Read Fulfulde Yeremiya 41 Bible Online

Yeremiya 41 - Fulfulde bible

Yeremiya 41

¹Nder lewru joweeɗiɗaɓru, Isma'iilu ɓii Netaniya ɓii Eliisama, goɗɗo danygol laamiiɗo, gooto nder mawɓe huuwanooɓe mo, wardi bee worɓe sappo haa Gedaliya ɓii Ahikam haa Mispa. Saa'i ɓe ɗon nyaamda bee maako,

²Isma'iilu e worɓe mum sappo losi kaafaaje muuɗum'en, mbari Gedaliya mo laamiiɗo Baabila waɗi ngomna lesdi.

³Nden Isma'iilu mbari Yahuudu'en wonduɓe bee Gedaliya haa Mispa fuu e honooɓe Kaldiya'en wonɓe ton.

⁴Jaŋngo man, hiddeko goɗɗo heɓta ɓe mbari Gedaliya,

⁵worɓe cappanɗe njoweetato ngari diga Sikem e Silo e Samariya. Ɓe laɓno bakkuɗe maɓɓe, ɓe ceekno limce maɓɓe, ɓe ƴarino ɓalli maɓɓe boo. Ɓe ngari bee dokke nyaamdu e uurle haa juuɗe maɓɓe, haa ɓe lii'o ɗum haa haykaliiru Jawmiraawo.

⁶Isma'iilu ɓii Netaniya wurti Mispa ngam fottugo bee maɓɓe, o ɗon woya. Nde o fotti bee maɓɓe, o wi'i ɓe: “Ngare kommbi Gedaliya ɓii Ahikam.”

⁷Nde ɓe nasti wuro, Isma'iilu e worɓe muuɗum mbari ɓe, cakkini ɓe nder ɓulndu.

⁸Ammaa woodi worɓe sappo caka maɓɓe ɓe mbi'i Isma'iilu: “Useni taa mbar min! Min nyukkini alkamaari e sa'iiruuri e nebbam e njumri nder gese.” Ngam man o acci ɓe, o mbardaay ɓe bee sooba'en maɓɓe.

⁹Ɓulndu ndu Isma'iilu sakkini ɓalli mbaraaɓe go nder muuɗum, ndu mawndu. Laamiiɗo Asa wasno ndu ngam daliila Ba'asa, laamiiɗo Isra'iila. Isma'iilu ɓii Netaniya hebbini ndu bee mbaraaɓe.

¹⁰Nden o naŋngi ɓiɓɓe laamiiɗo rewɓe e yimɓe luttuɓe haa Mispa ɓe Nebuzaradan, hooreejo aynooɓe halfitinno Gedaliya ɓii Ahikam. O hoo'i ɓe ngam o daha ɓe haa lesdi Ammoon.

¹¹Ammaa Yohanan ɓii Kareha e mawɓe wonduɓe bee maako fuu nani kalluɗum ko Isma'iilu ɓii Netaniya waɗi.

¹²Ɓe mooɓti worɓe maɓɓe fuu, ɓe njehi haɓugo bee maako. Ɓe njokki mo baŋnge weendu mawndu haa Gibiyon.

¹³Nde naŋngaaɓe Isma'iilu diga Mispa ngi'i Yohanan e mawɓe konu woɗɓe, ɓe ceyi. Ngam maajum ɓe ngayliti, ɓe ndoggi haa Yohanan ɓii Kareha.

¹⁵Ammaa Isma'iilu e worɓe njoweetato ndaɗi Yohanan, ndilli lesdi Ammoon.

¹⁶Nden Yohanan ɓii Kareha e mawɓe konu wonduɓe bee maako kooci honooɓe e rewɓe e ɓikkoy e suka'en laamiiɗo, waato yimɓe ɓe Isma'iilu naŋnguno haa Mispa, ɓaawo o mbarino Gedaliya ɓii Ahikam. Ɓe koo'i ɓe haa Gibiyon,

¹⁷ɓe ndilli. Ɓe njippi wakkati seɗɗa haa hoɗorde Kimham baŋnge Baytilaama. Ɓe annini yahugo haa Misra

¹⁸ngam daaytaago bee Kaldiya'en. Ɓe kuli Kaldiya'en, ngam Isma'iilu mbari Gedaliya mo laamiiɗo Baabila waɗino ngomna lesdi.