Read Fulfulde Yeremiya 36 Bible Online

Yeremiya 36 - Fulfulde bible

Yeremiya 36

¹Nder nduuɓu Yooyakim ɓii Yusiya, laamiiɗo Yahuuda, nayaɓu, Jawmiraawo wolwani Yeremiya, wi'i:

²“Hoo'u deftere taggaande, winndu nder maare ko mbi'maami dow Isra'iila e Yahuuda e ummaatooje fuu, diga saa'i mi aarti wolwango ma nder zamanu Yusiya, haa wargo hannde.

³Teema, to yimɓe Yahuuda nani haala sarru ngu taaskiimi ukkango ɓe fuu, ɓe fuu ɓe lortoto diga laabi maɓɓe kalluɗi haa mi yaafo aybeeji maɓɓe e hakkeeji maɓɓe.”

⁴Yeremiya ewni Baruku ɓii Neriya, anndini mo ko Jawmiraawo wi'no fuu. Baruku winndi ɗum haa deftere taggaande.

⁵Nden Yeremiya wi'i Baruku: “Ɓe kaɗi yam yahugo haa haykaliiru Jawmiraawo.

⁶Sey a yaha, an. Nyannde suumaye, to yimɓe mooɓtake ton, jaŋngu deftere nde'e, haa ɓe nana ko Jawmiraawo wi'i yam, ko mi jaŋngani ma, an boo a winndi ɗum. Jaŋngu nde boo haa noppi Yahuudu'en warɓe diga gure muuɗum'en.

⁷Teema tornde maɓɓe yottoto Jawmiraawo, ɓe fuu ɓe lortoto diga laabi maɓɓe kalluɗi. Ngam Jawmiraawo furkiti yimɓe ɓe'e bee ɓernuki mum e tikkere mum saatunde masin.”

⁸Nden Baruku ɓii Neriya yehi, jaŋngi bolle Jawmiraawo binndaaɗe nder deftere nder haykaliiru, bana annabi Yeremiya umruno mo.

⁹Nder nduuɓu Yooyakim ɓii Yusiya, laamiiɗo Yahuuda, njowaɓu, nder lewru joweenayaɓru, yimɓe mbaɗi suumaye yeeso Jawmiraawo. Jooɗiiɓe haa Urusaliima e warɓe diga gure Yahuuda fuu cuumi.

¹⁰Baruku jaŋngi haa deftere bolle Yeremiya fuu haa noppi yimɓe ummaatoore. Ɗum laati nder haykaliiru, haa suudu Gemariya ɓii Safan, binndoowo, haa daldal ɓaŋgiiŋgal haa nastirde Dammugal Kesal ngal haykaliiru.

¹¹Mika ɓii Gemariya ɓii Safan nani bolle Jawmiraawo gonɗe nder deftere go.

¹²O yehi haa saare laamiiɗo, haa suudu binndoowo. Saraaki'en fuu mooɓti ton: Eliisama, binndoowo e Delaya ɓii Semaya e Elnatan ɓii Akbor e Gemariya ɓii Safan e Sedekiya ɓii Hananiya e saraaki'en woɗɓe fuu.

¹³Mika lornani ɓe ko o nani fuu nde Baruku jaŋngani ummaatoore ko winnda nder deftere.

¹⁴Nden saraaki'en neli Yehuudi ɓii Netaniya ɓii Selemiya ɓii Kusi haa Baruku, o wi'i mo o hoo'a deftere nde o jaŋngi yeeso yimɓe, o wara. Baruku hoo'i nde, yehi haa maɓɓe.

¹⁵Ɓe mbi'i mo: “Jooɗa, jaŋngan min nde.” Baruku jaŋngani ɓe nde.

¹⁶Nde ɓe nani nde fuu, ɓe ndaarndaartiri, ɓe kultori, ɓe mbi'i Baruku: “Doole min lornana laamiiɗo bolle ɗe'e fuu.”

¹⁷Nden ɓe ƴami mo: “Yeccu min, noy a winndiri ɗum? Yeremiya anndini ma ɗum na?”

¹⁸Baruku jaabi: “O anndini yam bolle ɗe'e fuu, min boo mi winndi ɗe bee dawa haa deftere taggaande.”

¹⁹Nden saraaki'en mbi'i mo: “Sey on nyukko, an e Yeremiya, taa goɗɗo annda toy on ngoni!”

²⁰Saraaki'en ndesi deftere go haa suudu Eliisama, binndoowo. Nden ɓe nasti daldal laamorde, ɓe anndini laamiiɗo ko waɗi fuu.

²¹Laamiiɗo neli Yehuudi, o wadda deftere man. Kaŋko o hoo'i nde haa suudu Eliisama, o jaŋngani nde laamiiɗo e saraaki'en taariiɓe laamiiɗo.

²²Ɗum lewru joweeɗiɗaɓru, saa'i dabbunde, ngam man laamiiɗo ɗon jooɗi haa suudu taaskitinaandu ngam dabbunde, ɗon aytino.

²³Nde Yehuudi jaŋngi jabbi tati koo nayi, laamiiɗo ta'i ɗi bee laɓel binndoowo, sakkini ɗi nder yiite. O tokki waɗugo bana non haa o wuldi deftere man fuu.

²⁴Laamiiɗo e suka'en mum nanɓe bolle ɗe'e kultoraay, ceekaay limce muuɗum'en.

²⁵Elnatan e Delaya e Gemariya torino laamiiɗo taa o wula deftere, ammaa o nananaay ɓe.

²⁶Nden o umri ɓiyiiko Yerahameel e Seraya ɓii Ajiriyel e Selemiya ɓii Abdeyel, ɓe naŋnga Baruku, binndoowo e annabi Yeremiya. Ammaa Jawmiraawo suuɗi ɓe.

²⁷Ɓaawo laamiiɗo wuli deftere nde Yeremiya anndinino Baruku, Jawmiraawo wolwani Yeremiya, wi'i:

²⁸“Hoo'u deftere woɗnde, winndu nder maare ko wonno haa deftere ndeya nde Yooyakim, laamiiɗo Yahuuda wulno go.

²⁹Waɗ annabaaku dow laamiiɗo Yooyakim: Ndaa nii Jawmiraawo wi'i: A wuli deftere nde'e, a ƴami Yeremiya koni o winndi: Fakat laamiiɗo Baabila waran, wonnan lesdi ndi'i, halkan yimɓe maari e dabbaaji maari.

³⁰Ngam maajum, ndaa nii Jawmiraawo wi'i dow Yooyakim, laamiiɗo Yahuuda: Walaa koo gooto mo danygol maako heɓata jooɗaago dow leeso laamu Daawuda. Ɓanndu maako, yimɓe ngudinan ndu yaasi, ndu waalo haa nguli naaŋge e jaaŋgol jemma.

³¹Mi hiitoto mo, kaŋko e danygol maako e suka'en maako, ngam daliila hakkeeji ɗi ɓe mbaɗi fuu. Kamɓe e yimɓe Urusaliima e yimɓe Yahuuda kakkilanaay bolle am. Ngam maajum ukkananmi ɓe sarru ngu mbi'noomi fuu dow maɓɓe.”

³²Nden Yeremiya hoo'i deftere woɗnde, hokki nde Baruku ɓii Neriya, binndoowo. Kaŋko o winndi ko Yeremiya anndini mo, ko wonno haa deftere nde Yooyakim, laamiiɗo Yahuuda wulno fuu bee yiite. O winndi boo bolle nannduɗe ɗuuɗɗe ɗe Yeremiya ɓesdi.