii-Hinnom, haa ɓe ngula ɓiɓɓe maɓɓe worɓe e rewɓe bana kirsaaɗi ngam lawru Molek. Min mi umraay ɓe waɗugo ɗum, mi meeɗaay koo numugo ɗum. Ammaa kamɓe ɓe mbaɗi nyidduɗum ɗu'um, ɓe nastini yimɓe Yahuuda nder hakke.”

³⁶Ndaa ko Jawmiraawo Allah Isra'iila wi'i: “On mbi'i dow Urusaliima: Berniwol ngo'ol yani haa juŋngo laamiiɗo Baabila ngam daliila konu e weelo e nyawu kalluŋgu ndaaɓoowu.

³⁷Nder tikkere am e ɓernuki am caatuki caŋkititmi yimɓe am haa lesɗe fuu. Mi mooɓtan ɓe ton, mi hoora ɓe haa nokkuure nde'e, ɓe njooɗo ton nder de'ere.

³⁸Nden ɓe laatoto ummaatoore am, min boo mi laatoto Allah maɓɓe.

³⁹Mi hokkan ɓe hakkiilo wooto e laawol gootol, haa ɓe kulammi foroy, ɓe keɓa hayru, ɓikkoy maɓɓe boo keɓa hayru ɓaawo maɓɓe.

⁴⁰Mi haɓɓan alkawal duumiiŋgal bee maɓɓe, mi accataa woonango ɓe. Mi laatinan ɓe hulɓe yam, ngam taa ɓe loro, ɓe ndaayto yam.

⁴¹Mi seyorto woonango ɓe. Bee ɓernde am e muuyo am fuu tabitinanmi ɓe bee hoolaare nder lesdi ndi'i.

⁴²Bana njahrirmi sarru naawŋgu ngu'u fuu dow yimɓe ummaatoore nde'e, bana non ndokkiranmi ɓe kuuje booɗɗe ɗe kunaniimi ɓe fuu.

⁴³On mbi'i lesdi ndi'i ferwan, walaa yimɓe koo dabbaaji ngonata ton, ngam ndi yani haa juuɗe Kaldiya'en. Ammaa yimɓe coodan gese nder lesdi ndi'i.

⁴⁴Ɓe coodan ɗe bee ceede, ɓe mbaɗanan ɗe ɗereeji coggu, ɓe maɓɓan ɗi, ɓe mbaɗan lammba dow maaji, ɓe ceednan ɗe bee seedooɓe. Ɗum fuu ɗum laatoto nder lesdi Benyamin e nder gure taariiɗe Urusaliima e nder gure Yahuuda, non boo nder gure haa kooseeje e lesdi towndiije e Lesdi Fombina. Ngam mi wartiran joonde maɓɓe bana naane.” Non Jawmiraawo wi'i.