Read Fulfulde Yeremiya 50 Bible Online

Yeremiya 50 - Fulfulde bible

Yeremiya 50

¹Ndaa ko Jawmiraawo wi'i bee hunnduko annabi Yeremiya dow Baabila, lesdi Kaldiya'en:

²“Anndine ɗum caka ummaatooje, ngooyne ɗum! Ndarne tuutawal konu, mbaɗe wooynaandu, taa cuuɗe ɗum! Mbi'e: Lesdi Baabila do'ake! Ɗowanteeɗo maari Beel toskake, Marduk fusi, labbi maako toskake, suuraaji maako cehaaɗi kalki.

³Ummaatoore iwnde woyla wari haɓugo bee lesdi Baabila, laatinan ndi ladde meere. Yimɓe e dabbaaji fuu ndoggan, walaa mo jooɗata ton.”

⁴Jawmiraawo wi'i: “Wakkati man yimɓe Isra'iila e yimɓe Yahuuda kawtan, ngaran bee bojji ngam ɗakkotirgo bee Jawmiraawo Allah muuɗum'en.

⁵Ɓe ƴaman laawol Siyona, nden ɓe ngaylititto, ɓe tokkoto ngol. Ɓe kaɓɓan alkawal duumiiŋgal bee am, ɓe meetataa yejjitugo ngal.

⁶Yimɓe ummaatoore am laati bana baali majjuɗi. Waynaaɓe maɓɓe majjini ɓe dow kooseeje. Ɓe ngiili bana baali diga hooseere nde'e haa ndeya, ɓe ngejjiti waalde maɓɓe.

⁷Fottuɓe bee maɓɓe fuu ukkani ɓe. Konne'en maɓɓe mbi'i: Ko min mbaɗi, naa ɗum aybe, ngam ɓe mbaɗi hakke dow Jawmiraawo, marɗo adilaaku fuu, ɗum Jawmiraawo mo kaakiraaɓe maɓɓe ɗonno koolo ɗum.

⁸Onon yimɓe Isra'iila, ndogge Baabila, ngurte lesdi Kaldiya'en! Aarte dillugo bana jawɗi ardorto tokkere!

⁹Mi ɗon ummina mooɓgal ummaatooje mawɗe haa woyla, ɗe ngara haɓugo bee Baabila. Ɓe ndarna caffuuji dow berniwol, ɓe nyaama ngol. Ɓe piɗan kuri maɓɓe bana gaw'en, walaa koo gootol woofata.

¹⁰Lesdi Kaldiya laatoto keɓal konu, hippooɓe ndi fuu caftan ngal.” Non Jawmiraawo wi'i.

¹¹“Onon yimɓe Baabila, on mbili maral lesdi am. Ngam man on ɗon ceyo, on ɗon mbelmbelta, on ɗon ndiwa bana ngakkon caka huɗo hecco, koo bana puccu hijanŋgu.

¹²Lesdi mooɗon[42], kayri boo ndi toskoto, ndi heewan mbustu. Kaldiya laatoto ummaatoore ɓaawoore, Baabila laatoto ladde hamaadaare meere.

¹³Ngam daliila tikkere am, walaa jooɗotooɓe ton, ngol ferwan fuu. Koo moy caalotooɗo hultoran, hayɗinan ngam masiibooji maagol fuu.

¹⁴Onon fiɗooɓe kuri, ndarne caffuuji dow berniwol Baabila, taare ngol. Piɗe kuri mon fuu dow maagol, ngam ngol waɗi hakke dow Jawmiraawo.

¹⁵Ummine gookaali konu nder taarde maagol fuu. Jonta berniwol Baabila yoofi balmi mum. Cuuɗi maagol cemmbiɗɗi ngibbi, mahi maagol ngibbi. Min Jawmiraawo mi ɗon waato yimɓe Baabila. Onon boo mbaate ɓe, mbaɗe ɓe ko ɓe mbaɗi naane!

¹⁶Nattine aawooɓe e sodooɓe haa Baabila. Koo moy jooɗiiɗo ton hulan kaafahi, hootan lesdi muuɗum haa yimɓe mum ngoni.”

¹⁷Yimɓe Isra'iila laati bana baali majjuɗi ɗi barooɗe ndiiwi. Laamiiɗo Assuura aarti nyaamugo ɓe. Haa ragare, Nabukodonosor, laamiiɗo Baabila nami i'e maɓɓe.

¹⁸Ngam maajum, ndaa nii Jawmiraawo honooɓe asama, Allah Isra'iila wi'i: “Mi hiitoto laamiiɗo Baabila e lesdi mum, bana mi hiitori laamiiɗo Assuura.

¹⁹Mi hooran yimɓe Isra'iila haa durduɗe muuɗum'en, ɓe nyaama ko fuɗata dow hooseere Karmel e nder lesdi Baasan, ɓe kaara dow kooseeje Efrayim e nder lesdi Gile'at.

²⁰Min Jawmiraawo mi wi'i: Wakkati man, to goɗɗo ɗaɓɓiti zunuubaaji Isra'iila e hakkeeji Yahuuda, o tawataa ɗi, ngam mi yaafanto koo moy luttuɗo mo accumi bee yoŋki.”

²¹“Ukkane yimɓe Meratayim e Pekoda[43], kalke ɓe! Mbile, nattine ɓe fuu! Mbaɗe ko min Jawmiraawo umri on fuu!

²²Hoolo konu ummi nder lesdi, halkere naawnde waɗi.

