Read Fulfulde Yeremiya 4 Bible Online

Yeremiya 4 - Fulfulde bible

Yeremiya 4

¹Jawmiraawo wi'i: “Onon yimɓe Isra'iila, to on ngiɗi lortaago, nden kam lorte haa am. To on itti kuuje mon nyidduɗe yeeso am, to on acci yiilaago,

²to on kunorake bee wi'ugo fakat Jawmiraawo o geeto, nder gooŋgaaku e nder darnuɗum e adilaaku, nden kam ummaatooje goɗɗe boo keɓan barka daliila innde Jawmiraawo, ɗe mantorto mo boo.”

³Ndaa nii Jawmiraawo wi'i yimɓe Yahuuda e Urusaliima: “Pe'e ngesa kesa, taa aawe caka gi'e!

⁴Njuulne ko'e mooɗon ngam Jawmiraawo, itte saadooniiku ɓerɗe mooɗon, onon yimɓe Yahuuda e jooɗiiɓe haa Urusaliima, ngam taa tikkere am ummo bana yiite, taa nde wula ngam kuuɗe mooɗon kalluɗe, walaa baawanɗo nyifugo nge.”

⁵Anndine nder Yahuuda, ngooyne haa Urusaliima! Puufe luwal nder lesdi, ngooke bee semmbe, mbi'e: Mooɓte ngam nastugo berniiji cemmbiɗɗi.

⁶Ndarne tuutawal haa Siyona. Ndogge, taa ndare sam! Ngam mi waddan sarru e halkere mawnde diga woyla.

⁷Mbarooga wurti lowol muuɗum, nattinoowo ummaatooje ummi, wurti nokkuure muuɗum ngam wartirgo lesdi mooɗon ladde meere, ngam wilugo berniiji mooɗon, ɗi cooya jooɗiiɓe ton.

⁸Ngam maajum kadde limce buhuuje[7], mboye, uume! Ngam tikkere Jawmiraawo saatunde waylitaaki, accaay en.

⁹Jawmiraawo wi'i: “Nyalaade man ɓernde laamiiɗo e ɓerɗe ardiiɓe ta'an, liman'en mbemmboto, annabi'en boo kultoran.”

¹⁰Nden mi wi'i: “Kayya! Yaa Jawmiraawo Allah, fakat a ƴoyri ummaatoore nde'e e Urusaliima bee wi'ugo: Jam laatano on! Asee boo kaafahi meemi daaɗe amin!”

¹¹Saa'i man ummaatoore nde'e e Urusaliima nanan habaru ni'i: “Diga towndiire sookre nder ladde, henndu wulndu ɗon jippo dow ummaatoore am, naa ngam jaartugo malla laɓɓingo.

¹²Henndu saatundu ɗon iwa ton dow umroore am. Jonta min boo mi hiitoto ɓe.”

¹³Ndaa, konneejo ɗon wara bana duule! Mootaaji pucci maako ɗon nanndi bee duluuru, pucci maako ɓuri dute yaawugo. Kayto, en majji!

¹⁴Urusaliima, lootu ɓernde ma, ittu halleende, haa a hisa. Ndey accata nufayeeje ma kalluɗe?

¹⁵Nane, hoolo ɗon wara diga Dan, habaru sarru iwi diga hooseere Efrayim.

¹⁶Ngecce ɗum ummaatooje, anndine Urusaliima: “Hippooɓe ɗon ngara diga lesdi ndaayiindi, ɗon mbaɗa hoolo ngam ukkanaago berniiji Yahuuda.

¹⁷Ɓe taaroto Urusaliima bana aynooɓe ngesa, ngam ngol tuurtani yam.” Non Jawmiraawo wi'i.

¹⁸“Laabi ma e kuuɗe ma ngaddani ma ɗum. Ɗum ngeenaari halleende ma. Ɗum kaaɗɗum masin, ɗum naawan ɓernde ma.”

¹⁹Yeremiya wi'i: “Wayyo teteki am, teteki am ɗon naawa! Ɓernde am ɗon fiita bee semmbe, mi waawataa de'ugo ngam mi ɗon nana hoolo luwal e hoolo konu!

²⁰Ɓe ɗon anndina masiibo dow masiibo, lesdi fuu natti, jonta nii cuuɗi am e laymaaji am kalki!

²¹Haa ndey ngi'anmi tuutawal? Haa ndey nananmi hoolo luwal?”

²²Jawmiraawo wi'i: “Yimɓe ummaatoore am ɓe faataaɓe, ɓe anndaa yam. Ɓe laatake bana ɓikkoy koy ngalaa hakkiilo koo faamu. Ɓe ngoodi hikma waɗugo ko halli, ammaa ɓe anndaa waɗugo ko fotti.”

²³Mi laari lesdi, ndaa, ndi cookri, ndi walaa koo ɗume. Mi laari asamanji, annoora maaji woodaa.

²⁴Mi laari kooseeje, ndaa ɗe ndimmbi, towndiije boo fuu ndiwtori.

²⁵Mi laari, ndaa, walaa yimɓe sam, colli asama boo piiri, ndilli.

²⁶Mi laari, ndaa, gese booɗɗe laati ladde meere. Gure fuu ngibbi yeeso Jawmiraawo ngam tikkere maako saatunde.

²⁷Ndaa nii Jawmiraawo wi'i: “Lesdi fuu laatoto winnde, ammaa mi wilataa ndi fuu.

²⁸Ngam maajum lesdi sunoto, asama boo nyiɓɓan. Ngam min mi anndini anniya am, mi mimsitittaako, mi lorataako ɓaawo.

²⁹Yimɓe wonɓe nder gure fuu ɗon ndogga ngam hoolo wa'iiɓe pucci e fiɗooɓe kuri. Ɓe ɗon nasta nder layɗe, ɓe mba'o tapaaje. Ɓe acci gure fuu, walaa luttuɗo nder maaje.

³⁰An boo, Urusaliima berniwol gibbinaaŋgol, ko tammiiɗa waɗugo? A ɗon ɓorni jaage boɗeeje, a ɗon jaagnori bee fawne kaŋŋeeri, a ɗon mawnina gite ma bee pinaari, a ɗon wo'ina yaasi maaɗa meere. Waaye'en ma ɗon njawe, ɓe ngiɗi mbarugo ma.

³¹Mi ɗon nana daande bana nde debbo ɓesnanɗo, wookaandu boo bana ndu danyanɗo afo mum. Ɗum berniwol Urusaliima, ngol ɗon laaha, ngol weeɗi juuɗe maagol, ngol ɗon woya: Kayto! Mi natti! Yoŋki am hokkaama haa juuɗe mbarooɓe.”