Read Fulfulde Yeremiya 35 Bible Online

Yeremiya 35 - Fulfulde bible

Yeremiya 35

¹Nder zamanu Yooyakim ɓii Yusiya, laamiiɗo Yahuuda, Jawmiraawo wolwani Yeremiya, wi'i mo:

²“Yah haa Rekabi'en, wolidu bee maɓɓe. Waddu ɓe haa suudu wooru nder haykaliiru, yarnu ɓe nguykinoojam.”

³Yeremiya mooɓti Rekabi'en fuu, waato Yaajaniya ɓii Yeremiya feere ɓii Habacciniya e deerɗum'en e ɓiyum'en fuu,

⁴yahri ɓe haa haykaliiru, nastini ɓe nder suudu ɓiɓɓe Hanan ɓii Yigidaliya, goɗɗo Allah. Suudu ndu ɓadi bee suudu mawɓe, ndu ɗon dow suudu Ma'aseya ɓii Sallum, aynoowo dammugal.

⁵Nden Yeremiya jo'inani Rekabi'en njardukoy e bulki bee nguykinoojam, o wi'i ɓe: “Njare kadi!”

⁶Ammaa ɓe njaabi: “Min njarataa nguykinoojam, ngam Yonadabu ɓii Rekab, kaaka amin umri min e ɓiɓɓe amin, taa min njara ɗam sam.

⁷O haɗi min boo mahugo cuuɗi e remugo lesdi e jubaago gese inabooje e marugo ɗe. O umri min min njooɗo nder cuuɗi laymaaji ngeendam amin fuu, ngam haa min njuutina balɗe amin nder lesdi ndi min koɗata.

⁸Min ɗowtani umrooje Yonadabu ɓii Rekab, kaaka amin. Min njarataa nguykinoojam sam, koo minin, koo rewɓe amin, koo ɓiɓɓe amin worɓe e rewɓe.

⁹Min mahataa cuuɗi ngam jooɗaago ton. Min marataa inabooje, koo gese, koo aawre.

¹⁰Min ɗon njooɗi haa cuuɗi laymaaji, min ɗowtani umrooje ɗe kaaka amin Yonadabu umrino min fuu.

¹¹Ammaa nde Nabukodonosor, laamiiɗo Baabila hippi lesdi ndi'i, min mbi'i sey min ngara haa Urusaliima, ngam min ndaɗa jama'aaje konu Kaldiya'en e Siriya'en. Ngam maajum min ɗon njooɗi haa Urusaliima jonta.”

¹²Nden Jawmiraawo wolwani Yeremiya.

¹³Jawmiraawo honooɓe asama, Allah Isra'iila wi'i mo: “Yah, yeccu yimɓe Yahuuda e jooɗiiɓe haa Urusaliima: Ndaa nii Jawmiraawo wi'i: Koni on njaɓataa elto, on ɗowtantaako bolle am?

¹⁴Rekabi'en ɗowtani umroore kaakiraawo muuɗum'en Yonadabu ɓii Rekab, umri danygol muuɗum, taa ɓe njara nguykinoojam. Ɓe meeɗaay yarugo ɗam haa wargo hannde. Min boo mi tokki wasaago on, ammaa on nananaay yam.

¹⁵Mi tokki nelugo sukaaɓe am annabi'en haa mooɗon, ɓe mbi'a on: Lorte diga laabi mon kalluɗi, mbaɗe ko fotti, taa tokke ɗowanteeɓe woɗɓe, taa njaggane ɓe, ngam haa on njooɗo nder lesdi ndi ndokkumi on, onon e kaakiraaɓe mon. Ammaa on nananaay yam, on kakkilanaay bolle am.

¹⁶Ɓiɓɓe Yonadabu ɓii Rekab ɗowtani umrooje kaakiraawo muuɗum'en, ammaa ummaatoore nde'e ɗowtanaaki yam.

¹⁷Ngam maajum min Jawmiraawo honooɓe asama, Allah Isra'iila, mi wi'i: Onon yimɓe Yahuuda e jooɗiiɓe nder Urusaliima, mi ukkanan on sarru ngu mbi'mi on fuu. Ngam mi wolwani on, ammaa on nanaay, mi ewni on, ammaa on njaabaaki.”

¹⁸Nden Yeremiya wolwani Rekabi'en: “Ndaa nii Jawmiraawo honooɓe asama, Allah Isra'iila wi'i: On ɗowtani ko kaaka mon Yonadabu umri on. On njogi umrooje maako fuu, on mbaɗi ko ɗe umri boo.

¹⁹Ngam maajum min Jawmiraawo honooɓe asama, Allah Isra'iila mi wi'i: Haa foroy goɗɗo danygol Yonadabu ɓii Rekab daroto yeeso am ngam jagganaago yam.”