²³Lesdi Baabila laati bana tappirɗum. Ndi tappi, sampiti duniyaaru fuu, jonta tappirɗum man fusi. Baabila warti nokkuure ferewnde caka ummaatooje.

²⁴An Baabila, mi tuufani ma tuuforgol, an boo a anndaano. Jonta a nasti ngol. Mi heɓti ma, mi naŋngi ma, ngam a haɓi bee am.

²⁵Mi maɓɓiti sigordu balmi am, mi wurtini balmi ngam waŋgingo tikkere am. Woodi ko mi waɗata nder lesdi Kaldiya'en, min Jawmiraawo honooɓe asama.

²⁶Umme diga alkibilaaji fuu! Ngare, maɓɓite beembe maagol! Mbaage ngol bana ɓe mbaagirta huɗo. Nattine ngol! Taa acce koo ɗume nder maagol! Kirse semmbiɗɓe maagol, ɓe ndo'o haa lesdi. Kayto yimɓe Baabila! Saa'i kiita maɓɓe waɗi.

²⁸Nane haraka dogguɓe, daɗɓe lesdi Baabila ngaddi habaru haa Siyona no Jawmiraawo Allah men waatori Baabila ngam daliila haykaliiru mum.

²⁹Umre fiɗooɓe kuri ɓe ngara haa Baabila, ewne annduɓe haɓre bee lagaawal fuu. Taare berniwol, taa goɗɗo daɗa. Mbaɗe ngol fodde kuuɗe maagol fuu. Mbaɗe ngol bana ngol waari woɗɓe, ngam ngol ƴaggi dow Jawmiraawo, dow Ceniiɗo Isra'iila.

³⁰Ngam maajum suka'en maagol njanan nder babe maagol, honooɓe maagol fuu kalkan nyalaade man.” Non Jawmiraawo wi'i.

³¹Jawmiraawo honooɓe asama wi'i: “An Baabila, a heewi ƴaggaare. Ngam man mi honete. Ngam nyalaade ma wari, kiita ma yottake.

³²Nden ummaatoore ma ƴaggiinde fergoto, do'oto, walaa mo umminta nde. Mi huɓɓan yiite nder berniiji ma fuu, nge nyaama ko taari ɗum fuu.”

³³Ndaa nii Jawmiraawo honooɓe asama wi'i: “Yimɓe Isra'iila e Yahuuda ɓe toonyaaɓe. Dahɓe ɓe fuu ɗon njogito ɓe, cali yooftugo ɓe.

³⁴Ammaa kisnoowo ɓe o cemmbiɗɗo, innde maako Jawmiraawo honooɓe asama. Fakat o jiŋngan ɓe. O de'itinan duniyaaru, ammaa o diwninan yimɓe Baabila.”

³⁵Jawmiraawo wi'i: “Kaafahi waran dow Kaldiya'en, dow jooɗiiɓe haa Baabila e ardiiɓe maagol e hikma'en maagol.

³⁶Kaafahi waran dow waɗooɓe hatti maagol, sey ɓe laato faataaɓe. Kaafahi waran dow semmbiɗɓe maagol, haa ɓe kultora.

³⁷Kaafahi fiyan pucci maagol e mootaaji pucci maagol. Kaafahi waran dow honooɓe maagol jananɓe, ɓe laato bana rewɓe. Kaafahi waran dow ndesaaji maagol, ɗi njaɓte!

³⁸Hokkere waran dow ndiyamji maagol, ɗi ɓeeɓan. Ngam lesdi Baabila heewi labbi kulniiɗi ɗi laatini yimɓe yinnaaɓe.

³⁹Ngam maajum kuuje ladde e pobbi e dabbi njooɗodotto ton, woodaa mo jooɗoto ton haa abadan!

⁴⁰Nattere Baabila laatoto bana nattere berniiji Sodoma e Gomorra e gure taariiɗe ɗi. Walaa mo jooɗoto ton, walaa mo hoɗata ton.” Non Jawmiraawo wi'i.

⁴¹“Ndaa, yimɓe ɗon ngara diga lesdi woyla, ummaatoore ɗuuɗnde e laamiiɓe ɗuuɗɓe ummi haa keeri duniyaaru.

⁴²Ɓe ɗon njogi lagaaje e labbe, ɓe saatuɓe, ɓe ngalaa enɗam. Daaɗe maɓɓe ɗon iida bana maayo maŋngo, ɓe wa'iiɓe pucci, ɓe taaskiiɓe bana gorko gooto ngam haɓugo bee Baabila.

⁴³Laamiiɗo Baabila nani habaru maɓɓe, juuɗe maako tampi, kulol naŋngi mo bana luuwe naŋngirta ɓesnanɗo.

⁴⁴Min Jawmiraawo mi waran bana mbarooga ngurtiiŋga laynde sukkunde baŋnge maayo Urdun, ngaranŋga haa durduɗe kecce. Bee juhuki ndiiwanmi yimɓe Baabila diga berniwol muuɗum'en. Ɓaawo maajum mi suɓan mo laamanto ummaatoore maɓɓe. Moy nanndi bee am? Moy ewnoto yam yeeso kiita? Ardiiɗo moye dartanto yam?

⁴⁵Ngam maajum nane ko min Jawmiraawo nufani berniwol Baabila, ko anniniimi waɗugo lesdi Kaldiya'en. Fakat ɓe daseteeɓe bana ɓiɓɓe dabbaaji, fakat lesdi maɓɓe nattinte.

⁴⁶Hoolo yibbere Baabila dimmbinan lesdi, ummaatooje goɗɗe nanan gookaali maɓɓe.”