Read Fulfulde Yeremiya 38 Bible Online

Yeremiya 38 - Fulfulde bible

Yeremiya 38

¹Sefatiya ɓii Mattan e Gedaliya ɓii Pashuuru e Yukal ɓii Selemiya e Pashuuru ɓii Malkiya nani ko Yeremiya wi'i yimɓe ummaatoore fuu, o yecci ɓe:

²“Ndaa nii Jawmiraawo wi'i: Mo jooɗoto nder berniwol ngo'ol maayran bee konu malla weelo malla nyawu kalluŋgu ndaaɓoowu. Ammaa mo wurtoto ngam hawtango Kaldiya'en, kaŋko o maayataa, o hisnan yoŋki maako, o yeeɗan.

³Ndaa nii Jawmiraawo wi'i: Mi hokkan berniwol ngo'ol haa jama'aare konu laamiiɗo Baabila, nde nyaama ngol.”

⁴Nden saraaki'en mbi'i laamiiɗo: “Sey gorko oo maaya! Bee wolwugo bana nii o ɗon tampina honooɓe luttuɓe nder berniwol men e non boo ummaatoore fuu. O ɗaɓɓataa salaaman ummaatoore nde'e, sey sarru maare!”

⁵Laamiiɗo Sedekiya jaabi: “Ndaa mo haa juuɗe mon, mi waawataa haɗgo on.”

⁶Kamɓe ɓe koo'i Yeremiya, ɓe ngubi mo nder ɓulndu Malkiya ɓii laamiiɗo, wonndu haa daldal saare laamiiɗo haa aynooɓe aynata. Ɓe njippini mo bee ɓoggi. Ndiyam woodaa nder maaru, sey loope. Yeremiya nufi nder loope man.

⁷Ton nder saare laamiiɗo woodi Etiyopiyaajo saraakiijo, innde maako Ebed-Melek. Kaŋko o nani ɓe njolli Yeremiya nder ɓulndu. Saa'i man laamiiɗo ɗonno jooɗi haa Dammugal Benyamin.

⁸Ebed-Melek wurti saare laamiiɗo, yehi haa maako, wi'i mo:

⁹“Barkaama, ko worɓe ɓe'e mbaɗi annabi Yeremiya, wooɗaay. Ɓe njolli mo nder ɓulndu. Walaa seko o maayran bee dolo ton, ngam nyaamdu timmi nder berniwol.”

¹⁰Nden laamiiɗo umri Ebed-Melek Etiyopiyaajo o hoo'a worɓe cappanɗe tato wonɓe ton, ɓe ngurtina Yeremiya e ɓulndu, hiddeko o maaya.

¹¹Ebed-Melek hoo'i worɓe man, yehi haa sigordu nder saare laamiiɗo, hoo'i ton limce ceekɗe e leppi kiiɗɗi, jippini ɗum bee ɓoggi haa Yeremiya nder ɓulndu.

¹²Nden o wi'i Yeremiya: “Waɗ limce e leppi les naafɗe ma dow ɓoggi.” Yeremiya waɗi bana non.

¹³Ɓe pooɗi mo bee ɓoggi, ɓe ngurtini mo. Ɓaawo maajum Yeremiya jooɗi haa daldal saare laamiiɗo haa aynooɓe aynata.

¹⁴Laamiiɗo Sedekiya umri waddugo annabi Yeremiya haa maako haa dammugal haykaliiru Jawmiraawo tataɓal. O wi'i Yeremiya: “Mi yiɗi ƴamugo ma ƴamol gootol. Taa suuɗam koo ɗume.”

¹⁵Yeremiya jaabi mo: “To mi wi'i ma gooŋga, a mbaratam. To mi hokki ma sawari, a nanantaa yam!”

¹⁶Laamiiɗo Sedekiya hunani Yeremiya bee sirri, wi'i: “Fakat bana Jawmiraawo o geeto mo hokki en yoŋki, mi mbarataa ma, mi hokkataa ma haa juuɗe worɓe yiɗɓe mbarugo ma boo.”

¹⁷Nden Yeremiya wi'i Sedekiya: “Ndaa nii Jawmiraawo honooɓe asama, Allah Isra'iila wi'i: To a hawtani mawɓe laamiiɗo Baabila, nden kam yoŋki ma hisan, berniwol ngo'ol boo wulataake, a hisan bee saare ma fuu.

¹⁸Ammaa to a hawtanaay mawɓe laamiiɗo Baabila, nden kam berniwol ngo'ol hokkete haa Kaldiya'en, ɓe ngula ngol, an boo a daɗataa ɓe.”

¹⁹Laamiiɗo Sedekiya wi'i Yeremiya: “Mi ɗon hula Yahuudu'en hawtanɓe Kaldiya'en. Teema Kaldiya'en ndokkatam haa juuɗe maɓɓe, ɓe pijirammi.”

²⁰Yeremiya jaabi: “A hokkataake haa juuɗe maɓɓe. Useni ɗowtana bolle Jawmiraawo ɗe mbi'maami. Nden kam a heɓan hayru, yoŋki ma boo hisan.

²¹Ammaa ndaa ko Jawmiraawo yi'ni yam to a salake wurtaago:

²²Ɓe ngurtinan rewɓe luttuɓe nder saare laamiiɗo Yahuuda fuu haa mawɓe laamiiɗo Baabila. Ndaa ko rewɓe mbi'ata dow maaɗa: Sooba'en ma esti ma, mbaɗi ma rikici. Jonta, nde kosɗe ma nufi nder loope, ɓe acci ma.”

²³Yeremiya ɓesdi wi'ugo: “Ɓe ngurtinan rewɓe ma e ɓikkoy ma fuu haa Kaldiya'en. An boo a daɗataa ɓe, a laatoto kaɓɓaaɗo laamiiɗo Baabila, nden ɓe ngulan berniwol ngo'ol.”

²⁴Sedekiya jaabi Yeremiya: “Taata goɗɗo annda ko en mbolidi, nden kam a maayataa.

²⁵To saraaki'en nani mi wolidi bee ma, to ɓe ngari haa maaɗa, ɓe mbi'i ma: Yeccu min ko a wolidi bee laamiiɗo. Min mbarataa ma, to a yecci min koo ɗume fuu,

²⁶nden kam yeccu ɓe no a tori yam, taa mi lortine haa suudu Yonatan, a maaya ton.”

²⁷Saraaki'en fuu ngari haa Yeremiya, ƴami mo. Kaŋko o yecci ɓe ko laamiiɗo umri mo wi'ugo. Ɓe njeeɗi, ɓe ndilli, ngam walaa mo nani haala man.

²⁸Yeremiya boo jooɗi haa daldal saare laamiiɗo haa aynooɓe aynata haa nyalaade Kaldiya'en nyaami Urusaliima.